1 Salaateen 12
shimaalee qabeelay alag ho jaatay hain
1rahubiaam sikam gaya, kyoonki vahaan tamaam israaeelee usay baadshaah muqarrar karnay kay liyay jama ho gaay thay. 2yarubiaam bin nabaat yah khabar suntay hee misr say jahaan us nay sulemaan baadshaah say bhaag kar panaah lee thee israaeel vaapas aaya. 3israaeeliyon nay usay bulaaya taaki us kay saath sikam jaaen. jab pahuncha to israaeel kee pooree jamaaat yarubiaam kay saath mil kar rahubiaam say milnay gaee. unhon nay baadshaah say kaha, 4“jo jooa aap kay baap nay ham par daal diya tha usay uthaana mushkil tha, aur jo vaqt aur paisay hamen baadshaah kee khidmat men sarf karnay thay vah naaqaabil-ay-bardaasht thay. ab donon ko kam kar den. phir ham khushee say aap kee khidmat karengay.”
5rahubiaam nay javaab diya, “mujhay teen din kee muhalat den, phir dubaara meray paas aaen.” chunaanchay log chalay gaay.
6phir rahubiaam baadshaah nay un buzurgon say mashvra kiya jo sulemaan kay jeetay jee baadshaah kee khidmat kartay rahay thay. us nay poochha, “aap ka kya khayaal hai? main in logon ko kya javaab doon?” 7buzurgon nay javaab diya, “hamaara mashvra hai ki is vaqt un ka khaadim ban kar un kee khidmat karen aur unhen narm javaab den. agar aap aisa karen to vah hamesha aap kay vafaadaar khaadim banay rahengay.”
8lekin rahubiaam nay buzurgon ka mashvra radd karkay us kee khidmat men haazir un javaanon say mashvra kiya jo us kay saath parvaan chadhay thay. 9us nay poochha, “main is qaum ko kya javaab doon? yah taqaaza kar rahay hain ki main vah jooa halka kar doon jo meray baap nay un par daal diya.” 10jo javaan us kay saath parvaan chadhay thay unhon nay kaha, “achchha, yah log taqaaza kar rahay hain ki aap kay baap ka jooa halka kiya jaaay? unhen bata dena, ‘meree chhotee unglee meray baap kee kamar say ziyaada motee hai! 11beshak jo jooa us nay aap par daal diya usay uthaana mushkil tha, lekin mera jooa aur bhee bhaaree hoga. jahaan meray baap nay aap ko koday lagaaay vahaan main aap kee bichchhooon say taadeeb karoonga’!”
12teen din kay baad jab yarubiaam tamaam israaeeliyon kay saath rahubiaam ka faisla sunnay kay liyay vaapas aayaa 13to baadshaah nay unhen sakht javaab diya. buzurgon ka mashvra radd karke 14us nay unhen javaanon ka javaab diya, “beshak jo jooa meray baap nay aap par daal diya usay uthaana mushkil tha, lekin mera jooa aur bhee bhaaree hoga. jahaan meray baap nay aap ko koday lagaaay vahaan main aap kee bichchhooon say taadeeb karoonga!” 15yoon rabb kee marzee pooree huee ki rahubiaam logon kee baat naheen maanega. kyoonki ab rabb kee vah peshgoee pooree huee jo saila kay nabee akhiyaah nay yarubiaam bin nabaat ko bataaee thee.
16jab israaeeliyon nay dekha ki baadshaah hamaaree baat sunnay kay liyay tayyaar naheen hai to unhon nay us say kaha, “na hamen daaood say meeraas men kuchh milega, na yassee kay betay say kuchh milnay kee ummeed hai. ai israaeel, sab apnay apnay ghar vaapas chalen! ai daaood, ab apna ghar khud sambhaal lo!” yah kah kar vah sab chalay gaay.
17sirf yahoodaah kay qabeelay kay shaheron men rahenay vaalay israaeelee rahubiaam kay tahet rahay. 18phir rahubiaam baadshaah nay begaariyon par muqarrar afsar adooneeraam ko shimaalee qabeelon kay paas bhej diya, lekin usay dekh kar tamaam logon nay usay sangasaar kiya. tab rahubiaam jaldee say apnay rath par savaar hua aur bhaag kar yarooshalam pahunch gaya. 19yoon israaeel kay shimaalee qabeelay daaood kay shaahee gharaanay say alag ho gaay aur aaj tak us kee hukoomat naheen maantay.
20jab khabar shimaalee israaeel men phailee ki yarubiaam misr say vaapas a gaya hai to logon nay qaumee ijlaas mun’aqid karkay usay bulaaya aur vahaan usay apna baadshaah bana liya. sirf yahoodaah ka qabeela rahubiaam aur us kay gharaanay ka vafaadaar raha.
rahubiaam ko israaeel say jang karnay kee ijaazat naheen miltee
21jab rahubiaam yarooshalam pahuncha to us nay yahoodaah aur binyameen kay qabeelon kay cheeda cheeda faujiyon ko israaeel say jang karnay kay liyay bulaaya. 1,80,000 mard jama huay taaki rahubiaam bin sulemaan kay liyay israaeel par dubaara qaaboo paaen. 22lekin ain us vaqt mard-ay-khuda samaayaah ko allaah kee taraf say paighaam mila, 23“yahoodaah kay baadshaah rahubiaam bin sulemaan, yahoodaah aur binyameen kay tamaam afraad aur baaqee logon ko ittila day, 24‘rabb farmaata hai ki apnay israaeelee bhaaiyon say jang mat karna. har ek apnay apnay ghar vaapas chala jaaay, kyoonki jo kuchh hua hai vah meray hukm par hua hai’.”
tab vah rabb kee sun kar apnay apnay ghar vaapas chalay gaay.
yarubiaam kay sonay kay bachhde
25yarubiaam ifraaeem kay pahaadee ilaaqay kay shaher sikam ko mazboot karkay vahaan aabaad hua. baad men us nay fanooel shaher kee bhee qil’aabandee kee aur vahaan muntaqil hua. 26lekin dil men andesha raha ki kaheen israaeel dubaara daaood kay gharaanay kay haath men na a jaaay. 27us nay socha, “log baaqaaidagee say yarooshalam aatay jaatay hain taaki vahaan rabb kay ghar men apnee qurbaaniyaan pesh karen. agar yah silsila toda na jaaay to aahista aahista un kay dil dubaara yahoodaah kay baadshaah rahubiaam kee taraf maail ho jaaengay. aakhirkaar vah mujhay qatl karkay rahubiaam ko apna baadshaah bana lengay.”
28apnay afsaron kay mashvray par us nay sonay kay do bachhday banvaaay. logon kay saamnay us nay elaan kiya, “har qurbaanee kay liyay yarooshalam jaana mushkil hai! ai israaeel dekh, yah teray devta hain jo tujhay misr say nikaal laaay.” 29ek but us nay junoobee shaher bait-el men khada kiya aur doosra shimaalee shaher daan men. 30yoon yarubiaam nay israaeeliyon ko gunaah karnay par uksaaya. log daan tak safar kiya kartay thay taaki vahaan kay but kee pooja karen.
31is kay ilaava yarubiaam nay bahut see oonchee jagahon par mandir banvaaay. unhen sambhaalnay kay liyay us nay aisay log muqarrar kiay jo laavee kay qabeelay kay naheen balki aam log thay. 32us nay ek naee eed bhee raaij kee jo yahoodaah men manaanay vaalee jhompadiyon kee eed kee maanind thee. yah eed aathven maah [a] aktoobar ta navambar kay pandraheven din manaaee jaatee thee. bait-el men us nay khud qurbaangaah par ja kar apnay banvaaay huay bachhdon ko qurbaaniyaan pesh keen, aur vaheen us nay apnay un mandiron kay imaamon ko muqarrar kiya jo us nay oonchee jagahon par taameer kiay thay.
nabee yarubiaam ko buree khabar pahunchaata hai
33chunaanchay yarubiaam kay muqarrarakarada din yaanee aathven maheenay kay pandraheven din israaeeliyon nay bait-el men eed manaaee. tamaam mehamaanon kay saamnay yarubiaam qurbaangaah par chadh gaya taaki qurbaaniyaan pesh karay.