1 Salaateen 14

yarubiaam ko ilaahee saza miltee hai

¹ek din yarubiaam ka beta abiyaah bahut beemaar hua. ²tab yarubiaam nay apnee beevee say kaha, “ja kar apna bhes badlen taaki koee na pahechaanay ki aap meree beevee hain. phir saila jaaen. vahaan akhiyaah nabee raheta hai jis nay mujhay ittila dee thee ki main is qaum ka baadshaah ban jaaoonga. ³us kay paas das rotiyaan, kuchh biskut aur shahed ka martabaan lay jaaen. vah aadmee aap ko zaroor bata dega ki ladkay kay saath kya ho jaaega.”

⁴chunaanchay yarubiaam kee beevee apna bhes badal kar ravaana huee aur chaltay chaltay saila men akhiyaah kay ghar pahunch gaee. akhiyaah umrraseeda honay kay baais dekh naheen sakta tha. ⁵lekin rabb nay usay aagaah kar diya, “yarubiaam kee beevee tujh say milnay a rahee hai taaki apnay beemaar betay kay baaray men maaloomaat haasil karay. lekin vah apna bhes badal kar aaegee taaki usay pahechaana na jaaay.” phir rabb nay nabee ko bataaya ki usay kya javaab dena hai.

⁶jab akhiyaah nay aurat kay qadmon kee aahat sunee to bola, “yarubiaam kee beevee, andar aaen! roop bharnay kee kya zaroorat? mujhay aap ko buree khabar pahunchaanee hai. ⁷jaaen, yarubiaam ko rabb israaeel kay khuda kee taraf say paighaam den, ‘main nay tujhay logon men say chun kar khada kiya aur apnee qaum israaeel par baadshaah bana diya. ⁸main nay baadshaahee ko daaood kay gharaanay say chheen kar tujhay day diya. lekin afsos, too meray khaadim daaood kee tarah zindagee naheen guzaarta jo meray ahkaam kay taabay rah kar pooray dil say meree pairvee karta raha aur hamesha vah kuchh karta tha jo mujhay pasand tha. ⁹jo tujh say pahelay thay un kee nisbat too nay kaheen ziyaada badee kee, kyoonki too nay but dhaal kar apnay liyay deegar maabood banaaay hain aur yoon mujhay taish dilaaya. choonki too nay apna munh mujh say pher liyaa ¹⁰is liyay main teray khaandaan ko museebat men daal doonga. israaeel men main yarubiaam kay tamaam mardon ko halaak kar doonga, khwaah vah bachchay hon ya baaligh. jis tarah gobar ko jhaadoo day kar door kiya jaata hai usee tarah yarubiaam kay gharaanay ka naam-o-nishaan mit jaaega. ¹¹tum men say jo shaher men marengay unhen kuttay kha jaaengay, aur jo khulay maidaan men marengay unhen parinday chat kar jaaengay. kyoonki yah rabb ka farmaan hai’.”

¹²phir akhiyaah nay yarubiaam kee beevee say kaha, “aap apnay ghar vaapas chalee jaaen. joon hee aap shaher men daakhil hongee ladka faut ho jaaega. ¹³poora israaeel us ka maatam karkay usay dafan karega. vah aap kay khaandaan ka vaahid fard hoga jisay saheeh taur say dafnaaya jaaega. kyoonki rabb israaeel kay khuda nay sirf usee men kuchh paaya jo usay pasand tha. ¹⁴rabb israaeel par ek baadshaah muqarrar karega jo yarubiaam kay khaandaan ko halaak karega. aaj hee say yah silsila shuroo ho jaaega. ¹⁵rabb israaeel ko bhee saza dega, kyoonki vah yaseerat devee kay khambay bana kar un kee pooja kartay hain. choonki vah rabb ko taish dilaatay rahay hain, is liyay vah unhen maarega, aur vah paanee men sarkanday kee tarah hil jaaengay. rabb unhen is achchhay mulk say ukhaad kar darya-ay-furaat kay paar muntashir kar dega. ¹⁶yoon vah israaeel ko un gunaahon kay baais tark karega jo yarubiaam nay kiay aur israaeel ko karnay par uksaaya hai.”

¹⁷yarubiaam kee beevee tirza men apnay ghar vaapas chalee gaee. aur ghar kay darvaazay men daakhil hotay hee us ka beta mar gaya. ¹⁸tamaam israaeel nay usay dafna kar us ka maatam kiya. sab kuchh vaisay hua jaisay rabb nay apnay khaadim akhiyaah nabee kee maarifat farmaaya tha.

yarubiaam kee maut

¹⁹baaqee jo kuchh yarubiaam kee zindagee kay baaray men likha hai vah ‘shaahaan-ay-israaeel kee taareekh’ kee kitaab men darj hai. us kitaab men padha ja sakta hai ki vah kis tarah hukoomat karta tha aur us nay kaun kaun see jangen keen. ²⁰yarubiaam 22 saal baadshaah raha. jab vah mar kar apnay baapdaada say ja mila to us ka beta nadab takhtnasheen hua.

yahoodaah ka baadshaah rahubiaam

²¹yahoodaah men rahubiaam bin sulemaan hukoomat karta tha. us kee maan naama ammonee thee. 41 saal kee umr men vah takhtnasheen hua aur 17 saal baadshaah raha. us ka daar-ul-hakoomat yarooshalam tha, vah shaher jisay rabb nay tamaam israaeelee qabeelon men say chun liya taaki us men apna naam qaaim karay.

²²lekin yahoodaah kay baashinday bhee aisee harkaten kartay thay jo rabb ko naapsand theen. apnay gunaahon say vah usay taish dilaatay rahay, kyoonki un kay yah gunaah un kay baapdaada kay gunaahon say kaheen ziyaada sangeen thay. ²³unhon nay bhee oonchee jagahon par mandir banaaay. har oonchee pahaadee par aur har ghanay darakht kay saay men unhon nay makhsoos patthar ya yaseerat devee kay khambay khaday kiay, ²⁴yahaan tak ki mandiron men jismafrosh mard aur aurten thay. gharaz, unhon nay un qaumon kay tamaam ghinaunay rasm-o-rivaaj apna liyay jin ko rabb nay israaeeliyon kay aagay aagay nikaal diya tha.

²⁵rahubiaam baadshaah kee hukoomat kay paanchven saal men misr kay baadshaah seesaq nay yarooshalam par hamla karke ²⁶rabb kay ghar aur shaahee mahel kay tamaam khazaanay loot liyay. sonay kee vah dhaalen bhee chheen lee gaeen jo sulemaan nay banvaaee theen. ²⁷in kee jagah rahubiaam nay peetal kee dhaalen banvaaeen aur unhen un muhaafizon kay afsaron kay sapurd kiya jo shaahee mahel kay darvaazay kee paheraadaaree kartay thay. ²⁸jab bhee baadshaah rabb kay ghar men jaata tab muhaafiz yah dhaalen utha kar saath lay jaatay. is kay baad vah unhen paheredaaron kay kamray men vaapas lay jaatay thay.

²⁹baaqee jo kuchh rahubiaam baadshaah kee hukoomat kay dauraan hua aur jo kuchh us nay kiya vah ‘shaahaan-ay-yahoodaah kee taareekh’ kee kitaab men darj hai. ³⁰donon baadshaahon rahubiaam aur yarubiaam kay jeetay jee un kay darmiyaan jang jaaree rahee. ³¹jab rahubiaam mar kar apnay baapdaada say ja mila to usay yarooshalam kay us hissay men jo ‘daaood ka shaher’ kahelaata hai khaandaanee qabr men dafnaaya gaya. us kee maan naama ammonee thee. phir rahubiaam ka beta abiyaah takhtnasheen hua.