1 Salaateen 15

yahoodaah ka baadshaah abiyaah

¹abiyaah israaeel kay baadshaah yarubiaam bin nabaat kee hukoomat kay 18ven saal men yahoodaah ka baadshaah bana. ²vah teen saal baadshaah raha, aur us ka daar-ul-hakoomat yarooshalam tha. us kee maan maaka bint abeesloom thee. ³abiyaah say vahee gunaah sarzad huay jo us kay baap nay kiay thay, aur vah pooray dil say rabb apnay khuda ka vafaadaar na raha. go vah is men apnay pardaada daaood say farq thaa ⁴to bhee rabb us kay khuda nay abiyaah ka yarooshalam men charaagh jalnay diya. daaood kee khaatir us nay usay jaansheen ata kiya aur yarooshalam ko qaaim rakha, ⁵kyoonki daaood nay vah kuchh kiya tha jo rabb ko pasand tha. jeetay jee vah rabb kay ahkaam kay taabay raha, siva-ay-us jurm kay jab us nay ooriyaah hittee kay silsilay men ghalat qadam uthaaay thay.

⁶rahubiaam aur yarubiaam kay darmiyaan kee jang abiyaah kee hukoomat kay dauraan bhee jaaree rahee. ⁷baaqee jo kuchh abiyaah kee hukoomat kay dauraan hua aur jo kuchh us nay kiya vah ‘shaahaan-ay-yahoodaah kee taareekh’ kee kitaab men darj hai. ⁸jab vah mar kar apnay baapdaada say ja mila to usay yarooshalam kay us hissay men dafan kiya gaya jo ‘daaood ka shaher’ kahelaata hai. phir us ka beta aasa takhtnasheen hua.

yahoodaah ka baadshaah aasaa

⁹aasa israaeel kay baadshaah yarubiaam kay 20ven saal men yahoodaah ka baadshaah ban gaya. ¹⁰us kee hukoomat ka dauraaniya 41 saal tha, aur us ka daar-ul-hakoomat yarooshalam tha. maan ka naam maaka tha, aur vah abeesloom kee betee thee. ¹¹apnay pardaada daaood kee tarah aasa bhee vah kuchh karta raha jo rabb ko pasand tha. ¹²us nay un jismafrosh mardon aur aurton ko nikaal diya jo mandiron men naam-nihaad khidmat kartay thay aur un tamaam buton ko tabaah kar diya jo us kay baapdaada nay banaaay thay. ¹³aur go us kee maan baadshaah kee maan honay kay baais bahut asar-o-rasookh rakhtee thee, taaham aasa nay yah uhda khatm kar diya jab maan nay yaseerat devee ka ghinauna khamba banva liya. aasa nay yah but katva kar vaadee-ay-qidron men jala diya. ¹⁴afsos ki us nay oonchee jagahon kay mandiron ko door na kiya. to bhee aasa jeetay jee pooray dil say rabb ka vafaadaar raha. ¹⁵sona-chaandee aur baaqee jitnee cheezen us kay baap aur us nay rabb kay liyay makhsoos kee theen un sab ko vah rabb kay ghar men laaya.

¹⁶yahoodaah kay baadshaah aasa aur israaeel kay baadshaah baasha kay darmiyaan zindagee bhar jang jaaree rahee. ¹⁷ek din baasha baadshaah nay yahoodaah par hamla karkay raama shaher kee qil’aabandee kee. maqsad yah tha ki na koee yahoodaah kay mulk men daakhil ho sakay, na koee vahaan say nikal sakay. ¹⁸javaab men aasa nay shaam kay baadshaah bin-hadad kay paas vafad bheja. bin-hadad ka baap taabarimmon bin hazyoon tha, aur us ka daar-ul-hakoomat damishq tha. aasa nay rabb kay ghar aur shaahee mahel kay khazaanon ka tamaam bacha hua sona aur chaandee vafad kay sapurd karkay damishq kay baadshaah ko paighaam bheja, ¹⁹“mera aap kay saath ahd hai jis tarah meray baap ka aap kay baap kay saath ahd tha. guzaarish hai ki aap sonay-chaandee ka yah tuhfa qabool karkay israaeel kay baadshaah baasha kay saath apna ahd mansookh kar den taaki vah meray mulk say nikal jaaay.”

²⁰bin-hadad muttafiq hua. us nay apnay faujee afsaron ko israaeel kay shaheron par hamla karnay kay liyay bhej diya to unhon nay aiyyoon, daan, abeel-bait-maaka, tamaam kinnarat aur naftaalee par qabza kar liya. ²¹jab baasha ko is kee khabar milee to vah raama kee qil’aabandee karnay say baaz aaya aur tirza vaapas chala gaya.

²²phir aasa baadshaah nay yahoodaah kay tamaam mardon kee bhartee karkay unhen raama bhej diya taaki vah un tamaam pattharon aur shaheteeron ko utha kar lay jaaen jin say baasha baadshaah raama kee qil’aabandee karna chaahata tha. tamaam mardon ko vahaan jaana pada, ek ko bhee chhuttee na milee. is saamaan say aasa nay binyameen kay shaher jiba aur misfaah kee qil’aabandee kee.

²³baaqee jo kuchh aasa kee hukoomat kay dauraan hua aur jo kuchh us nay kiya vah ‘shaahaan-ay-yahoodaah kee taareekh’ kee kitaab men darj hai. us men us kee kaamyaabiyon aur us kay taameer kiay gaay shaheron ka zikr hai. budhaapay men us kay paaon ko beemaaree lag gaee. ²⁴jab vah mar kar apnay baapdaada say ja mila to usay yarooshalam kay us hissay men jo ‘daaood ka shaher’ kahelaata hai khaandaanee qabr men dafnaaya gaya. phir us ka beta yahoosafat us kee jagah takhtnasheen hua.

israaeel ka baadshaah nadab

²⁵nadab bin yarubiaam yahoodaah kay baadshaah aasa kee hukoomat kay doosray saal men israaeel ka baadshaah bana. us kee hukoomat ka dauraaniya do saal tha. ²⁶us ka tarz-ay-zindagee rabb ko pasand naheen tha, kyoonki vah apnay baap kay namoonay par chalta raha. jo badee yarubiaam nay israaeel ko karnay par uksaaya tha us say nadab bhee door na hua.

^27-28 ek din jab nadab israaeelee fauj kay saath filistee shaher jibbatoon ka muhaasara kiay huay tha to ishkaar kay qabeelay kay baasha bin akhiyaah nay us kay khilaaf saazish karkay usay maar daala aur khud israaeel ka baadshaah ban gaya. yah yahoodaah kay baadshaah aasa kee hukoomat kay teesray saal men hua.

²⁹takht par baithtay hee baasha nay yarubiaam kay pooray khaandaan ko marva diya. us nay ek ko bhee zinda na chhoda. yoon vah baat pooree huee jo rabb nay saila kay rahenay vaalay apnay khaadim akhiyaah kee maarifat farmaaee thee. ³⁰kyoonki jo gunaah yarubiaam nay kiay aur israaeel ko karnay par uksaaya tha un say us nay rabb israaeel kay khuda ko taish dilaaya tha.

³¹baaqee jo kuchh nadab kee hukoomat kay dauraan hua aur jo kuchh us nay kiya vah ‘shaahaan-ay-israaeel kee taareekh’ kee kitaab men darj hai.

israaeel ka baadshaah baashaa

^32-33 baasha bin akhiyaah yahoodaah kay baadshaah aasa kee hukoomat kay teesray saal men israaeel ka baadshaah bana. us kee hukoomat ka dauraaniya 24 saal tha, aur us ka daar-ul-hakoomat tirza raha. us kay aur yahoodaah kay baadshaah aasa kay darmiyaan zindagee bhar jang jaaree rahee. ³⁴lekin vah bhee aisa kaam karta tha jo rabb ko naapsand tha, kyoonki us nay yarubiaam kay namoonay par chal kar vah gunaah jaaree rakhay jo karnay par yarubiaam nay israaeel ko uksaaya tha.