1 Salaateen 16

¹ek din rabb nay yaahoo bin hanaanee ko baasha kay paas bhej kar farmaaya, ²“pahelay too kuchh naheen tha, lekin main nay tujhay khaak men say utha kar apnee qaum israaeel ka hukmaraan bana diya. to bhee too nay yarubiaam kay namoonay par chal kar meree qaum israaeel ko gunaah karnay par uksaaya aur mujhay taish dilaaya hai. ³is liyay main teray gharaanay kay saath vahee kuchh karoonga jo yarubiaam bin nabaat kay gharaanay kay saath kiya tha. baasha kee pooree nasal halaak ho jaaegee. ⁴khaandaan kay jo afraad shaher men marengay unhen kuttay kha jaaengay, aur jo khulay maidaan men marengay unhen parinday chat kar jaaengay.”

⁵baaqee jo kuchh baasha kee hukoomat kay dauraan hua, jo kuchh us nay kiya aur jo kaamyaabiyaan usay haasil hueen vah ‘shaahaan-ay-israaeel kee taareekh’ kee kitaab men darj hain. ⁶jab vah mar kar apnay baapdaada say ja mila to usay tirza men dafan kiya gaya. phir us ka beta aila takhtnasheen hua. ⁷rabb kee saza ka jo paighaam hanaanee kay betay yaahoo nabee nay baasha aur us kay khaandaan ko sunaaya us kee do vujoohaat theen. pahelay, baasha nay yarubiaam kay khaandaan kee tarah vah kuchh kiya jo rabb ko naapsand tha aur usay taish dilaaya. doosray, us nay yarubiaam kay pooray khaandaan ko halaak kar diya tha.

israaeel ka baadshaah ailaa

⁸aila bin baasha yahoodaah kay baadshaah aasa kee hukoomat kay 26ven saal men israaeel ka baadshaah bana. us kee hukoomat kay do saal kay dauraan us ka daar-ul-hakoomat tirza raha. ⁹aila ka ek afsar banaam zimree tha. zimree rathon kay aadhay hissay par muqarrar tha. ab vah baadshaah kay khilaaf saazishen karnay laga. ek din aila tirza men mahel kay inchaarj arza kay ghar men baitha mai pee raha tha. jab nashay men dhut huaa ¹⁰to zimree nay andar ja kar usay maar daala. phir vah khud takht par baith gaya. yah yahoodaah kay baadshaah aasa kee hukoomat kay 27ven saal men hua.

¹¹takht par baithtay hee zimree nay baasha kay pooray khaandaan ko halaak kar diya. us nay kisee bhee mard ko zinda na chhoda, khwaah vah door ka rishtedaar tha, khwaah dost. ¹²yoon vahee kuchh hua jo rabb nay yaahoo nabee kee maarifat baasha ko farmaaya tha. ¹³kyoonki baasha aur us kay betay aila say sangeen gunaah sarzad huay thay, aur saath saath unhon nay israaeel ko bhee yah karnay par uksaaya tha. apnay baatil devtaaon say unhon nay rabb israaeel kay khuda ko taish dilaaya tha.

¹⁴baaqee jo kuchh aila kee hukoomat kay dauraan hua aur jo kuchh us nay kiya vah ‘shaahaan-ay-israaeel kee taareekh’ kee kitaab men darj hai.

israaeel ka baadshaah zimree

¹⁵zimree yahoodaah kay baadshaah aasa kee hukoomat kay 27ven saal men israaeel ka baadshaah bana. lekin tirza men us kee hukoomat sirf saat din tak qaaim rahee. us vaqt israaeelee fauj filistee shaher jibbatoon ka muhaasara kar rahee thee. ¹⁶jab fauj men khabar phail gaee ki zimree nay baadshaah kay khilaaf saazish karkay usay qatl kiya hai to tamaam israaeeliyon nay lashkargaah men a kar usee din apnay kamaandar umree ko baadshaah bana diya. ¹⁷tab umree tamaam faujiyon kay saath jibbatoon ko chhod kar tirza ka muhaasara karnay laga. ¹⁸jab zimree ko pata chala ki shaher doosron kay qabzay men a gaya hai to us nay mahel kay burj men ja kar usay aag lagaaee. yoon vah jal kar mar gaya.

¹⁹is tarah usay bhee munaasib saza mil gaee, kyoonki us nay bhee vah kuchh kiya tha jo rabb ko naapsand tha. yarubiaam kay namoonay par chal kar us nay vah tamaam gunaah kiay jo yarubiaam nay kiay aur israaeel ko karnay par uksaaya tha. ²⁰jo kuchh zimree kee hukoomat kay dauraan hua aur jo saazishen us nay keen vah ‘shaahaan-ay-israaeel kee taareekh’ kee kitaab men darj hain.

israaeel ka baadshaah umree

²¹zimree kee maut kay baad israaeelee do firqon men bat gaay. ek firqa tibnee bin jeenat ko baadshaah banaana chaahata tha, doosra umree ko. ²²lekin umree ka firqa tibnee kay firqay kee nisbat ziyaada taaqatvar nikla. chunaanchay tibnee mar gaya aur umree pooree qaum par baadshaah ban gaya.

²³umree yahoodaah kay baadshaah aasa kee hukoomat kay 31ven saal men israaeel ka baadshaah bana. us kee hukoomat ka dauraaniya 12 saal tha. pahelay chhah saal daar-ul-hakoomat tirza raha. ²⁴is kay baad us nay ek aadmee banaam samar ko chaandee kay 6,000 sikkay day kar us say saamriya pahaadee khareed lee aur vahaan apna naya daar-ul-hakoomat taameer kiya. pahelay maalik samar kee yaad men us nay shaher ka naam saamriya rakha.

²⁵lekin umree nay bhee vahee kuchh kiya jo rabb ko naapsand tha, balki us nay maazee kay baadshaahon kee nisbat ziyaada badee kee. ²⁶us nay yarubiaam bin nabaat kay namoonay par chal kar vah tamaam gunaah kiay jo yarubiaam nay kiay aur israaeel ko karnay par uksaaya tha. nateejay men israaeelee rabb apnay khuda ko apnay baatil devtaaon say taish dilaatay rahay. ²⁷baaqee jo kuchh umree kee hukoomat kay dauraan hua, jo kuchh us nay kiya aur jo kaamyaabiyaan usay haasil hueen vah ‘shaahaan-ay-israaeel kee taareekh’ kee kitaab men bayaan kee gaee hain. ²⁸jab umree mar kar apnay baapdaada say ja mila to usay saamriya men dafnaaya gaya. phir us ka beta akhiyab takhtnasheen hua.

israaeel ka baadshaah akhiyab

²⁹akhiyab ban umree yahoodaah kay baadshaah aasa kay 38ven saal men israaeel ka baadshaah bana. us kee hukoomat ka dauraaniya 22 saal tha, aur us ka daar-ul-hakoomat saamriya raha. ³⁰akhiyab nay bhee aisay kaam kiay jo rabb ko naapsand thay, balki maazee kay baadshaahon kee nisbat us kay gunaah ziyaada sangeen thay. ³¹yarubiaam kay namoonay par chalna us kay liyay kaafee naheen tha balki us nay is say badh kar saida kay baadshaah itbaاl kee betee eezbil say shaadee bhee kee. nateejay men vah us kay devta baal kay saamnay jhuk kar us kee pooja karnay laga. ³²saamriya men us nay baal ka mandir taameer kiya aur devta kay liyay qurbaangaah bana kar us men rakh diya. ³³akhiyab nay yaseerat devee ka but bhee banva diya. yoon us nay apnay ghinaunay kaamon say maazee kay tamaam israaeelee baadshaahon kee nisbat kaheen ziyaada rabb israaeel kay khuda ko taish dilaaya.

³⁴akhiyab kee hukoomat kay dauraan bait-el kay rahenay vaalay heeel nay yareehoo shaher ko naay siray say taameer kiya. jab us kee bunyaad rakhee gaee to us ka sab say bada beta abeeraam mar gaya, aur jab us nay shaher kay darvaazay laga diay to us kay sab say chhotay betay sajoob ko apnee jaan denee padee. yoon rabb kee vah baat pooree huee jo us nay yashooa bin noon kee maarifat farmaaee thee.