1 Salaateen 19

ilyaas bhaag jaata hai

¹akhiyab nay eezbil ko sab kuchh sunaaya jo ilyaas nay kaha tha, yah bhee ki us nay baal kay nabiyon ko kis tarah talvaar say maar diya tha. ²tab eezbil nay qaasid ko ilyaas kay paas bhej kar usay ittila dee, “devta mujhay sakht saza den agar main kal is vaqt tak aap ko un nabiyon kee see saza na doon.”

³ilyaas sakht dar gaya aur apnee jaan bachaanay kay liyay bhaag gaya. chaltay chaltay vah yahoodaah kay shaher bair-saba tak pahunch gaya. vahaan vah apnay naukar ko chhod kar ⁴aagay registaan men ja nikla. ek din kay safar kay baad vah seenk kee jhaadee kay paas pahunch gaya aur us kay saay men baith kar dua karnay laga, “ai rabb, mujhay marnay day. bas ab kaafee hai. meree jaan lay lay, kyoonki main apnay baapdaada say behatar naheen hoon.” ⁵phir vah jhaadee kay saay men let kar so gaya.

achaanak ek farishtay nay usay chhoo kar kaha, “uth, khaana kha lay!” ⁶jab us nay apnee aankhen kholeen to dekha ki sirahaanay kay qareeb koilon par banaaee gaee rotee aur paanee kee suraahee padee hai. us nay rotee khaaee, paanee piya aur dubaara so gaya. ⁷lekin rabb ka farishta ek baar phir aaya aur usay haath laga kar kaha, “uth, khaana kha lay, varna aagay ka lamba safar teray bas kee baat naheen hogee.”

⁸tab ilyaas nay uth kar dubaara khaana khaaya aur paanee piya. is khuraak nay usay itnee taqviyat dee ki vah chaalees din aur chaalees raat safar kartay kartay allaah kay pahaad horib yaanee seena tak pahunch gaya. ⁹vahaan vah raat guzaarnay kay liyay ek ghaar men chala gaya.

rabb ilyaas kee hausalaaafzaaee karta hai

ghaar men rabb us say hamkalaam hua. us nay poochha, “ilyaas, too yahaan kya kar raha hai?” ¹⁰ilyaas nay javaab diya, “main nay rabb, aasmaanee lashkaron kay khuda kee khidmat karnay kee sirtod koshish kee hai, kyoonki israaeeliyon nay teray ahd ko tark kar diya hai. unhon nay teree qurbaanagaahon ko gira kar teray nabiyon ko talvaar say qatl kar diya hai. main akela hee bacha hoon, aur vah mujhay bhee maar daalnay kay darpai hain.”

¹¹javaab men rabb nay farmaaya, “ghaar say nikal kar pahaad par rabb kay saamnay khada ho ja!” phir rabb vahaan say guzra. us kay aagay aagay badee aur zabardast aandhee aaee jis nay pahaadon ko cheer kar chataanon ko tukday tukday kar diya. lekin rabb aandhee men naheen tha. ¹²is kay baad zalzla aaya, lekin rabb zalzlay men naheen tha. ¹³zalzlay kay baad bhadaktee huee aag vahaan say guzree, lekin rabb aag men bhee naheen tha. phir narm hava kee dheemee dheemee aavaaz sunaaee dee. yah aavaaz sun kar ilyaas nay apnay chiharay ko chaadar say dhaamp liya aur nikal kar ghaar kay munh par khada ho gaya. ek aavaaz us say mukhaatib huee, “ilyaas, too yahaan kya kar raha hai?” ¹⁴ilyaas nay javaab diya, “main nay rabb, aasmaanee lashkaron kay khuda kee khidmat karnay kee sirtod koshish kee hai, kyoonki israaeeliyon nay teray ahd ko tark kar diya hai. unhon nay teree qurbaanagaahon ko gira kar teray nabiyon ko talvaar say qatl kar diya hai. main akela hee bacha hoon, aur vah mujhay bhee maar daalnay kay darpai hain.”

¹⁵rabb nay javaab men kaha, “registaan men us raastay say ho kar vaapas ja jis nay tujhay yahaan pahunchaaya hai. phir damishq chala ja. vahaan hazaael ko tel say masah karkay shaam ka baadshaah qaraar day. ¹⁶isee tarah yaahoo bin nimsee ko masah karkay israaeel ka baadshaah qaraar day aur abeel-mahoola kay rahenay vaalay ileesha bin saafat ko masah karkay apna jaansheen muqarrar kar. ¹⁷jo hazaael kee talvaar say bach jaaega usay yaahoo maar dega, aur jo yaahoo kee talvaar say bach jaaega usay ileesha maar dega. ¹⁸lekin main nay apnay liyay israaeel men 7,000 afraad ko bacha liya hai, un tamaam logon ko jo ab tak na baal devta kay saamnay jhukay, na us kay but ko bosa diya hai.”

ilyaas ileesha ko apna jaansheen muqarrar karta hai

¹⁹ilyaas vahaan say chala gaya. israaeel men vaapas a kar usay ileesha bin saafat mila jo bailon kee baarah jodiyon kee madad say hal chala raha tha. khud vah baaraheveen jodee kay saath chal raha tha. ilyaas nay us kay paas a kar apnee chaadar us kay kandhon par daal dee aur rukay baghair aagay nikal gaya.

²⁰ileesha fauran apnay bailon ko chhod kar ilyaas kay peechhay bhaaga. us nay kaha, “pahelay mujhay apnay maan-baap ko bosa day kar khairbaad kahenay deejiay. phir main aap kay peechhay ho loonga.” ilyaas nay javaab diya, “chalen, vaapas jaaen. lekin vah kuchh yaad rahay jo main nay aap kay saath kiya hai.” ²¹tab ileesha vaapas chala gaya. bailon kee ek jodee ko lay kar us nay donon ko zabah kiya. hal chalaanay ka saamaan us nay gosht pakaanay kay liyay jala diya. jab gosht tayyaar tha to us nay usay logon men taqseem karkay unhen khila diya. is kay baad ileesha ilyaas kay peechhay ho kar us kee khidmat karnay laga.