1 Salaateen 5

heeraam baadshaah kay saath sulemaan ka muaahadaa

¹soor ka baadshaah heeraam hamesha daaood ka achchha dost raha tha. jab usay khabar milee ki daaood kay baad sulemaan ko masah karkay baadshaah banaaya gaya hai to us nay apnay safeeron ko usay mubaarakabaad denay kay liyay bhej diya. ²tab sulemaan nay heeraam ko paighaam bheja, ³“aap jaantay hain ki meray baap daaood rabb apnay khuda kay naam kay liyay ghar taameer karna chaahatay thay. lekin yah un kay bas kee baat naheen thee, kyoonki un kay jeetay jee ird-gird kay mamaalik un say jang kartay rahay. go rabb nay daaood ko tamaam dushmanon par fatah bakhshee thee, lekin ladtay ladtay vah rabb ka ghar na bana sakay. ⁴ab haalaat farq hain : rabb meray khuda nay mujhay poora sukoon ata kiya hai. chaaron taraf na koee mukhaalif nazar aata hai, na koee khatra. ⁵is liyay main rabb apnay khuda kay naam kay liyay ghar taameer karna chaahata hoon. kyoonki meray baap daaood kay jeetay jee rabb nay un say vaada kiya tha, ‘teray jis betay ko main teray baad takht par bithaaoonga vahee meray naam kay liyay ghar banaaega.’ ⁶ab guzaarish hai ki aap kay lakadahaaray lubnaan men meray liyay deodaar kay darakht kaat den. meray log un kay saath mil kar kaam karengay. aap kay logon kee mazdooree main hee ada karoonga. jo kuchh bhee aap kahengay main unhen doonga. aap to khoob jaantay hain ki hamaaray haan saida kay lakkadahaaron jaisay maahir naheen hain.”

⁷jab heeraam ko sulemaan ka paighaam mila to vah bahut khush ho kar bol utha, “aaj rabb kee hamd ho jis nay daaood ko is badee qaum par hukoomat karnay kay liyay itna daanishmand beta ata kiya hai!” ⁸sulemaan ko heeraam nay javaab bheja, “mujhay aap ka paighaam mil gaya hai, aur main aap kee zaroor madad karoonga. deodaar aur jooneepar kee jitnee lakdee aap ko chaahiay vah main aap kay paas pahuncha doonga. ⁹meray log darakhton kay tanay lubnaan kay pahaadee ilaaqay say neechay saahil tak laaengay jahaan ham un kay beday baandh kar samundar par us jagah pahuncha dengay jo aap muqarrar karengay. vahaan ham tanon kay rassay khol dengay, aur aap unhen lay ja sakengay. muaavazay men aap mujhay itnee khuraak muhayya karen ki meray darbaar kee zarooriyaat pooree ho jaaen.”

¹⁰chunaanchay heeraam nay sulemaan ko deodaar aur jooneepar kee utnee lakdee muhayya kee jitnee usay zaroorat thee. ¹¹muaavazay men sulemaan usay saalaana taqreeban 32,50,000 kilograam gandum aur taqreeban 4,40,000 litar zaitoon ka tel bhejta raha. ¹²is kay ilaava sulemaan aur heeraam nay aapas men sulah ka muaahada kiya. yoon rabb nay sulemaan ko hikmat ata kee jis tarah us nay us say vaada kiya tha.

rabb ka ghar banaanay kee pahelee tayyaariyaan

^13-14 sulemaan baadshaah nay lubnaan men yah kaam karnay kay liyay israaeel men say 30,000 aadmiyon kee begaar par bhartee kee. us nay adooneeraam ko un par muqarrar kiya. har maah vah baaree baaree 10,000 afraad ko lubnaan men bhejta raha. yoon har mazdoor ek maah lubnaan men aur do maah ghar men raheta. ¹⁵sulemaan nay 80,000 aadmiyon ko kaanon men lagaaya taaki vah patthar nikaalen. 70,000 afraad yah patthar yarooshalam laatay thay. ¹⁶un logon par 3,300 nigraan muqarrar thay. ¹⁷baadshaah kay hukm par vah kaanon say behtareen patthar kay baday baday tukday nikaal laaay aur unhen taraash kar rabb kay ghar kee bunyaad kay liyay tayyaar kiya. ¹⁸jabal kay kaareegaron nay sulemaan aur heeraam kay kaareegaron kee madad kee. unhon nay mil kar patthar kay baday baday tukday aur lakdee ko taraash kar rabb kay ghar kee taameer kay liyay tayyaar kiya.