1 Salaateen 6
rabb kay ghar kee taameer
1sulemaan nay apnee hukoomat kay chauthay saal kay doosray maheenay zeeb men rabb kay ghar kee taameer shuroo kee. israaeel ko misr say niklay 480 saal guzar chukay thay.
2imaarat kee lambaaee 90 fut, chaudaaee 30 fut aur oonchaaee 45 fut thee. 3saamnay ek baraamda banaaya gaya jo imaarat jitna chauda yaanee 30 fut aur aagay kee taraf 15 fut lamba tha. 4imaarat kee deevaaron men khidkiyaan theen jin par janglay lagay thay. 5imaarat say baahar a kar sulemaan nay daaen baaen kee deevaaron aur pichhlee deevaar kay saath ek dhaancha khada kiya jis kee teen manzilen theen aur jis men mukhtalif kamray thay. 6nichlee manzil kee androonee deevaar kee chaudaaee saadhay 7 fut thee, darmiyaanee manzil kee 9 fut aur oopar kee manzil kee saadhay 10 fut. yaanee darmiyaanee manzil kee imaarat vaalee deevaar nichlee kee deevaar kee nisbat kam motee aur oopar vaalee manzil kee imaarat vaalee deevaar darmiyaanee manzil kee deevaar kee nisbat kam motee thee. yoon is dhaanchay kee chhaton kay shaheteeron ko imaarat kee deevaar tod kar us men lagaanay kee zaroorat naheen thee balki unhen imaarat kee deevaar par hee rakha gaya.
7jo patthar rabb kay ghar kee taameer kay liyay istemaal huay unhen patthar kee kaan kay andar hee taraash kar tayyaar kiya gaya. is liyay jab unhen zer-ay-taameer imaarat kay paas la kar joda gaya to na hathaudon, na chhainee na lohay kay kisee aur auzaar kee aavaaz sunaaee dee.
8is dhaanchay men daakhil honay kay liyay imaarat kee dahenee deevaar men darvaaza banaaya gaya. vahaan say ek seedhee parastaar ko darmiyaanee aur oopar kee manzil tak pahunchaatee thee. 9yoon sulemaan nay imaarat ko takmeel tak pahunchaaya. chhat ko deodaar kay shaheteeron aur takhton say banaaya gaya. 10jo dhaancha imaarat kay teenon taraf khada kiya gaya usay deodaar kay shaheteeron say imaarat kee baahar vaalee deevaar kay saath joda gaya. us kee teenon manzilon kee oonchaaee saadhay saat saat fut thee.
11ek din rabb sulemaan say hamkalaam hua, 12“jahaan tak meree sukoonatgaah ka taalluq hai jo too meray liyay bana raha hai, agar too meray tamaam ahkaam aur hidaayaat kay mutaabiq zindagee guzaaray to main teray liyay vah kuchh karoonga jis ka vaada main nay teray baap daaood say kiya hai. 13tab main israaeel kay darmiyaan rahoonga aur apnee qaum ko kabhee tark naheen karoonga.”
rabb kay ghar ka androonee hissaa
14jab imaarat kee deevaaren aur chhat mukammal hueen 15to androonee deevaaron par farsh say lay kar chhat tak deodaar kay takhtay lagaaay gaay. farsh par jooneepar kay takhtay lagaaay gaay. 16ab tak imaarat ka ek hee kamra tha, lekin ab us nay deodaar kay takhton say farsh say lay kar chhat tak deevaar khadee karkay pichhlay hissay men alag kamra bana diya jis kee lambaaee 30 fut thee. yah muqaddastareen kamra ban gaya. 17jo hissa saamnay rah gaya usay muqaddas kamra muqarrar kiya gaya. us kee lambaaee 60 fut thee. 18imaarat kee tamaam androonee deevaaron par deodaar kay takhtay yoon lagay thay ki kaheen bhee patthar nazar na aaya. takhton par toombay aur phool kanda kiay gaay thay.
19pichhlay kamray men rabb kay ahd ka sandooq rakhna tha. 20is kamray kee lambaaee 30 fut, chaudaaee 30 fut aur oonchaaee 30 fut thee. sulemaan nay is kee tamaam deevaaron aur farsh par khaalis sona chadhaaya. muqaddastareen kamray kay saamnay deodaar kee qurbaangaah thee. us par bhee sona mandha gayaa 21balki imaarat kay saamnay vaalay kamray kee deevaaron, chhat aur farsh par bhee sona mandha gaya. muqaddastareen kamray kay darvaazay par sonay kee zanjeeren lagaaee gaeen. 22chunaanchay imaarat kee tamaam androonee deevaaron, chhat aur farsh par sona mandha gaya, aur isee tarah muqaddastareen kamray kay saamnay kee qurbaangaah par bhee.
23phir sulemaan nay zaitoon kee lakdee say do karoobee farishtay banvaaay jinhen muqaddastareen kamray men rakha gaya. in mujassamon ka qad 15 fut tha. 24-25 donon shakl-o-soorat men ek jaisay thay. har ek kay do par thay, aur har par kee lambaaee saadhay saat saat fut thee. chunaanchay ek par kay siray say doosray par kay siray tak ka faasila 15 fut tha. 26har ek ka qad 15 fut tha. 27unhen muqaddastareen kamray men yoon ek doosray kay saath khada kiya gaya ki har farishtay ka ek par doosray kay par say lagta jabki daaeen aur baaeen taraf har ek ka doosra par deevaar kay saath lagta tha. 28in farishton par bhee sona mandha gaya.
29muqaddas aur muqaddastareen kamron kee deevaaron par karoobee farishtay, khajoor kay darakht aur phool kanda kiay gaay. 30donon kamron kay farsh par bhee sona mandha gaya. 31sulemaan nay muqaddastareen kamray ka darvaaza zaitoon kee lakdee say banvaaya. us kay do kivaad thay, aur chaukhat kee lakdee kay paanch konay thay. 32darvaazay kay kivaadon par karoobee farishtay, khajoor kay darakht aur phool kanda kiay gaay. in kivaadon par bhee farishton aur khajoor kay darakhton samet sona mandha gaya. 33sulemaan nay imaarat men daakhil honay vaalay darvaazay kay liyay bhee zaitoon kee lakdee say chaukhat banvaaee, lekin us kee lakdee kay chaar konay thay. 34is darvaazay kay do kivaad jooneepar kee lakdee kay banay huay thay. donon kivaad deevaar tak ghoom saktay thay. 35in kivaadon par bhee karoobee farishtay, khajoor kay darakht aur phool kanda kiay gaay thay. phir un par sona yoon mandha gaya ki vah achchhee tarah in bel-booton kay saath lag gaya.
36imaarat kay saamnay ek androonee sahen banaaya gaya jis kee chaardeevaaree yoon taameer huee ki patthar kay har teen raddon kay baad deodaar kay shaheteeron ka ek radda lagaaya gaya.
37rabb kay ghar kee bunyaad sulemaan kee hukoomat kay chauthay saal kay doosray maheenay zeeb men daalee gaee, 38aur us kee hukoomat kay gyaaraven saal kay aathven maheenay bool men imaarat mukammal huee. sab kuchh naqshay kay ain mutaabiq bana. is kaam par kul saat saal sarf huay.