1 Salaateen 8
ahd ka sandooq rabb kay ghar men laaya jaata hai
1phir sulemaan nay israaeel kay tamaam buzurgon aur qabeelon aur kumbon kay tamaam sarparaston ko apnay paas yarooshalam men bulaaya, kyoonki rabb kay ahd ka sandooq ab tak yarooshalam kay us hissay men tha jo ‘daaood ka shaher’ ya siyyoon kahelaata hai. sulemaan chaahata tha ki qaum kay numaainday haazir hon jab sandooq ko vahaan say rabb kay ghar men pahunchaaya jaaay. 2chunaanchay israaeel kay tamaam mard saal kay saatven maheenay itaaneem [a] sitambar ta aktoobar men sulemaan baadshaah kay paas yarooshalam men jama huay. isee maheenay men jhompadiyon kee eed manaaee jaatee thee.
3jab sab jama huay to imaam rabb kay sandooq ko utha kar 4rabb kay ghar men laaay. laaviyon kay saath mil kar unhon nay mulaaqaat kay khaimay ko bhee us kay tamaam muqaddas saamaan samet rabb kay ghar men pahunchaaya. 5vahaan sandooq kay saamnay sulemaan baadshaah aur baaqee tamaam jama huay israaeeliyon nay itnee bhed-bakriyaan aur gaay-bail qurbaan kiay ki un kee taadaad ginee naheen ja saktee thee.
6imaamon nay rabb kay ahd ka sandooq pichhlay yaanee muqaddastareen kamray men la kar karoobee farishton kay paron kay neechay rakh diya. 7farishton kay par pooray sandooq par us kee uthaanay kee lakdiyon samet phailay rahay. 8to bhee uthaanay kee yah lakdiyaan itnee lambee theen ki un kay siray saamnay vaalay yaanee muqaddas kamray say nazar aatay thay. lekin vah baahar say dekhay naheen ja saktay thay. aaj tak vah vaheen maujood hain. 9sandooq men sirf patthar kee vah do takhtiyaan theen jin ko moosa nay horib yaanee koh-ay-seena kay daaman men us men rakh diya tha, us vaqt jab rabb nay misr say niklay huay israaeeliyon kay saath ahd baandha tha.
10-11 jab imaam muqaddas kamray say nikal kar sahen men aaay to rabb ka ghar ek baadal say bhar gaya. imaam apnee khidmat anjaam na day sakay, kyoonki rabb ka ghar us kay jalaal kay baadal say maamoor ho gaya tha. 12yah dekh kar sulemaan nay dua kee, “rabb nay farmaaya hai ki main ghanay baadal kay andheray men rahoonga. 13yaqeenan main nay teray liyay azeem sukoonatgaah banaaee hai, ek maqaam jo teree abdee sukoonat kay laaiq hai.”
rabb kay ghar kee makhsoosiyat par sulemaan kee taqreer
14phir baadshaah nay mud kar rabb kay ghar kay saamnay khadee israaeel kee pooree jamaaat kee taraf rukh kiya. us nay unhen barkat day kar kaha,
15“rabb israaeel kay khuda kee taareef ho jis nay vah vaada poora kiya hai jo us nay meray baap daaood say kiya tha. kyoonki us nay farmaaya, 16‘jis din main apnee qaum israaeel ko misr say nikaal laaya us din say lay kar aaj tak main nay kabhee na farmaaya ki israaeelee qabeelon kay kisee shaher men meray naam kee taazeem men ghar banaaya jaaay. lekin main nay daaood ko apnee qaum israaeel ka baadshaah banaaya hai.’
17meray baap daaood kee badee khwaahish thee ki rabb israaeel kay khuda kay naam kee taazeem men ghar banaaay. 18lekin rabb nay etiraaz kiya, ‘main khush hoon ki too meray naam kee taazeem men ghar taameer karna chaahata hai, 19lekin too naheen balki tera beta hee usay banaaega.’
20aur vaaqaee, rabb nay apna vaada poora kiya hai. main rabb kay vaaday kay ain mutaabiq apnay baap daaood kee jagah israaeel ka baadshaah ban kar takht par baith gaya hoon. aur ab main nay rabb israaeel kay khuda kay naam kee taazeem men ghar bhee banaaya hai. 21us men main nay us sandooq kay liyay maqaam tayyaar kar rakha hai jis men shareeat kee takhtiyaan padee hain, us ahd kee takhtiyaan jo rabb nay hamaaray baapdaada say misr say nikaaltay vaqt baandha tha.”
rabb kay ghar kee makhsoosiyat par sulemaan kee duaa
22phir sulemaan israaeel kee pooree jamaaat kay dekhtay dekhtay rabb kee qurbaangaah kay saamnay khada hua. us nay apnay haath aasmaan kee taraf utha kar 23dua kee,
“ai rabb israaeel kay khuda, tujh jaisa koee khuda naheen hai, na aasmaan aur na zameen par. too apna vah ahd qaaim rakhta hai jisay too nay apnee qaum kay saath baandha hai aur apnee meharbaanee un sab par zaahir karta hai jo pooray dil say teree raah par chaltay hain. 24too nay apnay khaadim daaood say kiya hua vaada poora kiya hai. jo baat too nay apnay munh say meray baap say kee vah too nay apnay haath say aaj hee pooree kee hai. 25ai rabb israaeel kay khuda, ab apnee doosree baat bhee pooree kar jo too nay apnay khaadim daaood say kee thee. kyoonki too nay meray baap say vaada kiya tha, ‘agar teree aulaad teree tarah apnay chaal-chalan par dhyaan day kar meray huzoor chaltee rahay to israaeel par us kee hukoomat hamesha tak qaaim rahegee.’ 26ai israaeel kay khuda, ab baraah-ay-karam apna yah vaada poora kar jo too nay apnay khaadim meray baap daaood say kiya hai.
27lekin kya allaah vaaqaee zameen par sukoonat karega? naheen, too to bulandtareen aasmaan men bhee sama naheen sakta! to phir yah makaan jo main nay banaaya hai kis tarah teree sukoonatgaah ban sakta hai? 28ai rabb meray khuda, to bhee apnay khaadim kee dua aur iltija sun jab main aaj teray huzoor pukaartay huay iltimaas karta hoon 29ki baraah-ay-karam din raat is imaarat kee nigraanee kar! kyoonki yah vah jagah hai jis kay baaray men too nay khud farmaaya, ‘yahaan mera naam sukoonat karega.’ chunaanchay apnay khaadim kee guzaarish sun jo main is maqaam kee taraf rukh kiay huay karta hoon. 30jab ham is maqaam kee taraf rukh karkay dua karen to apnay khaadim aur apnee qaum kee iltija sun. aasmaan par apnay takht say hamaaree sun. aur jab sunega to hamaaray gunaahon ko muaaf kar!
31agar kisee par ilzaam lagaaya jaaay aur usay yahaan teree qurbaangaah kay saamnay laaya jaaay taaki halaf utha kar vaada karay ki main bequsoor hoon 32to baraah-ay-karam aasmaan par say sun kar apnay khaadimon ka insaaf kar. qusoorvaar ko mujrim thahera kar us kay apnay sar par vah kuchh aanay day jo us say sarzad hua hai, aur bequsoor ko beilzaam qaraar day kar us kee raastbaazee ka badla day.
33ho sakta hai kisee vaqt teree qaum israaeel tera gunaah karay aur nateejay men dushman kay saamnay shikast khaaay. agar israaeelee aakhirkaar teray paas laut aaen aur teray naam kee tamjeed karkay yahaan is ghar men tujh say dua aur iltimaas karen 34to aasmaan par say un kee faryaad sun lena. apnee qaum israaeel ka gunaah muaaf karkay unhen dubaara us mulk men vaapas laana jo too nay un kay baapdaada ko day diya tha.
35ho sakta hai israaeelee tera itna sangeen gunaah karen ki kaal paday aur badee der tak baarish na barsay. agar vah aakhirkaar is ghar kee taraf rukh karkay teray naam kee tamjeed karen aur teree saza kay baais apna gunaah chhod kar laut aaen 36to aasmaan par say un kee faryaad sun lena. apnay khaadimon aur apnee qaum israaeel ko muaaf kar, kyoonki too hee unhen achchhee raah kee taaleem deta hai. tab us mulk par dubaara baarish barsa day jo too nay apnee qaum ko meeraas men day diya hai.
37ho sakta hai israaeel men kaal pad jaaay, anaaj kee fasal kisee beemaaree, phaphoondee, tiddiyon ya keedon say mut’assir ho jaaay, ya dushman kisee shaher ka muhaasara karay. jo bhee museebat ya beemaaree ho, 38agar koee israaeelee ya teree pooree qaum us ka sabab jaan kar apnay haathon ko is ghar kee taraf badhaaay aur tujh say iltimaas kare 39to aasmaan par apnay takht say un kee faryaad sun lena. unhen muaaf karkay vah kuchh kar jo zarooree hai. har ek ko us kee tamaam harkaton ka badla day, kyoonki sirf too hee har insaan kay dil ko jaanta hai. 40phir jitnee der vah us mulk men zindagee guzaarengay jo too nay hamaaray baapdaada ko diya tha utnee der vah tera khauf maanengay.
41aainda pardesee bhee teray naam kay sabab say doordaraaz mamaalik say aaengay. agarchi vah teree qaum israaeel kay naheen honge 42to bhee vah teray azeem naam, teree badee qudrat aur teray zabardast kaamon kay baaray men sun kar aaengay aur is ghar kee taraf rukh karkay dua karengay. 43tab aasmaan par say un kee faryaad sun lena. jo bhee darakhwaast vah pesh karen vah pooree karna taaki duniya kee tamaam aqvaam tera naam jaan kar teree qaum israaeel kee tarah hee tera khauf maanen aur jaan len ki jo imaarat main nay taameer kee hai us par teray hee naam ka thappa laga hai.
44ho sakta hai teree qaum kay mard teree hidaayat kay mutaabiq apnay dushman say ladnay kay liyay niklen. agar vah teray chunay huay shaher aur us imaarat kee taraf rukh karkay dua karen jo main nay teray naam kay liyay taameer kee hai 45to aasmaan par say un kee dua aur iltimaas sun kar un kay haq men insaaf qaaim rakhna.
46ho sakta hai vah tera gunaah karen, aisee harkaten to ham sab say sarzad hotee rahetee hain, aur nateejay men too naaraaz ho kar unhen dushman kay havaalay kar day jo unhen qaid karkay apnay kisee doordaraaz ya qareebee mulk men lay jaaay. 47shaayad vah jilaavatanee men tauba karkay dubaara teree taraf rujoo karen aur tujh say iltimaas karen, ‘ham nay gunaah kiya hai, ham say ghaltee huee hai, ham nay bedeen harkaten kee hain.’ 48agar vah aisa karkay dushman kay mulk men apnay pooray dil-o-jaan say dubaara teree taraf rujoo karen aur teree taraf say baapdaada ko diay gaay mulk, teray chunay huay shaher aur us imaarat kee taraf rukh karkay dua karen jo main nay teray naam kay liyay taameer kee hai 49to aasmaan par apnay takht say un kee dua aur iltimaas sun lena. un kay haq men insaaf qaaim karna, 50aur apnee qaum kay gunaahon ko muaaf kar dena. jis bhee jurm say unhon nay tera gunaah kiya hai vah muaaf kar dena. bakhsh day ki unhen giriftaar karnay vaalay un par rahem karen. 51kyoonki yah teree hee qaum kay afraad hain, teree hee meeraas jisay too misr kay bhadaktay bhattay say nikaal laaya.
52ai allaah, teree aankhen meree iltijaaon aur teree qaum israaeel kee faryaadon kay liyay khulee rahen. jab bhee vah madad kay liyay tujhay pukaaren to un kee sun lena! 53kyoonki too, ai rabb qaadir-ay-mutlaq nay israaeel ko duniya kee tamaam qaumon say alag karkay apnee khaas milkiyat bana liya hai. hamaaray baapdaada ko misr say nikaaltay vaqt too nay moosa kee maarifat is haqeeqat ka elaan kiya.”
aakhiree dua aur barkat
54is dua kay baad sulemaan khada hua, kyoonki dua kay dauraan us nay rabb kee qurbaangaah kay saamnay apnay ghutnay tekay aur apnay haath aasmaan kee taraf uthaaay huay thay. 55ab vah israaeel kee pooree jamaaat kay saamnay khada hua aur buland aavaaz say usay barkat dee,
56“rabb kee tamjeed ho jis nay apnay vaaday kay ain mutaabiq apnee qaum israaeel ko aaraam-o-sukoon faraaham kiya hai. jitnay bhee khoobsoorat vaaday us nay apnay khaadim moosa kee maarifat kiay hain vah sab kay sab pooray ho gaay hain. 57jis tarah rabb hamaara khuda hamaaray baapdaada kay saath tha usee tarah vah hamaaray saath bhee rahay. na vah hamen chhoday, na tark kare 58balki hamaaray dilon ko apnee taraf maail karay taaki ham us kee tamaam raahon par chalen aur un tamaam ahkaam aur hidaayaat kay taabay rahen jo us nay hamaaray baapdaada ko dee hain.
59rabb kay huzoor meree yah faryaad din raat rabb hamaaray khuda kay qareeb rahay taaki vah mera aur apnee qaum ka insaaf qaaim rakhay aur hamaaree rozaana zarooriyaat pooree karay. 60tab tamaam aqvaam jaan lengee ki rabb hee khuda hai aur ki us kay siva koee aur maabood naheen hai.
61lekin laazim hai ki aap rabb hamaaray khuda kay pooray dil say vafaadaar rahen. hamesha us kee hidaayaat aur ahkaam kay mutaabiq zindagee guzaaren, bilkul usee tarah jis tarah aap aaj kar rahay hain.”
rabb kay ghar kee makhsoosiyat par jashn
62-63 phir baadshaah aur tamaam israaeel nay rabb kay huzoor qurbaaniyaan pesh karkay rabb kay ghar ko makhsoos kiya. is silsilay men sulemaan nay 22,000 gaay-bailon aur 1,20,000 bhed-bakriyon ko salaamatee kee qurbaaniyon kay taur par zabah kiya. 64usee din baadshaah nay sahen ka darmiyaanee hissa qurbaaniyaan chadhaanay kay liyay makhsoos kiya. vajah yah thee ki peetal kee qurbaangaah itnee qurbaaniyaan pesh karnay kay liyay chhotee thee, kyoonki bhasm honay vaalee qurbaaniyon aur ghalla kee nazron kee taadaad bahut ziyaada thee. is kay ilaava salaamatee kee beshumaar qurbaaniyon kee charbee ko bhee jalaana tha.
65eed 14 din tak manaaee gaee. pahelay haftay men sulemaan aur tamaam israaeel nay rabb kay ghar kee makhsoosiyat manaaee aur doosray haftay men jhompadiyon kee eed. bahut ziyaada log shareek huay. vah doordaraaz ilaaqon say yarooshalam aaay thay, shimaal men labo-hamaat say lay kar junoob men us vaadee tak jo misr kee sarhadd thee. 66do hafton kay baad sulemaan nay israaeeliyon ko rukhsat kiya. baadshaah ko barkat day kar vah apnay apnay ghar chalay gaay. sab shaadmaan aur dil say khush thay ki rabb nay apnay khaadim daaood aur apnee qaum israaeel par itnee meharbaanee kee hai.