1 Salaateen 9

rabb sulemaan say hamkalaam hota hai

¹chunaanchay sulemaan nay rabb kay ghar aur shaahee mahel ko takmeel tak pahunchaaya. jo kuchh bhee us nay thaan liya tha vah poora hua. ²us vaqt rabb dubaara us par zaahir hua, us tarah jis tarah vah jibaoon men us par zaahir hua tha. ³us nay sulemaan say kaha,

“jo dua aur iltija too nay meray huzoor kee usay main nay sun kar is imaarat ko jo too nay banaaee hai apnay liyay makhsoos-o-muqaddas kar liya hai. us men main apna naam abad tak qaaim rakhoonga. meree aankhen aur dil abad tak vahaan haazir rahengay. ⁴jahaan tak tera taalluq hai, apnay baap daaood kee tarah diyaanatdaaree aur raastee say meray huzoor chalta rah. kyoonki agar too meray tamaam ahkaam aur hidaayaat kee pairvee karta rahe ⁵to main teree israaeel par hukoomat hamesha tak qaaim rakhoonga. phir mera vah vaada qaaim rahega jo main nay teray baap daaood say kiya tha ki israaeel par teree aulaad kee hukoomat hamesha tak qaaim rahegee.

⁶lekin khabardaar! agar too ya teree aulaad mujh say door ho kar meray diay gaay ahkaam aur hidaayaat kay taabay na rahay balki deegar maaboodon kee taraf rujoo karkay un kee khidmat aur parastish kare ⁷to main israaeel ko us mulk men say mita doonga jo main nay un ko day diya tha. na sirf yah balki main is ghar ko bhee radd kar doonga jo main nay apnay naam kay liyay makhsoos-o-muqaddas kar liya hai. us vaqt israaeel tamaam aqvaam men mazaaq aur laan-taan ka nishaana ban jaaega. ⁸is shaandaar ghar kee buree haalat dekh kar yahaan say guzarnay vaalay tamaam logon kay rongtay khaday ho jaaengay, aur vah apnee hiqaarat ka izhaar karkay poochhengay, ‘rabb nay is mulk aur is ghar say aisa sulook kyoon kiya?’ ⁹tab log javaab dengay, ‘is liyay ki go rabb un ka khuda un kay baapdaada ko misr say nikaal kar yahaan laaya to bhee yah log usay tark karkay deegar maaboodon say chimat gaay hain. choonki vah un kee parastish aur khidmat karnay say baaz na aaay is liyay rabb nay unhen is saaree museebat men daal diya hai’.”

heeraam kee madad ka silaa

¹⁰rabb kay ghar aur shaahee mahel ko taameer karnay men 20 saal sarf huay thay. ¹¹us dauraan soor ka baadshaah heeraam sulemaan ko deodaar aur jooneepar kee utnee lakdee aur utna sona bhejta raha jitna sulemaan chaahata tha. jab imaaraten takmeel tak pahunch gaeen to sulemaan nay heeraam ko muaavazay men galeel kay 20 shaher day diay. ¹²lekin jab heeraam un ka muaaina karnay kay liyay soor say galeel aaya to vah usay pasand na aaay. ¹³us nay savaal kiya, “meray bhaaee, yah kaisay shaher hain jo aap nay mujhay diay hain?” aur us nay us ilaaqay ka naam kaabool yaanee ‘kuchh bhee naheen’ rakha. yah naam aaj tak raaij hai. ¹⁴baat yah thee ki heeraam nay israaeel kay baadshaah ko taqreeban 4,000 kilograam sona bheja tha.

sulemaan kee mukhtalif muhimmaat

¹⁵sulemaan nay apnay taameeree kaam kay liyay begaaree lagaaay. aisay hee logon kee madad say us nay na sirf rabb ka ghar, apna mahel, ird-gird kay chabootray aur yarooshalam kee faseel banvaaee balki teenon shaher hasoor, majiddo aur jazar ko bhee.

¹⁶jazar shaher par misr kay baadshaah firaaun nay hamla karkay qabza kar liya tha. us kay kan’aanee baashindon ko qatl karkay us nay pooray shaher ko jala diya tha. jab sulemaan kee firaaun kee betee say shaadee huee to misree baadshaah nay jahez kay taur par usay yah ilaaqa day diya. ¹⁷ab sulemaan nay jazar ka shaher dubaara taameer kiya. is kay ilaava us nay nishebee bait-hauroon, ¹⁸baalaat aur registaan kay shaher tadmoor men bahut sa taameeree kaam karaaya.

¹⁹sulemaan nay apnay godaamon kay liyay aur apnay rathon aur ghodon ko rakhnay kay liyay bhee shaher banvaaay. jo kuchh bhee vah yarooshalam, lubnaan ya apnee saltanat kee kisee aur jagah banvaana chaahata tha vah us nay banvaaya.

^20-21 jin aadmiyon kee sulemaan nay begaar par bhartee kee vah israaeelee naheen thay balki amoree, hittee, farizzee, hivvee aur yaboosee yaanee kan’aan kay pahelay baashindon kee vah aulaad thay jo baaqee rah gaay thay. mulk par qabza kartay vaqt israaeelee in qaumon ko pooray taur par mita na sakay, aur aaj tak in kee aulaad ko israaeel kay liyay begaar men kaam karna padta hai. ²²lekin sulemaan nay israaeeliyon men say kisee ko bhee aisay kaam karnay par majboor na kiya balki vah us kay faujee, sarkaaree afsar, fauj kay afsar aur rathon kay faujee ban gaay, aur unhen us kay rathon aur ghodon par muqarrar kiya gaya. ²³sulemaan kay taameeree kaam par bhee 550 israaeelee muqarrar thay jo zilaon par muqarrar afsaron kay taabay thay. yah log taameeree kaam karnay vaalon kee nigraanee kartay thay.

²⁴jab firaaun kee betee yarooshalam kay puraanay hissay banaam ‘daaood ka shaher’ say us mahel men muntaqil huee jo sulemaan nay us kay liyay taameer kiya tha to vah ird-gird kay chabootray banvaanay laga. ²⁵sulemaan saal men teen baar rabb ko bhasm honay vaalee aur salaamatee kee qurbaaniyaan pesh karta tha. vah unhen rabb kay ghar kee us qurbaangaah par chadhaata tha jo us nay rabb kay liyay banvaaee thee. saath saath vah bakhoor bhee jalaata tha. yoon us nay rabb kay ghar ko takmeel tak pahunchaaya.

²⁶is kay ilaava sulemaan baadshaah nay baheree jahaazon ka beda bhee banvaaya. is kaam ka markaz ailaat kay qareeb shaher asyoon-jaabar tha. yah bandargaah mulk-ay-adom men baher-ay-qulzum kay saahil par hai. ²⁷heeraam baadshaah nay usay tajaribaakaar mallaah bhejay taaki vah sulemaan kay aadmiyon kay saath mil kar jahaazon ko chalaaen. ²⁸unhon nay ofeer tak safar kiya aur vahaan say taqreeban 14,000 kilograam sona sulemaan kay paas lay aaay.