1 Samooel 17
jaatee jaaloot
1ek din filistiyon nay apnee fauj ko yahoodaah kay shaher soka kay qareeb jama kiya. vah ifas-dammeem men khaimaazan huay jo soka aur azeeqa kay darmiyaan hai. 2javaab men saaool nay apnee fauj ko bula kar vaadee-ay-aila men jama kiya. vahaan israaeel kay mard jang kay liyay tarteeb say khaday huay. 3yoon filistee ek pahaadee par khaday thay aur israaeelee doosree pahaadee par. un kay beech men vaadee thee.
4phir filistee safon say jaat shaher ka pahelavaan nikal kar israaeeliyon kay saamnay khada hua. us ka naam jaaloot tha aur vah 9 fut say ziyaada lamba tha. 5us nay hifaazat kay liyay peetal kee kaee cheezen pahen rakhee theen : sar par khod, dhad par ziraabaktar jo 57 kilograam vaznee thaa 6aur pindaliyon par baktar. kandhon par peetal kee shamsheer latkee huee thee. 7jo neza vah pakad kar chal raha tha us ka dasta khaddee kay shaheteer jaisa mota aur lamba tha, aur us kay lohay kee nok ka vazan 7 kilograam say ziyaada tha. jaaloot kay aagay aagay ek aadmee us kee dhaal uthaaay chal raha tha.
8jaaloot israaeelee safon kay saamnay ruk kar garja, “tum sab kyoon ladnay kay liyay saf’aara ho gaay ho? kya main filistee naheen hoon jabki tum sirf saaool kay naukar-chaakar ho? chalo, ek aadmee ko chun kar usay yahaan neechay meray paas bhej do. 9agar vah mujh say lad sakay aur mujhay maar day to ham tumhaaray ghulaam ban jaaengay. lekin agar main us par ghaalib a kar usay maar daaloon to tum hamaaray ghulaam ban jaaogay. 10aaj main israaeelee safon kee badnaamee karkay unhen chailenj karta hoon ki mujhay ek aadmee do jo meray saath laday.” 11jaaloot kee yah baaten sun kar saaool aur tamaam israaeelee ghabra gaay, aur un par dahshat taaree ho gaee.
daaood bhaaiyon say milnay kay liyay fauj kay paas jaata hai
12us vaqt daaood ka baap yassee kaafee boodha ho chuka tha. us kay kul 8 betay thay, aur vah ifraata kay ilaaqay kay bait-lahem men raheta tha. 13lekin us kay teen sab say baday betay filistiyon say ladnay kay liyay saaool kee fauj men bhartee ho gaay thay. sab say baday ka naam iliyaab, doosray ka abeendaab aur teesray ka samma tha. 14-15 daaood to sab say chhota bhaaee tha. vah doosron kee tarah poora vaqt saaool kay paas na guzaar saka, kyoonki usay baap kee bhed-bakriyon ko sambhaalnay kee zimmaadaaree dee gaee thee. is liyay vah aata jaata raha. chunaanchay vah maujood naheen thaa 16jab jaaloot 40 din subah-o-shaam israaeeliyon kee safon kay saamnay khaday ho kar unhen chailenj karta raha.
17ek din yassee nay daaood say kaha, “beta, apnay bhaaiyon kay paas kaimp men ja kar un ka pata karo. bhunay huay anaaj kay yah 16 kilograam aur yah das rotiyaan apnay saath lay kar jaldee jaldee udhar pahunch jaao. 18paneer kee yah das tikkiyaan un kay kaptaan ko day dena. bhaaiyon ka haal maaloom karkay un kee koee cheez vaapas lay aao taaki mujhay tasallee ho jaaay ki vah theek hain. 19vah vaadee-ay-aila men saaool aur israaeelee fauj kay saath filistiyon say lad rahay hain.” 20aglay din subah-saveray daaood nay revad ko kisee aur kay sapurd karkay saamaan uthaaya aur yassee kee hidaayat kay mutaabiq chala gaya. jab vah kaimp kay paas pahunch gaya to israaeelee faujee naaray laga laga kar maidaan-ay-jang kay liyay nikal rahay thay. 21vah ladnay kay liyay tarteeb say khaday ho gaay, aur doosree taraf filistee safen bhee tayyaar hueen. 22yah dekh kar daaood nay apnee cheezen us aadmee kay paas chhod deen jo lashkar kay saamaan kee nigraanee kar raha tha, phir bhaag kar maidaan-ay-jang men bhaaiyon say milnay chala gaya.
vah abhee un ka haal poochh hee raha thaa 23ki jaatee jaaloot maamool kay mutaabiq filistiyon kee safon say nikal kar israaeeliyon kay saamnay vahee tanz kee baaten baknay laga. daaood nay bhee us kee baaten suneen. 24jaaloot ko dekhtay hee israaeeliyon kay rongtay khaday ho gaay, aur vah bhaag kar 25aapas men kahenay lagay, “kya aap nay is aadmee ko hamaaree taraf badhtay huay dekha? sunen ki vah kis tarah hamaaree badnaamee karkay hamen chailenj kar raha hai. baadshaah nay elaan kiya hai ki jo shakhs isay maar day usay bada ajr milega. shahzaadee say us kee shaadee hogee, aur aainda us kay paap kay khaandaan ko taiks naheen dena padega.”
26daaood nay saath vaalay faujiyon say poochha, “kya kah rahay hain? us aadmee ko kya in’aam milega jo is filistee ko maar kar hamaaree qaum kee rusvaaee door karega? yah naamakhtoon filistee kaun hai ki zinda khuda kee fauj kee badnaamee karkay usay chailenj karay!” 27logon nay dubaara daaood ko bataaya ki baadshaah us aadmee ko kya dega jo jaaloot ko maar daalega.
28jab daaood kay baday bhaaee iliyaab nay daaood kee baaten suneen to usay ghussa aaya aur vah usay jhidaknay laga, “too kyoon aaya hai? biyaabaan men apnee chand ek bhed-bakriyon ko kis kay paas chhod aaya hai? main teree shokhee aur dil kee sharaarat khoob jaanta hoon. too sirf jang ka tamaasha dekhnay aaya hai!” 29daaood nay poochha, “ab mujh say kya ghaltee huee? main nay to sirf savaal poochha.” 30vah us say mud kar kisee aur kay paas gaya aur vahee baat poochhnay laga. vahee javaab mila.
hathiyaar ka chunaao
31daaood kee yah baaten sun kar kisee nay saaool ko ittila dee. saaool nay usay fauran bulaaya. 32daaood nay baadshaah say kaha, “kisee ko is filistee kee vajah say himmat naheen haarna chaahiay. main us say ladoonga.” 33saaool bola, “aap? aap jaisa ladka kis tarah us ka muqaabla kar sakta hai? aap to abhee bachchay say ho jabki vah tajaribaakaar jangjoo hai jo javaanee say hathiyaar istemaal karta aaya hai.”
34lekin daaood nay israar kiya, “main apnay baap kee bhed-bakriyon kee nigraanee karta hoon. jab kabhee koee sherbabar ya reechh revad ka jaanvar chheen kar bhaag jaataa 35to main us kay peechhay jaata aur usay maar maar kar bhed ko us kay munh say chhuda leta tha. agar sher ya reechh javaab men mujh par hamla karta to main us kay sar kay baalon ko pakad kar usay maar deta tha. 36is tarah aap kay khaadim nay kaee sheron aur reechhon ko maar daala hai. yah naamakhtoon bhee un kee tarah halaak ho jaaega, kyoonki us nay zinda khuda kee fauj kee badnaamee karkay usay chailenj kiya hai. 37jis rabb nay mujhay sher aur reechh kay panjay say bacha liya hai vah mujhay is filistee kay haath say bhee bachaaega.”
saaool bola, “theek hai, jaaen aur rabb aap kay saath ho.” 38us nay daaood ko apna ziraabaktar aur peetal ka khod pahenaaya. 39phir daaood nay saaool kee talvaar baandh kar chalnay kee koshish kee. lekin usay bahut mushkil lag raha tha. us nay saaool say kaha, “main yah cheezen pahen kar naheen lad sakta, kyoonki main in ka aadee naheen hoon.” unhen utaar kar 40us nay nadee say paanch chiknay chiknay patthar chun kar unhen apnee charvaahay kee thailee men daal liya. phir charvaahay kee apnee laathee aur falaakhan pakad kar vah deo say ladnay kay liyay israaeelee safon say nikla.
daaood kee fatah
41jaaloot daaood kee jaanib badha. dhaal ko uthaanay vaala us kay aagay aagay chal raha tha. 42us nay hiqaarat’aamez nazron say daaood ka jaaiza liya, kyoonki vah gora aur khoobsoorat naujavaan tha. 43vah garja, “kya main kutta hoon ki too laathee lay kar mera muqaabla karnay aaya hai?” apnay devtaaon kay naam lay kar vah daaood par laanat bhej kar 44chillaaya, “idhar a taaki main tera gosht parindon aur janglee jaanvaron ko khilaaoon.”
45daaood nay javaab diya, “aap talvaar, neza aur shamsheer lay kar mera muqaabla karnay aaay hain, lekin main rabb-ul-afwaaj ka naam lay kar aata hoon, usee ka naam jo israaeelee fauj ka khuda hai. kyoonki aap nay usee ko chailenj kiya hai. 46aaj hee rabb aap ko meray haath men kar dega, aur main aap ka sar qalam kar doonga. isee din main filistee faujiyon kee laashen parindon aur janglee jaanvaron ko khila doonga. tab tamaam duniya jaan legee ki israaeel ka khuda hai. 47sab jo yahaan maujood hain pahechaan lengay ki rabb ko hamen bachaanay kay liyay talvaar ya nezay kee zaroorat naheen hotee. vah khud hee jang kar raha hai, aur vahee aap ko hamaaray qabzay men kar dega.”
48jaaloot daaood par hamla karnay kay liyay aagay badha, aur daaood bhee us kee taraf dauda. 49chaltay chaltay us nay apnee thailee say patthar nikaala aur usay falaakhan men rakh kar zor say chalaaya. patthar udta udta deo kay maathay par ja laga. vah khopdee men dhans gaya, aur deo munh kay bal gir gaya. 50-51 yoon daaood falaakhan aur patthar say filistee deo par ghaalib aaya. tab us nay jaaloot kee taraf daud kar usee kee talvaar miyaan say khainch kar deo ka sar kaat daala.
jab filistiyon nay dekha ki hamaara pahelavaan halaak ho gaya hai to vah bhaag niklay. 52israaeel aur yahoodaah kay mard fatah kay naaray laga laga kar filistiyon par toot paday. un ka taaqqub kartay kartay vah jaat aur aqroon kay darvaazon tak pahunch gaay. jo raasta shaaraim say jaat aur aqroon tak jaata hai us par har taraf filistiyon kee laashen nazar aaeen. 53phir israaeeliyon nay vaapas a kar filistiyon kee chhodee huee lashkargaah ko loot liya.
54baad men daaood jaaloot ka sar yarooshalam ko lay aaya. deo kay hathiyaar us nay apnay khaimay men rakh liyay.
saaool daaood kay khaandaan ka pata karta hai
55jab daaood jaaloot say ladnay gaya to saaool nay fauj kay kamaandar abinair say poochha, “is javaan aadmee ka baap kaun hai?” abinair nay javaab diya, “aap kee hayaat kee qasam, mujhay maaloom naheen.” 56baadshaah bola, “phir pata karen!” 57jab daaood deo ka sar qalam karkay vaapas aaya to abinair usay baadshaah kay paas laaya. daaood abhee jaaloot ka sar uthaaay phir raha tha. 58saaool nay poochha, “aap ka baap kaun hai?” daaood nay javaab diya, “main bait-lahem kay rahenay vaalay aap kay khaadim yassee ka beta hoon.”