1 Samooel 18
daaood aur yoontan kee dostee
1is guftagu kay baad daaood kee mulaaqaat baadshaah kay betay yoontan say huee. un men fauran gaheree dostee paida ho gaee, aur yoontan daaood ko apnee jaan kay baraabar azeez rakhnay laga. 2us din say saaool nay daaood ko apnay darbaar men rakh liya aur usay baap kay ghar vaapas jaanay na diya. 3aur yoontan nay daaood say ahd baandha, kyoonki vah daaood ko apnee jaan kay baraabar azeez rakhta tha. 4ahd kee tasdeeq kay liyay yoontan nay apna chogha utaar kar usay apnay ziraabaktar, talvaar, kamaan aur petee samet daaood ko day diya.
5jahaan bhee saaool nay daaood ko ladnay kay liyay bheja vahaan vah kaamyaab hua. yah dekh kar saaool nay usay fauj ka bada afsar bana diya. yah baat avaam aur saaool kay afsaron ko pasand aaee.
saaool daaood say hasad karta hai
6jab daaood filistiyon ko shikast denay say vaapas aaya to tamaam shaheron say aurten nikal kar saaool baadshaah say milnay aaeen. daf aur saaz bajaatay huay vah khushee kay geet ga ga kar naachnay lageen. 7aur naachtay naachtay vah gaatee raheen, “saaool nay to hazaar halaak kiay jabki daaood nay das hazaar.”
8saaool baday ghussay men a gaya, kyoonki aurton ka geet usay nihaayat bura laga. us nay socha, “un kee nazar men daaood nay das hazaar halaak kiay jabki main nay sirf hazaar. ab sirf yah baat rah gaee hai ki usay baadshaah muqarrar kiya jaaay.” 9us vaqt say saaool daaood ko shak kee nazar say dekhnay laga. 10-11 aglay din allaah nay dubaara saaool par buree rooh aanay dee, aur vah ghar kay andar vajd kee haalat men a gaya. daaood maamool kay mutaabiq saaz bajaanay laga taaki baadshaah ko sukoon milay. saaool kay haath men neza tha. achaanak us nay usay phaink kar daaood ko deevaar kay saath chhed daalnay kee koshish kee. lekin daaood ek taraf hat kar bach nikla. ek aur dafa aisa hua, lekin daaood phir bach gaya.
12yah dekh kar saaool daaood say darnay laga, kyoonki us nay jaan liya ki rabb mujhay chhod kar daaood ka haamee ban gaya hai. 13aakhirkaar us nay daaood ko darbaar say door karkay hazaar faujiyon par muqarrar kar diya. in aadmiyon kay saath daaood mukhtalif jangon kay liyay nikalta raha. 14aur jo kuchh bhee vah karta us men kaamyaab raheta, kyoonki rabb us kay saath tha. 15jab saaool nay dekha ki daaood ko kitnee ziyaada kaamyaabee huee hai to vah us say mazeed dar gaya. 16lekin israaeel aur yahoodaah kay baaqee log daaood say bahut muhabbat rakhtay thay, kyoonki vah har jang men nikaltay vaqt say lay kar ghar vaapas aatay vaqt tak un kay aagay aagay chalta tha.
daaood saaool ka daamaad ban jaata hai
17ek din saaool nay daaood say baat kee, “main apnee badee betee meerab ka rishta aap kay saath baandhna chaahata hoon. lekin pahelay saabit karen ki aap achchhay faujee hain, jo rabb kee jangon men khoob hissa lay.” lekin dil hee dil men saaool nay socha, “khud to main daaood par haath naheen uthaaoonga, behatar hai ki vah filistiyon kay haathon maara jaaay.” 18lekin daaood nay etiraaz kiya, “main kaun hoon ki baadshaah ka daamaad banoon? israaeel men to meray khaandaan aur aabaaee kumbay kee koee haisiyat naheen.”
19to bhee shaadee kee tayyaariyaan kee gaeen. lekin jab muqarrara vaqt a gaya to saaool nay meerab kee shaadee ek aur aadmee banaam adreeel mahoolaatee say karva dee.
20itnay men saaool kee chhotee betee meekal daaood say muhabbat karnay lagee. jab saaool ko is kee khabar milee to vah khush hua. 21us nay socha, “ab main betee ka rishta us kay saath baandh kar usay yoon phansa doonga ki vah filistiyon say ladtay ladtay mar jaaega.” daaood say us nay kaha, “aaj aap ko mera daamaad bannay ka dubaara mauqa milega.”
22phir us nay apnay mulaazimon ko hukm diya ki vah chupkay say daaood ko bataaen, “sunen, aap baadshaah ko pasand hain, aur us kay tamaam afsar bhee aap ko piyaar kartay hain. aap zaroor baadshaah kee peshkash qabool karkay us ka daamaad ban jaaen.” 23lekin daaood nay etiraaz kiya, “kya aap kee daanist men baadshaah ka daamaad banna chhotee see baat hai? main to ghareeb aadmee hoon, aur meree koee haisiyat naheen.”
24mulaazimon nay baadshaah kay paas vaapas ja kar usay daaood kay alfaaz bataaay. 25saaool nay unhen phir daaood kay paas bhej kar usay ittila dee, “baadshaah maher kay liyay paisay naheen maangta balki yah ki aap un kay dushmanon say badla lay kar 100 filistiyon ko qatl kar den. saboot kay taur par aap ko un ka khatna karkay jild ka kata hua hissa baadshaah kay paas laana padega.” shart ka maqsad yah tha ki daaood filistiyon kay haathon maara jaaay.
26jab daaood ko yah khabar milee to usay saaool kee peshkash pasand aaee. muqarrara vaqt say pahele 27us nay apnay aadmiyon kay saath nikal kar 200 filistiyon ko maar diya. laashon ka khatna karkay vah jild kay kul 200 tukday baadshaah kay paas laaya taaki baadshaah ka daamaad banay. yah dekh kar saaool nay us kee shaadee meekal say karva dee.
28saaool ko maanna pada ki rabb daaood kay saath hai aur ki meree betee meekal usay bahut piyaar kartee hai. 29tab vah daaood say aur bhee darnay laga. is kay baad vah jeetay jee daaood ka dushman bana raha. 30un dinon men filistee sardaar israaeel say ladtay rahay. lekin jab bhee vah jang kay liyay niklay to daaood saaool kay baaqee afsaron kee nisbat ziyaada kaamyaab hota tha. nateejay men us kee shuharat pooray mulk men phail gaee.