1 Samooel 19
yoontan daaood kee sifaarish karta hai
1ab saaool nay apnay betay yoontan aur tamaam mulaazimon ko saaf bataaya ki daaood ko halaak karna hai. lekin daaood yoontan ko bahut piyaara tha, 2is liyay us nay usay aagaah kiya, “mera baap aap ko maar denay kay mavaaqay dhoond raha hai. kal subah khabardaar rahen. kaheen chhup kar mera intizaar karen. 3phir main apnay baap kay saath shaher say nikal kar aap kay qareeb say guzaroonga. vahaan main un say aap ka muaamala chhed kar maaloom karoonga ki vah kya iraada rakhtay hain. jo kuchh bhee vah kahengay main aap ko bata doonga.”
4aglee subah jab yoontan nay apnay baap say baat kee to us nay daaood kee sifaarish karkay kaha, “baadshaah apnay khaadim daaood ka gunaah na karen, kyoonki us nay aap ka gunaah naheen kiya balki hamesha aap kay liyay faaidaamand raha hai. 5usee nay apnee jaan ko khatray men daal kar filistee ko maar daala, aur rabb nay us kay vaseelay say tamaam israaeel ko badee najaat bakhshee. us vaqt aap khud bhee sab kuchh dekh kar khush huay. to phir aap gunaah karkay us jaisay bequsoor aadmee ko kyoon bilaavajah marvaana chaahatay hain?”
6yoontan kee baaten sun kar saaool maan gaya. us nay vaada kiya, “rabb kee hayaat kee qasam, daaood ko maara naheen jaaega.” 7baad men yoontan nay daaood ko bula kar usay sab kuchh bataaya, phir usay saaool kay paas laaya. tab daaood pahelay kee tarah baadshaah kee khidmat karnay laga.
saaool ka daaood par doosra hamlaa
8ek baar phir jang chhid gaee, aur daaood nikal kar filistiyon say lada. is dafa bhee us nay unhen yoon shikast dee ki vah faraar ho gaay. 9lekin ek din jab saaool apna neza pakday ghar men baitha tha to allaah kee bhejee huee buree rooh us par ghaalib aaee. us vaqt daaood sarod baja raha tha. 10achaanak saaool nay nezay ko phaink kar daaood ko deevaar kay saath chhed daalnay kee koshish kee. lekin vah ek taraf hat gaya aur neza us kay qareeb say guzar kar deevaar men dhans gaya. daaood bhaag gaya aur us raat saaool kay haath say bach gaya.
11saaool nay fauran apnay aadmiyon ko daaood kay ghar kay paas bhej diya taaki vah makaan kee paheraadaaree karkay daaood ko subah kay vaqt qatl kar den. lekin daaood kee beevee meekal nay us ko aagaah kar diya, “aaj raat ko hee yahaan say chalay jaaen, varna aap naheen bachengay balki kal subah hee maar diay jaaengay.” 12chunaanchay daaood ghar kee khidkee men say nikla, aur meekal nay utarnay men us kee madad kee. tab daaood bhaag kar bach gaya.
13meekal nay daaood kee chaarpaaee par but rakh kar us kay sar par bakriyon kay baal laga diay aur baaqee hissay par kambal bichha diya. 14jab saaool kay aadmee daaood ko pakadnay kay liyay aaay to meekal nay kaha, “vah beemaar hai.” 15faujiyon nay saaool ko ittila dee to us nay unhen hukm diya, “usay chaarpaaee samet hee meray paas lay aao taaki usay maar doon.”
16jab vah daaood ko lay jaanay kay liyay aaay to kya dekhtay hain ki us kee chaarpaaee par but pada hai jis kay sar par bakriyon kay baal lagay hain. 17saaool nay apnee betee ko bahut jhidka, “too nay mujhay is tarah dhoka day kar meray dushman kee faraar honay men madad kyoon kee? teree hee vajah say vah bach gaya.” meekal nay javaab diya, “us nay mujhay dhamkee dee ki main tujhay qatl kar doonga agar too faraar honay men meree madad na karay.”
daaood raama men samooel kay paas
18is tarah daaood bach nikla. vah raama men samooel kay paas faraar hua aur usay sab kuchh sunaaya jo saaool nay us kay saath kiya tha. phir donon mil kar nayot chalay gaay. vahaan vah thaheray. 19saaool ko ittila dee gaee, “daaood raama kay nayot men thahera hua hai.” 20us nay fauran apnay aadmiyon ko usay pakadnay kay liyay bhej diya. jab vah pahunchay to dekha ki nabiyon ka poora guroh vahaan nubuvvat kar raha hai, aur samooel khud un kee raahanumaaee kar raha hai. unhen dekhtay hee allaah ka rooh saaool kay aadmiyon par naazil hua, aur vah bhee nubuvvat karnay lagay. 21saaool ko is baat kee khabar milee to us nay mazeed aadmiyon ko raama bhej diya. lekin vah bhee vahaan pahunchtay hee nubuvvat karnay lagay. saaool nay teesree baar aadmiyon ko bhej diya, lekin yahee kuchh un kay saath bhee hua.
22aakhir men saaool khud raama kay liyay ravaana hua. chaltay chaltay vah seekoo kay baday hauz par pahuncha. vahaan us nay logon say poochha, “daaood aur samooel kahaan hain?” unhon nay javaab diya, “raama kee aabaadee nayot men.”
23saaool abhee nayot naheen pahuncha tha ki allaah ka rooh us par bhee naazil hua, aur vah nubuvvat kartay kartay nayot pahunch gaya. 24vahaan vah apnay kapdon ko utaar kar samooel kay saamnay nubuvvat karta raha. nubuvvat kartay kartay vah zameen par let gaya aur vahaan pooray din aur pooree raat pada raha. isee vajah say yah qaul mashhoor hua, “kya saaool ko bhee nabiyon men shumaar kiya jaata hai?”