1 Samooel 21

daaood nob men akheemlik kay paas thaherta hai

¹daaood nob men akheemlik imaam kay paas gaya. akheemlik kaamptay huay us say milnay kay liyay aaya aur poochha, “aap akelay kyoon aaay hain? koee aap kay saath naheen.” ²daaood nay javaab diya, “baadshaah nay mujhay ek khaas zimmaadaaree dee hai jis ka zikr tak karna mana hai. kisee ko bhee is kay baaray men jaanna naheen chaahiay. main nay apnay aadmiyon ko hukm diya hai ki fulaan fulaan jagah par mera intizaar karen. ³ab mujhay zara bataaen ki khaanay kay liyay kya mil sakta hai? mujhay paanch rotiyaan day den, ya jo kuchh bhee aap kay paas hai.”

⁴imaam nay javaab diya, “meray paas aam rotee naheen hai. main aap ko sirf rabb kay liyay makhsoosashuda rotee day sakta hoon. shart yah hai ki aap kay aadmee pichhlay dinon men aurton say hambistar na huay hon.” ⁵daaood nay usay tasallee day kar kaha, “fikr na karen. pahelay kee tarah hamen is muhimm kay dauraan bhee aurton say door rahena pada hai. meray faujee aam muhimmon kay liyay bhee apnay aap ko paak rakhtay hain, to is dafa vah kaheen ziyaada paak-saaf hain.”

⁶phir imaam nay daaood ko makhsoosashuda rotiyaan deen yaanee vah rotiyaan jo mulaaqaat kay khaimay men rabb kay huzoor rakhee jaatee theen aur usee din taaza rotiyon say tabdeel huee theen. ⁷us vaqt saaool kay charvaahon ka adomee inchaarj doeg vahaan tha. vah kisee majbooree kay baais rabb kay huzoor thahera hua tha. us kee maujoodgee men ⁸daaood nay akheemlik say poochha, “kya aap kay paas koee neza ya talvaar hai? mujhay baadshaah kee muhimm kay liyay itnee jaldee say nikalna pada ki apnee talvaar ya koee aur hathiyaar saath laanay kay liyay fursat na milee.”

⁹akheemlik nay javaab diya, “jee hai. vaadee-ay-aila men aap kay haathon maaray gaay filistee mard jaaloot kee talvaar meray paas hai. vah ek kapday men liptee meray baalaaposh kay peechhay padee hai. agar aap usay apnay saath lay jaana chaahen to lay jaaen. meray paas koee aur hathiyaar naheen hai.” daaood nay kaha, “is qism kee talvaar kaheen aur naheen miltee. mujhay day den.”

daaood filistee baadshaah kay paas

¹⁰usee din daaood aagay nikla taaki saaool say bach sakay. israaeel ko chhod kar vah filistee shaher jaat kay baadshaah akees kay paas gaya. ¹¹lekin akees kay mulaazimon nay baadshaah ko aagaah kiya, “kya yah mulk ka baadshaah daaood naheen hai? isee kay baaray men israaeelee naach kar geet gaatay hain, ‘saaool nay hazaar halaak kiay jabki daaood nay das hazaar’.”

¹²yah sun kar daaood ghabra gaya aur jaat kay baadshaah akees say bahut darnay laga. ¹³achaanak vah paagal aadmee ka roop bhar kar un kay darmiyaan ajeeb ajeeb harkaten karnay laga. shaher kay darvaazay kay paas ja kar us nay us par betukay say nishaan lagaaay aur apnee daadhee par raal tapaknay dee.

¹⁴yah dekh kar akees nay apnay mulaazimon ko jhidka, “tum is aadmee ko meray paas kyoon lay aaay ho? tum khud dekh saktay ho ki yah paagal hai. ¹⁵kya meray paas paaglon kee kamee hai ki tum is ko meray saamnay lay aaay ho taaki is tarah kee harkaten karay? kya mujhay aisay mehamaan kee zaroorat hai?”