1 Samooel 22

adullaam kay ghaar aur moaab men

¹is tarah daaood jaat say bach nikla aur adullaam kay ghaar men chhup gaya. jab us kay bhaaiyon aur baap kay gharaanay ko is kee khabar milee to vah bait-lahem say a kar vahaan us kay saath ja milay. ²aur log bhee jaldee say us kay gird jama ho gaay, aisay jo kisee museebat men phansay huay thay ya apna qarz ada naheen kar saktay thay aur aisay bhee jin ka dil talkhee say bhara hua tha. hotay hotay daaood taqreeban 400 afraad ka raahanuma ban gaya.

³daaood adullaam say ravaana ho kar mulk-ay-moaab kay shaher misfaah chala gaya. us nay moaabee baadshaah say guzaarish kee, “meray maan-baap ko us vaqt tak yahaan panaah den jab tak mujhay pata na ho ki allaah meray liyay kya iraada rakhta hai.” ⁴vah apnay maan-baap ko baadshaah kay paas lay aaya, aur vah utnee der tak vahaan thaheray jitnee der daaood apnay pahaadee qilaay men raha.

⁵ek din jaad nabee nay daaood say kaha, “yahaan pahaadee qilaay men mat rahen balki dubaara yahoodaah kay ilaaqay men vaapas chalay jaaen.” daaood us kee sun kar haarat kay jangal men ja basa.

saaool nob kay imaamon say badla leta hai

⁶saaool ko ittila dee gaee ki daaood aur us kay aadmee dubaara yahoodaah men pahunch gaay hain. us vaqt saaool apna neza pakday jhaao kay us darakht kay saay men baitha tha jo jibia kee pahaadee par tha. saaool kay ird-gird us kay mulaazim khaday thay. ⁷vah pukaar utha, “binyameen kay mardo! sunen, kya yassee ka beta aap sab ko khet aur angoor kay baagh dega? kya vah fauj men aap ko hazaar hazaar aur sau sau afraad par muqarrar karega? ⁸lagta hai ki aap is kee ummeed rakhtay hain, varna aap yoon meray khilaaf saazish na kartay. kyoonki aap men say kisee nay bhee mujhay yah naheen bataaya ki meray apnay betay nay is aadmee kay saath ahd baandha hai. aap ko meree fikr tak naheen, varna mujhay ittila detay ki yoontan nay meray mulaazim daaood ko ubhaara hai ki vah meree taak men baith jaaay. kyoonki aaj to aisa hee ho raha hai.”

⁹doeg adomee saaool kay afsaron kay saath vahaan khada tha. ab vah bol utha, “main nay yassee kay betay ko dekha hai. us vaqt vah nob men akheemlik bin akheetoob say milnay aaya. ¹⁰akheemlik nay rabb say darayaaft kiya ki daaood ka agla qadam kya ho. saath saath us nay usay safar kay liyay khaana aur filistee mard jaaloot kee talvaar bhee dee.”

¹¹baadshaah nay fauran akheemlik bin akheetoob aur us kay baap kay pooray khaandaan ko bulaaya. sab nob men imaam thay. ¹²jab pahunchay to saaool bola, “akheetoob kay betay, sunen.” akheemlik nay javaab diya, “jee meray aaqa, hukm.” ¹³saaool nay ilzaam laga kar kaha, “aap nay yassee kay betay daaood kay saath meray khilaaf saazishen kyoon kee hain? bataaen, aap nay usay rotee aur talvaar kyoon dee? aap nay allaah say darayaaft kyoon kiya ki daaood aagay kya karay? aap hee kee madad say vah sarkash ho kar meree taak men baith gaya hai, kyoonki aaj to aisa hee ho raha hai.”

¹⁴akheemlik bola, “lekin meray aaqa, kya mulaazimon men say koee aur aap kay daamaad daaood jaisa vafaadaar saabit hua hai? vah to aap kay muhaafiz dastay ka kaptaan aur aap kay gharaanay ka muazzaz maimbar hai. ¹⁵aur yah pahelee baar naheen tha ki main nay us kay liyay allaah say hidaayat maangee. is muaamalay men baadshaah mujh aur meray khaandaan par ilzaam na lagaaay. main nay to kisee saazish ka zikr tak naheen suna.”

¹⁶lekin baadshaah bola, “akheemlik, tujhay aur teray baap kay pooray khaandaan ko marna hai.” ¹⁷us nay saath khaday apnay muhaafizon ko hukm diya, “ja kar imaamon ko maar do, kyoonki yah bhee daaood kay ittihaadee hain. go in ko maaloom tha ki daaood mujh say bhaag raha hai to bhee inhon nay mujhay ittila na dee.”

lekin muhaafizon nay rabb kay imaamon ko maar daalnay say inkaar kiya. ¹⁸tab baadshaah nay doeg adomee ko hukm diya, “phir tum hee imaamon ko maar do.” doeg nay un kay paas ja kar un sab ko qatl kar diya. kataan ka baalaaposh pahennay vaalay kul 85 aadmee us din maaray gaay. ¹⁹phir us nay ja kar imaamon kay shaher nob kay tamaam baashindon ko maar daala. shaher kay mard, aurten, bachchay sheerakhwaaron samet, gaay-bail, gadhay aur bhed-bakriyaan sab us din halaak huay.

²⁰sirf ek hee shakhs bach gaya, abiyaatar jo akheemlik bin akheetoob ka beta tha. vah bhaag kar daaood kay paas aayaa ²¹aur usay ittila dee ki saaool nay rabb kay imaamon ko qatl kar diya hai. ²²daaood nay kaha, “us din jab main nay doeg adomee ko vahaan dekha to mujhay maaloom tha ki vah zaroor saaool ko khabar pahunchaaega. yah mera hee qusoor hai ki aap kay baap ka poora khaandaan halaak ho gaya hai. ²³ab meray saath rahen aur mat daren. jo aadmee aap ko qatl karna chaahata hai vah mujhay bhee qatl karna chaahata hai. aap meray saath rah kar mahfooz rahengay.”