1 Samooel 23

daaood qaeela ko bachaata hai

¹ek din daaood ko khabar milee ki filistee qaeela shaher par hamla karkay gaahanay kee jagahon say anaaj loot rahay hain. ²daaood nay rabb say darayaaft kiya, “kya main ja kar filistiyon par hamla karoon?” rabb nay javaab diya, “ja, filistiyon par hamla karkay qaeela ko bacha.”

³lekin daaood kay aadmee etiraaz karnay lagay, “ham pahelay say yahaan yahoodaah men logon kee mukhaalafat say dartay hain. jab ham qaeela ja kar filistiyon par hamla karengay to phir hamaara kya banega?” ⁴tab daaood nay rabb say dubaara hidaayat maangee, aur dubaara usay yahee javaab mila, “qaeela ko ja! main filistiyon ko teray havaalay kar doonga.”

⁵chunaanchay daaood apnay aadmiyon kay saath qaeela chala gaya. us nay filistiyon par hamla karkay unhen badee shikast dee aur un kee bhed-bakriyon ko chheen kar qaeela kay baashindon ko bachaaya. ⁶vahaan qaeela men abiyaatar daaood kay logon men shaamil hua. us kay paas imaam ka baalaaposh tha.

⁷jab saaool ko khabar milee ki daaood qaeela shaher men thahera hua hai to us nay socha, “allaah nay usay meray havaalay kar diya hai, kyoonki ab vah faseeldaar shaher men ja kar phans gaya hai.” ⁸vah apnee pooree fauj ko jama karkay jang kay liyay tayyaariyaan karnay laga taaki utar kar qaeela ka muhaasara karay jis men daaood ab tak thahera hua tha.

⁹lekin daaood ko pata chala ki saaool us kay khilaaf tayyaariyaan kar raha hai. us nay abiyaatar imaam say kaha, “imaam ka baalaaposh lay aaen taaki ham rabb say hidaayat maangen.” ¹⁰phir us nay dua kee, “ai rabb israaeel kay khuda, mujhay khabar milee hai ki saaool meree vajah say qaeela par hamla karkay usay barbaad karna chaahata hai. ¹¹kya shaher kay baashinday mujhay saaool kay havaalay kar dengay? kya saaool vaaqaee aaega? ai rabb, israaeel kay khuda, apnay khaadim ko bata!” rabb nay javaab diya, “haan, vah aaega.” ¹²phir daaood nay mazeed darayaaft kiya, “kya shaher kay buzurg mujhay aur meray logon ko saaool kay havaalay kar dengay?” rabb nay kaha, “haan, vah kar dengay.”

¹³lihaaza daaood apnay taqreeban 600 aadmiyon kay saath qaeela say chala gaya aur idhar udhar phirnay laga. jab saaool ko ittila milee ki daaood qaeela say nikal kar bach gaya hai to vahaan jaanay say baaz aaya.

yoontan daaood say milta hai

¹⁴ab daaood biyaabaan kay pahaadee qilaon aur dasht-ay-zeef kay pahaadee ilaaqay men rahenay laga. saaool to musalsal us ka khoj lagaata raha, lekin allaah hamesha daaood ko saaool kay haath say bachaata raha. ¹⁵ek din jab daaood horish kay qareeb tha to usay ittila milee ki saaool aap ko halaak karnay kay liyay nikla hai. ¹⁶us vaqt yoontan nay daaood kay paas a kar us kee hausalaaafzaaee kee ki vah allaah par bharosa rakhay. ¹⁷us nay kaha, “daren mat. meray baap ka haath aap tak naheen pahunchega. ek din aap zaroor israaeel kay baadshaah ban jaaengay, aur mera rutba aap kay baad hee aaega. mera baap bhee is haqeeqat say khoob vaaqif hai.” ¹⁸donon nay rabb kay huzoor ahd baandha. phir yoontan apnay ghar chala gaya jabki daaood vahaan horish men thahera raha.

daaood zeef men bach jaata hai

¹⁹dasht-ay-zeef men aabaad kuchh log saaool kay paas a gaay jo us vaqt jibia men tha. unhon nay kaha, “ham jaantay hain ki daaood kahaan chhup gaya hai. vah horish kay pahaadee qilaon men hai, us pahaadee par jis ka naam hakeela hai aur jo yasheemon kay junoob men hai. ²⁰ai baadshaah, jab bhee aap ka dil chaahay aaen to ham usay pakad kar aap kay havaalay kar dengay.” ²¹saaool nay javaab diya, “rabb aap ko barkat bakhshay ki aap ko mujh par taras aaya hai. ²²ab vaapas ja kar mazeed tayyaariyaan karen. pata karen ki vah kahaan aata jaata hai aur kis nay usay vahaan dekha hai. kyoonki mujhay bataaya gaya hai ki vah bahut chaalaak hai. ²³har jagah ka khoj lagaaen jahaan vah chhup jaata hai. jab aap ko saaree tafseelaat maaloom hon to meray paas aaen. phir main aap kay saath vahaan pahunchoonga. agar vah vaaqaee vahaan kaheen ho to main usay zaroor dhoond nikaaloonga, khwaah mujhay pooray yahoodaah kee chhaanbeen kyoon na karnee paday.”

^24-25 zeef kay aadmee vaapas chalay gaay. thodee der kay baad saaool bhee apnee fauj samet vahaan kay liyay nikla. us vaqt daaood aur us kay log dasht-ay-maoon men yasheemon kay junoob men thay. jab daaood ko ittila milee ki saaool us ka taaqqub kar raha hai to vah registaan kay mazeed junoob men chala gaya, vahaan jahaan badee chataan nazar aatee hai. lekin saaool ko pata chala aur vah fauran registaan men daaood kay peechhay gaya.

²⁶chaltay chaltay saaool daaood kay qareeb hee pahunch gaya. aakhirkaar sirf ek pahaadee un kay darmiyaan rah gaee. saaool pahaadee kay ek daaman men tha jabki daaood apnay logon samet doosray daaman men bhaagta hua baadshaah say bachnay kee koshish kar raha tha. saaool abhee unhen gher kar pakadnay ko thaa ²⁷ki achaanak qaasid saaool kay paas pahuncha jis nay kaha, “jaldee aaen! filistee hamaaray mulk men ghus aaay hain.” ²⁸saaool ko daaood ko chhodna pada, aur vah filistiyon say ladnay gaya. us vaqt say pahaadee ka naam “alaahidagee kee chataan” pad gaya.

²⁹daaood vahaan say chala gaya aur ain-jadee kay pahaadee qilaon men rahenay laga.