1 Samooel 24

daaood saaool ko qatl karnay say inkaar karta hai

¹jab saaool filistiyon ka taaqqub karnay say vaapas aaya to usay khabar milee ki daaood ain-jadee kay registaan men hai. ²vah tamaam israaeel kay 3,000 cheeda faujiyon ko lay kar pahaadee bakriyon kee chataanon kay liyay ravaana hua taaki daaood ko pakad lay.

³chaltay chaltay vah bhedon kay kuchh baadon say guzarnay lagay. vahaan ek ghaar ko dekh kar saaool andar gaya taaki apnee haajat rafa karay. ittifaaq say daaood aur us kay aadmee usee ghaar kay pichhlay hissay men chhupay baithay thay. ⁴daaood kay aadmiyon nay aahista say us say kaha, “rabb nay to aap say vaada kiya tha, ‘main teray dushman ko teray havaalay kar doonga, aur too jo jee chaahay us kay saath kar sakega.’ ab yah vaqt a gaya hai!” daaood rengtay rengtay aagay saaool kay qareeb pahunch gaya. chupkay say us nay saaool kay libaas kay kinaaray ka tukda kaat liya aur phir vaapas a gaya. ⁵lekin jab apnay logon kay paas pahuncha to us ka zameer usay malaamat karnay laga. ⁶us nay apnay aadmiyon say kaha, “rabb na karay ki main apnay aaqa kay saath aisa sulook karkay rabb kay masah kiay huay baadshaah ko haath lagaaoon. kyoonki rabb nay khud usay masah karkay chun liya hai.” ⁷yah kah kar daaood nay un ko samjhaaya aur unhen saaool par hamla karnay say rok diya.

thodee der kay baad saaool ghaar say nikal kar aagay chalnay laga. ⁸jab vah kuchh faasilay par tha to daaood bhee nikla aur pukaar utha, “ai baadshaah salaamat, ai meray aaqa!” saaool nay peechhay dekha to daaood munh kay bal jhuk kar ⁹bola, “jab log aap ko bataatay hain ki daaood aap ko nuqsaan pahunchaanay par tula hua hai to aap kyoon dhyaan detay hain? ¹⁰aaj aap apnee aankhon say dekh saktay hain ki yah jhoot hee jhoot hai. ghaar men aap allaah kee marzee say meray qabzay men a gaay thay. meray logon nay zor diya ki main aap ko maar doon, lekin main nay aap ko na chheda. main bola, ‘main kabhee bhee baadshaah ko nuqsaan naheen pahunchaaoonga, kyoonki rabb nay khud usay masah karkay chun liya hai.’ ¹¹meray baap, yah dekhen jo meray haath men hai! aap kay libaas ka yah tukda main kaat saka, aur phir bhee main nay aap ko halaak na kiya. ab jaan len ki na main aap ko nuqsaan pahunchaanay ka iraada rakhta hoon, na main nay aap ka gunaah kiya hai. phir bhee aap mera taaqqub kartay huay mujhay maar daalnay kay darpai hain. ¹²rabb khud faisla karay ki kis say ghaltee ho rahee hai, aap say ya mujh say. vahee aap say mera badla lay. lekin khud main kabhee aap par haath naheen uthaaoonga. ¹³qadeem qaul yahee baat bayaan karta hai, ‘badkaaron say badkaaree paida hotee hai.’ meree neeyat to saaf hai, is liyay main kabhee aisa naheen karoonga. ¹⁴israaeel ka baadshaah kis kay khilaaf nikal aaya hai? jis ka taaqqub aap kar rahay hain us kee to koee haisiyat naheen. vah murda kutta ya pissoo hee hai. ¹⁵rabb hamaara munsif ho. vahee ham donon ka faisla karay. vah meray muaamalay par dhyaan day, meray haq men baat karay aur mujhay beilzaam thahera kar aap kay haath say bachaaay.”

¹⁶daaood khaamosh hua to saaool nay poochha, “daaood meray betay, kya aap kee aavaaz hai?” aur vah phoot phoot kar ronay laga. ¹⁷us nay kaha, “aap mujh say ziyaada raastbaaz hain. aap nay mujh say achchha sulook kiya jabki main aap say bura sulook karta raha hoon. ¹⁸aaj aap nay apna meray saath achchha sulook saabit kiya hai, kyoonki go rabb nay mujhay aap kay havaalay kar diya tha to bhee aap nay mujhay halaak na kiya. ¹⁹jab kisee ka dushman us kay qabzay men a jaata hai to vah usay jaanay naheen deta. lekin aap nay aisa hee kiya. rabb aap ko us meharbaanee ka ajr day jo aap nay aaj mujh par kee hai. ²⁰ab main jaanta hoon ki aap zaroor baadshaah ban jaaengay, aur ki aap kay zareeay israaeel kee baadshaahee qaaim rahegee. ²¹chunaanchay rabb kee qasam kha kar mujh say vaada karen ki na aap meree aulaad ko halaak karengay, na meray aabaaee gharaanay men say mera naam mita dengay.”

²²daaood nay qasam kha kar saaool say vaada kiya. phir saaool apnay ghar chala gaya jabki daaood nay apnay logon kay saath ek pahaadee qilaay men panaah lay lee.