1 Samooel 27

daaood dubaara akees kay paas

¹is tajribay kay baad daaood sochnay laga, “agar main yaheen thaher jaaoon to kisee din saaool mujhay maar daalega. behatar hai ki apnee hifaazat kay liyay filistiyon kay mulk men chala jaaoon. tab saaool pooray israaeel men mera khoj lagaanay say baaz aaega, aur main mahfooz rahoonga.” ²chunaanchay vah apnay 600 aadmiyon ko lay kar jaat kay baadshaah akees bin maaok kay paas chala gaya. ³un kay khaandaan saath thay. daaood kee do beeviyaan akheenooam yazraelee aur naabaal kee beva abeejel karmilee bhee saath theen. akees nay unhen jaat shaher men rahenay kee ijaazat dee. ⁴jab saaool ko khabar milee ki daaood nay jaat men panaah lee hai to vah us ka khoj lagaanay say baaz aaya.

⁵ek din daaood nay akees say baat kee, “agar aap kee nazar-ay-karam mujh par hai to mujhay deehaat kee kisee aabaadee men rahenay kee ijaazat den. kya zaroorat hai ki main yahaan aap kay saath daar-ul-hakoomat men rahoon?” ⁶akees muttafiq hua. us din us nay usay siqlaaj shaher day diya. yah shaher us vaqt say yahoodaah kay baadshaahon kee milkiyat men raha hai. ⁷daaood ek saal aur chaar maheenay filistee mulk men thahera raha.

⁸siqlaaj say daaood apnay aadmiyon kay saath mukhtalif jagahon par hamla karnay kay liyay nikalta raha. kabhee vah jasooriyon par dhaava boltay, kabhee jirziyon ya amaaleeqiyon par. yah qabeelay qadeem zamaanay say yahoodaah kay junoob men shoor aur misr kee sarhadd tak rahetay thay. ⁹jab bhee koee maqaam daaood kay qabzay men a jaata to vah kisee bhee mard ya aurat ko zinda na rahenay deta lekin bhed-bakriyon, gaay-bailon, gadhon, oonton aur kapdon ko apnay saath siqlaaj lay jaata.

jab bhee daaood kisee hamlay say vaapas a kar baadshaah akees say miltaa ¹⁰to vah poochhta, “aaj aap nay kis par chhaapa maara?” phir daaood javaab deta, “yahoodaah kay junoobee ilaaqay par,” ya “yarahemieliyon kay junoobee ilaaqay par,” ya “qeeniyon kay junoobee ilaaqay par.” ¹¹jab bhee daaood kisee aabaadee par hamla karta to vah tamaam baashindon ko maut kay ghaat utaar deta aur na mard, na aurat ko zinda chhod kar jaat laata. kyoonki us nay socha, “aisa na ho ki filistiyon ko pata chalay ki main asal men israaeelee aabaadiyon par hamla naheen kar raha.”

jitna vaqt daaood nay filistee mulk men guzaara vah aisa hee karta raha. ¹²akees nay daaood par poora bharosa kiya, kyoonki us nay socha, “ab daaood ko hamesha tak meree khidmat men rahena padega, kyoonki aisee harkaton say us kee apnee qaum us say sakht mutanaffir ho gaee hai.”