1 Samooel 28
1un dinon men filistee israaeel say ladnay kay liyay apnee faujen jama karnay lagay. akees nay daaood say bhee baat kee, “tavaqqo hai ki aap apnay faujiyon samet meray saath mil kar jang kay liyay nikalengay.”
2daaood nay javaab diya, “zaroor. ab aap khud dekhengay ki aap ka khaadim kya karnay kay qaabil hai!” akees bola, “theek hai. pooree jang kay dauraan aap meray muhaafiz hongay.”
saaool jaadoogaranee kee taraf rujoo karta hai
3us vaqt samooel intiqaal kar chuka tha, aur pooray israaeel nay us ka maatam karkay usay us kay aabaaee shaher raama men dafnaaya tha.
un dinon men israaeel men murdon say raabita karnay vaalay aur ghaibdaan naheen thay, kyoonki saaool nay unhen pooray mulk say nikaal diya tha.
4ab filistiyon nay apnee lashkargaah shooneem kay paas lagaaee jabki saaool nay tamaam israaeeliyon ko jama karkay jilbooa kay paas apna kaimp lagaaya. 5filistiyon kee badee fauj dekh kar vah sakht dahshat khaanay laga. 6us nay rabb say hidaayat haasil karnay kee koshish kee, lekin koee javaab na mila, na khwaab, na muqaddas qur’a daalnay say aur na nabiyon kee maarifat. 7tab saaool nay apnay mulaazimon ko hukm diya, “meray liyay murdon say raabita karnay vaalee dhoondo taaki main ja kar us say maaloomaat haasil kar loon.” mulaazimon nay javaab diya, “ain-dor men aisee aurat hai.”
8saaool bhes badal kar do aadmiyon kay saath ain-dor kay liyay ravaana hua.
raat kay vaqt vah jaadoogaranee kay paas pahunch gaya aur bola, “murdon say raabita karkay us rooh ko paataal say bula den jis ka naam main aap ko bataata hoon.” 9jaadoogaranee nay etiraaz kiya, “kya aap mujhay marvaana chaahatay hain? aap ko pata hai ki saaool nay tamaam ghaibdaanon aur murdon say raabita karnay vaalon ko mulk men say mita diya hai. aap mujhay kyoon phansaana chaahatay hain?” 10tab saaool nay kaha, “rabb kee hayaat kee qasam, aap ko yah karnay kay liyay saza naheen milegee.” 11aurat nay poochha, “main kis ko bulaaoon?” saaool nay javaab diya, “samooel ko bula den.”
12jab samooel aurat ko nazar aaya to vah cheekh uthee, “aap nay mujhay kyoon dhoka diya? aap to saaool hain!” 13saaool nay usay tasallee day kar kaha, “daren mat. bataaen to sahee, kya dekh rahee hain?” aurat nay javaab diya, “mujhay ek rooh nazar a rahee hai jo chadhtee chadhtee zameen men say nikal kar a rahee hai.” 14saaool nay poochha, “us kee shakl-o-soorat kaisee hai?” jaadoogaranee nay kaha, “chogay men lipta hua boodha aadmee hai.”
yah sun kar saaool nay jaan liya ki samooel hee hai. vah munh kay bal zameen par jhuk gaya. 15samooel bola, “too nay mujhay paataal say bulva kar kyoon muztarib kar diya hai?” saaool nay javaab diya, “main badee museebat men hoon. filistee mujh say lad rahay hain, aur allaah nay mujhay tark kar diya hai. na vah nabiyon kee maarifat mujhay hidaayat deta hai, na khwaab kay zareeay. is liyay main nay aap ko bulvaaya hai taaki aap mujhay bataaen ki main kya karoon.”
16lekin samooel nay kaha, “rabb khud hee tujhay chhod kar tera dushman ban gaya hai to phir mujh say darayaaft karnay ka kya faaida hai? 17rabb is vaqt teray saath vah kuchh kar raha hai jis kee peshgoee us nay meree maarifat kee thee. us nay teray haath say baadshaahee chheen kar kisee aur yaanee daaood ko day dee hai. 18jab rabb nay tujhay amaaleeqiyon par us ka sakht ghazab naazil karnay ka hukm diya tha to too nay us kee na sunee. ab tujhay is kee saza bhugatnee padegee. 19rabb tujhay israaeel samet filistiyon kay havaalay kar dega. kal hee too aur teray betay yahaan meray paas pahunchengay. rabb teree pooree fauj bhee filistiyon kay qabzay men kar dega.”
20yah sun kar saaool sakht ghabra gaya, aur vah gir kar zameen par daraaz ho gaya. jism kee pooree taaqat khatm ho gaee thee, kyoonki us nay pichhlay pooray din aur raat roza rakha tha.
21jab jaadoogaranee nay saaool kay paas ja kar dekha ki us kay rongtay khaday ho gaay hain to us nay kaha, “janaab, main nay aap ka hukm maan kar apnee jaan khatray men daal dee. 22ab zara meree bhee sunen. mujhay ijaazat den ki main aap ko kuchh khaana khilaaoon taaki aap taqviyat pa kar vaapas ja saken.” 23lekin saaool nay inkaar kiya, “main kuchh naheen khaaoonga.” tab us kay aadmiyon nay aurat kay saath mil kar usay bahut samjhaaya, aur aakhirkaar us nay un kee sunee. vah zameen say uth kar chaarpaaee par baith gaya. 24jaadoogaranee kay paas mota-taaza bachhda tha. usay us nay jaldee say zabah karva kar tayyaar kiya. us nay kuchh aata bhee lay kar goondha aur us say bekhameeree rotee banaaee. 25phir us nay khaana saaool aur us kay mulaazimon kay saamnay rakh diya, aur unhon nay khaaya. phir vah usee raat dubaara ravaana ho gaay.