1 Samooel 29
filistee daaood par shak kartay hain
1filistiyon nay apnee faujon ko afeeq kay paas jama kiya, jabki israaeeliyon kee lashkargaah yazrael kay chashmay kay paas thee. 2filistee sardaar jang kay liyay nikalnay lagay. un kay peechhay sau sau aur hazaar hazaar sipaahiyon kay guroh ho liyay. aakhir men daaood aur us kay aadmee bhee akees kay saath chalnay lagay.
3yah dekh kar filistee kamaandaron nay poochha, “yah israaeelee kyoon saath ja rahay hain?” akees nay javaab diya, “yah daaood hai, jo pahelay israaeelee baadshaah saaool ka faujee afsar tha aur ab kaafee der say meray saath hai. jab say vah saaool ko chhod kar meray paas aaya hai main nay us men aib naheen dekha.”
4lekin filistee kamaandar ghussay say bolay, “usay us shaher vaapas bhej den jo aap nay us kay liyay muqarrar kiya hai! kaheen aisa na ho ki vah hamaaray saath nikal kar achaanak ham par hee hamla kar day. kya apnay maalik say sulah karaanay ka koee behatar tareeqa hai ki vah apnay maalik ko hamaaray katay huay sar pesh karay? 5kya yah vahee daaood naheen jis kay baaray men israaeelee naachtay huay gaatay thay, ‘saaool nay hazaar halaak kiay jabki daaood nay das hazaar’?”
6chunaanchay akees nay daaood ko bula kar kaha, “rabb kee hayaat kee qasam, aap diyaanatdaar hain, aur meree khwaahish thee ki aap israaeel say ladnay kay liyay meray saath niklen, kyoonki jab say aap meree khidmat karnay lagay hain main nay aap men aib naheen dekha. lekin afsos, aap sardaaron ko pasand naheen hain. 7is liyay meharbaanee karkay salaamatee say laut jaaen aur kuchh na karen jo unhen bura lagay.”
8daaood nay poochha, “mujh say kya ghaltee huee hai? kya aap nay us din say mujh men nuqs paaya hai jab say main aap kee khidmat karnay laga hoon? main apnay maalik aur baadshaah kay dushmanon say ladnay kay liyay kyoon naheen nikal sakta?”
9akees nay javaab diya, “meray nazdeek to aap allaah kay farishtay jaisay achchhay hain. lekin filistee kamaandar is baat par bazid hain ki aap israaeel say ladnay kay liyay hamaaray saath na niklen. 10chunaanchay kal subah-saveray uth kar apnay aadmiyon kay saath ravaana ho jaana. jab din chadhay to der na karna balki jaldee say apnay ghar chalay jaana.”
11daaood aur us kay aadmiyon nay aisa hee kiya. aglay din vah subah-saveray uth kar filistee mulk men vaapas chalay gaay jabki filistee yazrael kay liyay ravaana huay.