1 Samooel 30

siqlaaj kee tabaahee aur daaood ka badlaa

¹teesray din jab daaood siqlaaj pahuncha to dekha ki shaher ka satyaanaas ho gaya hai. un kee ghairmaujoodgee men amaaleeqiyon nay dasht-ay-najab men a kar siqlaaj par bhee hamla kiya tha. shaher ko jala kar ²vah tamaam baashindon ko chhoton say lay kar badon tak apnay saath lay gaay thay. lekin koee halaak naheen hua tha balki vah sab ko apnay saath lay gaay thay. ³chunaanchay jab daaood aur us kay aadmee vaapas aaay to dekha ki shaher bhasm ho gaya hai aur tamaam baal-bachchay chhin gaay hain. ⁴vah phoot phoot kar ronay lagay, itnay roay ki aakhirkaar ronay kee sakat hee na rahee. ⁵daaood kee do beeviyon akheenooam yazraelee aur abeejel karmilee ko bhee aseer kar liya gaya tha.

⁶daaood kee jaan baday khatray men a gaee, kyoonki us kay mard gham kay maaray aapas men usay sangasaar karnay kee baaten karnay lagay. kyoonki betay-betiyon kay chhin jaanay kay baais sab sakht ranjeeda thay. lekin daaood nay rabb apnay khuda men panaah lay kar taqviyat paaee. ⁷us nay abiyaatar bin akheemlik ko hukm diya, “qur’a daalnay kay liyay imaam ka baalaaposh lay aaen.” jab imaam baalaaposh lay aayaa ⁸to daaood nay rabb say darayaaft kiya, “kya main luteron ka taaqqub karoon? kya main un ko ja loonga?” rabb nay javaab diya, “un ka taaqqub kar! too na sirf unhen ja lega balki apnay logon ko bacha bhee lega.” ^9-10 tab daaood apnay 600 mardon kay saath ravaana hua. chaltay chaltay vah basor nadee kay paas pahunch gaay. 200 afraad itnay nidhaal ho gaay thay ki vah vaheen ruk gaay. baaqee 400 mard nadee ko paar karkay aagay badhay.

¹¹raastay men unhen khulay maidaan men ek misree aadmee mila aur usay daaood kay paas la kar kuchh paanee pilaaya aur kuchh rotee, ¹²anjeer kee tikkee ka tukda aur kishmish kee do tikkiyaan khilaaeen. tab us kee jaan men jaan a gaee. usay teen din aur raat say na khaana, na paanee mila tha. ¹³daaood nay poochha, “tumhaara maalik kaun hai, aur tum kahaan kay ho?” us nay javaab diya, “main misree ghulaam hoon, aur ek amaaleeqee mera maalik hai. jab main safar kay dauraan beemaar ho gaya to us nay mujhay yahaan chhod diya. ab main teen din say yahaan pada hoon. ¹⁴pahelay ham nay karetiyon yaanee filistiyon kay junoobee ilaaqay aur phir yahoodaah kay ilaaqay par hamla kiya tha, khaaskar yahoodaah kay junoobee hissay par jahaan kaalib kee aulaad aabaad hai. shaher siqlaaj ko ham nay bhasm kar diya tha.”

¹⁵daaood nay savaal kiya, “kya tum mujhay bata saktay ho ki yah luteray kis taraf gaay hain?” misree nay javaab diya, “pahelay allaah kee qasam kha kar vaada karen ki aap mujhay na halaak karengay, na meray maalik kay havaalay karengay. phir main aap ko un kay paas lay jaaoonga.” ¹⁶chunaanchay vah daaood ko amaaleeqee luteron kay paas lay gaya. jab vahaan pahunchay to dekha ki amaaleeqee idhar udhar bikhray huay bada jashn mana rahay hain. vah har taraf khaana khaatay aur mai peetay huay nazar a rahay thay, kyoonki jo maal unhon nay filistiyon aur yahoodaah kay ilaaqay say loot liya tha vah bahut ziyaada tha.

¹⁷subah-saveray jab abhee thodee raushnee thee daaood nay un par hamla kiya. ladtay ladtay aglay din kee shaam ho gaee. dushman haar gaya aur sab kay sab halaak huay. sirf 400 javaan bach gaay jo oonton par savaar ho kar faraar ho gaay. ¹⁸daaood nay sab kuchh chhuda liya jo amaaleeqiyon nay loot liya tha. us kee do beeviyaan bhee saheeh-salaamat mil gaeen. ¹⁹na bachcha na buzurg, na beta na betee, na maal ya koee aur lootee huee cheez rahee jo daaood vaapas na laaya. ²⁰amaaleeqiyon kay gaay-bail aur bhed-bakriyaan daaood ka hissa ban gaeen, aur us kay logon nay unhen apnay revdon kay aagay aagay haank kar kaha, “yah lootay huay maal men say daaood ka hissa hai.”

maal-ay-ghaneemat kee taqseem

²¹jab daaood apnay aadmiyon kay saath vaapas a raha tha to jo 200 aadmee nidhaal honay kay baais basor nadee say aagay na ja sakay vah bhee un say a milay. daaood nay salaam karkay un ka haal poochha. ²²lekin baaqee aadmiyon men kuchh sharaartee log budbudaanay lagay, “yah hamaaray saath ladnay kay liyay aagay na niklay, is liyay inhen lootay huay maal ka hissa paanay ka haq naheen. bas vah apnay baal-bachchon ko lay kar chalay jaaen.”

²³lekin daaood nay inkaar kiya. “naheen, meray bhaaiyo, aisa mat karna! yah sab kuchh rabb kee taraf say hai. usee nay hamen mahfooz rakh kar hamlaaaavar luteron par fatah bakhshee. ²⁴to phir ham aap kee baat kis tarah maanen? jo peechhay rah kar saamaan kee hifaazat kar raha tha usay bhee utna hee milega jitna ki usay jo dushman say ladnay gaya tha. ham yah sab kuchh baraabar baraabar taqseem karengay.”

²⁵us vaqt say yah usool ban gaya. daaood nay isay israaeelee qaanoon ka hissa bana diya jo aaj tak jaaree hai. ²⁶siqlaaj vaapas pahunchnay par daaood nay lootay huay maal ka ek hissa yahoodaah kay buzurgon kay paas bhej diya jo us kay dost thay. saath saath us nay paighaam bheja, “aap kay liyay yah tuhfa rabb kay dushmanon say loot liya gaya hai.” ²⁷yah tuhfay us nay zail kay shaheron men bhej diay : bait-el, raamaat-najab, yatteer, ²⁸aroeer, sifmot, istimooa, ^29-31 rakal, hurma, bor-asaan, ataaq aur habroon. is kay ilaava us nay tuhfay yarahemieliyon, qeeniyon aur baaqee un tamaam shaheron ko bhej diay jin men vah kabhee thahera tha.