1 Samooel 31

saaool aur us kay beton ka anjaam

¹itnay men filistiyon aur israaeeliyon kay darmiyaan jang chhid gaee thee. ladtay ladtay israaeelee faraar honay lagay, lekin bahut say log jilbooa kay pahaadee silsilay par shaheed ho gaay.

²phir filistee saaool aur us kay beton yoontan, abeendaab aur malkeeshooa kay paas ja pahunchay. teenon betay halaak ho gae ³jabki ladaaee saaool kay ird-gird urooj tak pahunch gaee. phir vah teer’andaazon ka nishaana ban kar buree tarah zakhmee ho gaya. ⁴us nay apnay silaahabardaar ko hukm diya, “apnee talvaar miyaan say khainch kar mujhay maar daal, varna yah naamakhtoon mujhay chhed kar beizzat karengay.” lekin silaahabardaar nay inkaar kiya, kyoonki vah bahut dara hua tha. aakhir men saaool apnee talvaar lay kar khud us par gir gaya.

⁵jab silaahabardaar nay dekha ki mera maalik mar gaya hai to vah bhee apnee talvaar par gir kar mar gaya. ⁶yoon us din saaool, us kay teen betay, us ka silaahabardaar aur us kay tamaam aadmee halaak ho gaay.

⁷jab maidaan-ay-yazrael kay paar aur darya-ay-yardan kay paar rahenay vaalay israaeeliyon ko khabar milee ki israaeelee fauj bhaag gaee aur saaool apnay beton samet maara gaya hai to vah apnay shaheron ko chhod kar bhaag niklay, aur filistee chhoday huay shaheron par qabza karkay un men basnay lagay.

⁸aglay din filistee laashon ko lootnay kay liyay dubaara maidaan-ay-jang men a gaay. jab unhen jilbooa kay pahaadee silsilay par saaool aur us kay teenon betay murda mile ⁹to unhon nay saaool ka sar kaat kar us ka ziraabaktar utaar liya aur qaasidon ko apnay pooray mulk men bhej kar apnay buton kay mandir men aur apnee qaum ko fatah kee ittila dee. ¹⁰saaool ka ziraabaktar unhon nay astaaraat devee kay mandir men mahfooz kar liya aur us kee laash ko bait-shaan kee faseel say latka diya.

¹¹jab yabees-jiliaad kay baashindon ko khabar milee ki filistiyon nay saaool kee laash kay saath kya kuchh kiya hai ¹²to shaher kay tamaam ladnay kay qaabil aadmee bait-shaan kay liyay ravaana huay. pooree raat chaltay huay vah shaher kay paas pahunch gaay. saaool aur us kay beton kee laashon ko faseel say utaar kar vah unhen yabees ko lay gaay. vahaan unhon nay laashon ko bhasm kar diyaa ¹³aur bachee huee haddiyon ko shaher men jhaao kay darakht kay saay men dafnaaya. unhon nay roza rakh kar pooray haftay tak un ka maatam kiya.