2 Tavaareekh 1

sulemaan rabb say hikmat maangta hai

¹sulemaan bin daaood kee hukoomat mazboot ho gaee. rabb us ka khuda us kay saath tha, aur vah us kee taaqat badhaata raha.

²ek din sulemaan nay tamaam israaeel ko apnay paas bulaaya. un men hazaar hazaar aur sau sau faujiyon par muqarrar afsar, qaazee, tamaam buzurg aur kumbon kay sarparast shaamil thay. ³phir sulemaan un kay saath jibaoon kee us pahaadee par gaya jahaan allaah ka mulaaqaat ka khaima tha, vahee jo rabb kay khaadim moosa nay registaan men banvaaya tha. ⁴ahd ka sandooq us men naheen tha, kyoonki daaood nay usay qiryat-yaareem say yarooshalam la kar ek khaimay men rakh diya tha jo us nay vahaan us kay liyay tayyaar kar rakha tha. ⁵lekin peetal kee jo qurbaangaah bazaleeel bin ooree bin hoor nay banaaee thee vah ab tak jibaoon men rabb kay khaimay kay saamnay thee. ab sulemaan aur israaeel us kay saamnay jama huay taaki rabb kee marzee darayaaft karen. ⁶vahaan rabb kay huzoor sulemaan nay peetal kee us qurbaangaah par bhasm honay vaalee 1,000 qurbaaniyaan chadhaaeen.

⁷usee raat rabb sulemaan par zaahir hua aur farmaaya, “tera dil kya chaahata hai? mujhay bata day to main teree khwaahish pooree karoonga.” ⁸sulemaan nay javaab diya, “too meray baap daaood par badee meharbaanee kar chuka hai, aur ab too nay us kee jagah mujhay takht par bitha diya hai. ⁹too nay mujhay ek aisee qaum par baadshaah bana diya hai jo zameen kee khaak kee tarah beshumaar hai. chunaanchay ai rabb khuda, vah vaada poora kar jo too nay meray baap daaood say kiya hai. ¹⁰mujhay hikmat aur samajh ata farma taaki main is qaum kee raahanumaaee kar sakoon. kyoonki kaun teree is azeem qaum ka insaaf kar sakta hai?”

¹¹allaah nay sulemaan say kaha, “main khush hoon ki too dil say yahee kuchh chaahata hai. too nay na maal-o-daulat, na izzat, na apnay dushmanon kee halaakat aur na umr kee daraazee balki hikmat aur samajh maangee hai taaki meree us qaum ka insaaf kar sakay jis par main nay tujhay baadshaah bana diya hai. ¹²is liyay main teree yah darakhwaast pooree karkay tujhay hikmat aur samajh ata karoonga. saath saath main tujhay utna maal-o-daulat aur utnee izzat doonga jitnee na maazee men kisee baadshaah ko haasil thee, na mustaqbil men kabhee kisee ko haasil hogee.”

¹³is kay baad sulemaan jibaoon kee us pahaadee say utra jis par mulaaqaat ka khaima tha aur yarooshalam vaapas chala gaya jahaan vah israaeel par hukoomat karta tha.

sulemaan kee daulat

¹⁴sulemaan kay 1,400 rath aur 12,000 ghoday thay. kuchh us nay rathon kay liyay makhsoos kiay gaay shaheron men aur kuchh yarooshalam men apnay paas rakhay. ¹⁵baadshaah kee sargarmiyon kay baais chaandee patthar jaisee aam ho gaee aur deodaar kee qeemtee lakdee maghrib kay nishebee pahaadee ilaaqay kee anjeer-toot kee sastee lakdee jaisee aam ho gaee. ¹⁶baadshaah apnay ghoday misr aur kooay yaanee kilikiya say dar’aamad karta tha. us kay taajir in jagahon par ja kar unhen khareed laatay thay. ¹⁷baadshaah kay rath misr say dar’aamad hotay thay. har rath kee qeemat chaandee kay 600 sikkay aur har ghoday kee qeemat chaandee kay 150 sikkay thee. sulemaan kay taajir yah ghoday bar’aamad kartay huay tamaam hittee aur araamee baadshaahon tak bhee pahunchaatay thay.