2 Tavaareekh 10

shimaalee qabeelay alag ho jaatay hain

¹rahubiaam sikam gaya, kyoonki vahaan tamaam israaeelee usay baadshaah muqarrar karnay kay liyay jama ho gaay thay. ²yarubiaam bin nabaat yah khabar suntay hee misr say jahaan us nay sulemaan baadshaah say bhaag kar panaah lee thee israaeel vaapas aaya. ³israaeeliyon nay usay bulaaya taaki us kay saath sikam jaaen. jab pahuncha to israaeel kee pooree jamaaat yarubiaam kay saath mil kar rahubiaam say milnay gaee. unhon nay baadshaah say kaha, ⁴“jo jooa aap kay baap nay ham par daal diya tha usay uthaana mushkil tha, aur jo vaqt aur paisay hamen baadshaah kee khidmat men sarf karnay thay vah naaqaabil-ay-bardaasht thay. ab donon ko kam kar den. phir ham khushee say aap kee khidmat karengay.”

⁵rahubiaam nay javaab diya, “mujhay teen din kee muhalat den, phir dubaara meray paas aaen.” chunaanchay log chalay gaay. ⁶phir rahubiaam baadshaah nay un buzurgon say mashvra kiya jo sulemaan kay jeetay jee baadshaah kee khidmat kartay rahay thay. us nay poochha, “aap ka kya khayaal hai? main in logon ko kya javaab doon?” ⁷buzurgon nay javaab diya, “hamaara mashvra hai ki is vaqt un say meharbaanee say pesh a kar un say achchha sulook karen aur narm javaab den. agar aap aisa karen to vah hamesha aap kay vafaadaar khaadim banay rahengay.”

⁸lekin rahubiaam nay buzurgon ka mashvra radd karkay us kee khidmat men haazir un javaanon say mashvra kiya jo us kay saath parvaan chadhay thay. ⁹us nay poochha, “main is qaum ko kya javaab doon? yah taqaaza kar rahay hain ki main vah jooa halka kar doon jo meray baap nay un par daal diya.” ¹⁰jo javaan us kay saath parvaan chadhay thay unhon nay kaha, “achchha, yah log taqaaza kar rahay hain ki aap kay baap ka jooa halka kiya jaaay? unhen bata dena, ‘meree chhotee unglee meray baap kee kamar say ziyaada motee hai! ¹¹beshak jo jooa us nay aap par daal diya usay uthaana mushkil tha, lekin mera jooa aur bhee bhaaree hoga. jahaan meray baap nay aap ko koday lagaaay vahaan main aap kee bichchhooon say taadeeb karoonga’!”

¹²teen din kay baad jab yarubiaam tamaam israaeeliyon kay saath rahubiaam ka faisla sunnay kay liyay vaapas aayaa ¹³to baadshaah nay unhen sakht javaab diya. buzurgon ka mashvra radd karke ¹⁴us nay unhen javaanon ka javaab diya, “beshak jo jooa meray baap nay aap par daal diya usay uthaana mushkil tha, lekin mera jooa aur bhee bhaaree hoga. jahaan meray baap nay aap ko koday lagaaay vahaan main aap kee bichchhooon say taadeeb karoonga!” ¹⁵yoon rabb kee marzee pooree huee ki rahubiaam logon kee baat naheen maanega. kyoonki ab rabb kee vah peshgoee pooree huee jo saila kay nabee akhiyaah nay yarubiaam bin nabaat ko bataaee thee.

¹⁶jab israaeeliyon nay dekha ki baadshaah hamaaree baat sunnay kay liyay tayyaar naheen hai to unhon nay us say kaha, “na hamen daaood say meeraas men kuchh milega, na yassee kay betay say kuchh milnay kee ummeed hai. ai israaeel, sab apnay apnay ghar vaapas chalen! ai daaood, ab apna ghar khud sambhaal lo!” yah kah kar vah sab chalay gaay.

¹⁷sirf yahoodaah kay qabeelay kay shaheron men rahenay vaalay israaeelee rahubiaam kay tahet rahay. ¹⁸phir rahubiaam baadshaah nay begaariyon par muqarrar afsar adooneeraam ko shimaalee qabeelon kay paas bhej diya, lekin usay dekh kar logon nay usay sangasaar kiya. tab rahubiaam jaldee say apnay rath par savaar hua aur bhaag kar yarooshalam pahunch gaya.

¹⁹yoon israaeel kay shimaalee qabeelay daaood kay shaahee gharaanay say alag ho gaay aur aaj tak us kee hukoomat naheen maantay.