2 Tavaareekh 11

rahubiaam ko israaeel say ladnay kee ijaazat naheen miltee

¹jab rahubiaam yarooshalam pahuncha to us nay yahoodaah aur binyameen kay qabeelon kay cheeda cheeda faujiyon ko israaeel say jang karnay kay liyay bulaaya. 1,80,000 mard jama huay taaki rahubiaam kay liyay israaeel par dubaara qaaboo paaen. ²lekin ain us vaqt mard-ay-khuda samaayaah ko rabb kee taraf say paighaam mila, ³“yahoodaah kay baadshaah rahubiaam bin sulemaan aur yahoodaah aur binyameen kay tamaam afraad ko ittila day, ⁴‘rabb farmaata hai ki apnay bhaaiyon say jang mat karna. har ek apnay apnay ghar vaapas chala jaaay, kyoonki jo kuchh hua hai vah meray hukm par hua hai’.”

tab vah rabb kee sun kar yarubiaam say ladnay say baaz aaay.

rahubiaam kee qil’aabandee

⁵rahubiaam ka daar-ul-hakoomat yarooshalam raha. yahoodaah men us nay zail kay shaheron kee qil’aabandee kee : ⁶bait-lahem, aitaam, taqooa, ⁷bait-soor, soka, adullaam, ⁸jaat, maresa, zeef, ⁹adooraaeem, lakees, azeeqa, ¹⁰sur’a, ayyaalon aur habroon. yahoodaah aur binyameen kay in qil’aaband shaheron ko ¹¹mazboot karkay rahubiaam nay har shaher par afsar muqarrar kiay. un men us nay khuraak, zaitoon kay tel aur mai ka zakheera kar liyaa ¹²aur saath saath un men dhaalen aur nezay bhee rakhay. is tarah us nay unhen bahut mazboot bana kar yahoodaah aur binyameen par apnee hukoomat mahfooz kar lee.

imaam aur laavee yahoodaah men muntaqil ho jaatay hain

¹³go imaam aur laavee tamaam israaeel men bikhray rahetay thay to bhee unhon nay rahubiaam ka saath diya. ¹⁴apnee charaagaahon aur milkiyat ko chhod kar vah yahoodaah aur yarooshalam men aabaad huay, kyoonki yarubiaam aur us kay beton nay unhen imaam kee haisiyat say rabb kee khidmat karnay say rok diya tha. ¹⁵un kee jagah us nay apnay zaatee imaam muqarrar kiay jo oonchee jagahon par kay mandiron ko sambhaaltay huay bakray kay devtaaon aur bachhday kay buton kee khidmat kartay thay. ¹⁶laaviyon kee tarah tamaam qabeelon kay bahut say aisay log yahoodaah men muntaqil huay jo pooray dil say rabb israaeel kay khuda kay taalib rahay thay. vah yarooshalam aaay taaki rabb apnay baapdaada kay khuda ko qurbaaniyaan pesh kar saken. ¹⁷yahoodaah kee saltanat nay aisay logon say taqviyat paaee. vah rahubiaam bin sulemaan kay liyay teen saal tak mazbootee ka sabab thay, kyoonki teen saal tak yahoodaah daaood aur sulemaan kay achchhay namoonay par chalta raha.

rahubiaam ka khaandaan

¹⁸rahubiaam kee shaadee mahelat say huee jo yareemot aur abeekhail kee betee thee. yareemot daaood ka beta aur abeekhail iliyaab bin yassee kee betee thee. ¹⁹mahelat kay teen betay yaoos, samariyaah aur zahem paida huay. ²⁰baad men rahubiaam kee maaka bint abeesloom say shaadee huee. is rishtay say chaar betay abiyaah, attee, zeeza aur saloomeet paida huay. ²¹rahubiaam kee 18 beeviyaan aur 60 daashtaaen theen. in kay kul 28 betay aur 60 betiyaan paida hueen. lekin maaka bint abeesloom rahubiaam ko sab say ziyaada piyaaree thee. ²²us nay maaka kay pahelauthay abiyaah ko us kay bhaaiyon ka sarbaraah bana diya aur muqarrar kiya ki yah beta meray baad baadshaah banega. ²³rahubiaam nay apnay beton say badee samajhdaaree kay saath sulook kiya, kyoonki us nay unhen alag alag karkay yahoodaah aur binyameen kay pooray qabaailee ilaaqay aur tamaam qil’aaband shaheron men basa diya. saath saath vah unhen kasrat kee khuraak aur beeviyaan muhayya karta raha.