2 Tavaareekh 13

yahoodaah ka baadshaah abiyaah

¹abiyaah israaeel kay baadshaah yarubiaam avval kee hukoomat kay 18ven saal men yahoodaah ka baadshaah bana. ²vah teen saal baadshaah raha, aur us ka daar-ul-hakoomat yarooshalam tha. us kee maan maaka bint ooreeel jibia kee rahenay vaalee thee.

ek din abiyaah aur yarubiaam kay darmiyaan jang chhid gaee. ³4,00,000 tajaribaakaar faujiyon ko jama karkay abiyaah yarubiaam say ladnay kay liyay nikla. yarubiaam 8,00,000 tajaribaakaar faujiyon kay saath us kay muqaabil saf’aara hua. ⁴phir abiyaah nay ifraaeem kay pahaadee ilaaqay kay pahaad samraim par chadh kar buland aavaaz say pukaara,

“yarubiaam aur tamaam israaeeliyo, meree baat sunen! ⁵kya aap ko naheen maaloom ki rabb israaeel kay khuda nay daaood say namak ka abdee ahd baandh kar usay aur us kee aulaad ko hamesha kay liyay israaeel kee saltanat ata kee hai? ⁶to bhee sulemaan bin daaood ka mulaazim yarubiaam bin nabaat apnay maalik kay khilaaf uth kar baaghee ho gaya. ⁷us kay ird-gird kuchh badam’aash jama huay aur rahubiaam bin sulemaan kee mukhaalafat karnay lagay. us vaqt vah javaan aur naatajaribaakaar tha, is liyay un ka saheeh muqaabla na kar saka.

⁸aur ab aap vaaqaee samajhtay hain ki ham rabb kee baadshaahee par fatah pa saktay hain, usee baadshaahee par jo daaood kee aulaad kay haath men hai. aap samajhtay hain ki aap kee fauj bahut hee badee hai, aur ki sonay kay bachhday aap kay saath hain, vahee but jo yarubiaam nay aap kee pooja kay liyay tayyaar kar rakhay hain. ⁹lekin aap nay rabb kay imaamon yaanee haaroon kee aulaad ko laaviyon samet mulk say nikaal kar un kee jagah aisay pujaaree khidmat kay liyay muqarrar kiay jaisay butparast qaumon men paaay jaatay hain. jo bhee chaahata hai ki usay makhsoos karkay imaam banaaya jaaay usay sirf ek javaan bail aur saat mendhay pesh karnay kee zaroorat hai. yah in naam-nihaad khudaaon ka pujaaree bannay kay liyay kaafee hai.

¹⁰lekin jahaan tak hamaara taalluq hai rabb hee hamaara khuda hai. ham nay usay tark naheen kiya. sirf haaroon kee aulaad hee hamaaray imaam hain. sirf yah aur laavee rabb kee khidmat kartay hain. ¹¹yahee subah-shaam usay bhasm honay vaalee qurbaaniyaan aur khushboodaar bakhoor pesh kartay hain. paak mez par rabb kay liyay makhsoos rotiyaan rakhna aur sonay kay shamaadaan kay charaagh jalaana in hee kee zimmaadaaree rahee hai. gharaz, ham rabb apnay khuda kee hidaayaat par amal kartay hain jabki aap nay usay tark kar diya hai. ¹²chunaanchay allaah hamaaray saath hai. vahee hamaara raahanuma hai, aur us kay imaam turam baja kar aap say ladnay ka elaan karengay. israaeel kay mardo, khabardaar! rabb apnay baapdaada kay khuda say mat ladna. yah jang aap jeet hee naheen saktay!”

¹³itnay men yarubiaam nay chupkay say kuchh daston ko yahoodaah kee fauj kay peechhay bhej diya taaki vahaan taak men baith jaaen. yoon us kee fauj ka ek hissa yahoodaah kee fauj kay saamnay aur doosra hissa us kay peechhay tha. ¹⁴achaanak yahoodaah kay faujiyon ko pata chala ki dushman saamnay aur peechhay say ham par hamla kar raha hai. cheekhtay chillaatay huay unhon nay rabb say madad maangee. imaamon nay apnay turam bajaay ¹⁵aur yahoodaah kay mardon nay jang ka naara lagaaya. jab un kee aavaazen buland hueen to allaah nay yarubiaam aur tamaam israaeeliyon ko shikast day kar abiyaah aur yahoodaah kee fauj kay saamnay say bhaga diya. ¹⁶israaeelee faraar huay, lekin allaah nay unhen yahoodaah kay havaalay kar diya. ¹⁷abiyaah aur us kay log unhen bada nuqsaan pahuncha sakay. israaeel kay 5,00,000 tajaribaakaar faujee maidaan-ay-jang men maaray gaay. ¹⁸us vaqt israaeel kee badee beizzatee huee jabki yahoodaah ko taqviyat milee. kyoonki vah rabb apnay baapdaada kay khuda par bharosa rakhtay thay.

¹⁹abiyaah nay yarubiaam ka taaqqub kartay kartay us say teen shaher gird-o-navaah kee aabaadiyon samet chheen liyay, bait-el, yasaana aur ifron. ²⁰abiyaah kay jeetay jee yarubiaam dubaara taqviyat na pa saka, aur thodee der kay baad rabb nay usay maar diya. ²¹us kay muqaablay men abiyaah kee taaqat badhtee gaee. us kee 14 beeviyon kay 22 betay aur 16 betiyaan paida hueen.

²²baaqee jo kuchh abiyaah kee hukoomat kay dauraan hua aur jo kuchh us nay kiya aur kaha, vah iddoo nabee kee kitaab men bayaan kiya gaya hai.