2 Tavaareekh 14

¹jab abiyaah mar kar apnay baapdaada say ja mila to usay yarooshalam kay us hissay men dafnaaya gaya jo ‘daaood ka shaher’ kahelaata hai. phir us ka beta aasa takhtnasheen hua.

yahoodaah ka baadshaah aasaa

aasa kee hukoomat kay tahet mulk men 10 saal tak amn-o-amaan qaaim raha. ²aasa vah kuchh karta raha jo rabb us kay khuda kay nazdeek achchha aur theek tha. ³us nay ajnabee maaboodon kee qurbaanagaahon ko oonchee jagahon kay mandiron samet gira kar devtaaon kay liyay makhsoos kiay gaay satoonon ko tukday tukday kar diya aur yaseerat devee kay khambay kaat daalay. ⁴saath saath us nay yahoodaah kay baashindon ko hidaayat dee ki vah rabb apnay baapdaada kay khuda kay taalib hon aur us kay ahkaam kay taabay rahen. ⁵yahoodaah kay tamaam shaheron say us nay bakhoor kee qurbaangaahen aur oonchee jagahon kay mandir door kar diay. chunaanchay us kee hukoomat kay dauraan baadshaahee men sukoon raha.

⁶amn-o-amaan kay in saalon kay dauraan aasa yahoodaah men kaee shaheron kee qil’aabandee kar saka. jang ka khatra naheen tha, kyoonki rabb nay usay sukoon muhayya kiya. ⁷baadshaah nay yahoodaah kay baashindon say kaha, “aaen, ham in shaheron kee qil’aabandee karen! ham in kay ird-gird faseelen bana kar unhen burjon, darvaazon aur kundon say mazboot karen. kyoonki ab tak mulk hamaaray haath men hai. choonki ham rabb apnay khuda kay taalib rahay hain is liyay us nay hamen chaaron taraf sulah-salaamatee muhayya kee hai.” chunaanchay qil’aabandee ka kaam shuroo hua balki takmeel tak pahunch saka.

ethopiya par fatah

⁸aasa kee fauj men badee dhaalon aur nezon say les yahoodaah kay 3,00,000 afraad thay. is kay ilaava chhotee dhaalon aur kamaanon say musallah binyameen kay 2,80,000 afraad thay. sab tajaribaakaar faujee thay.

⁹ek din ethopiya kay baadshaah zaarah nay yahoodaah par hamla kiya. us kay beshumaar faujee aur 300 rath thay. badhtay badhtay vah maresa tak pahunch gaya. ¹⁰aasa us ka muqaabla karnay kay liyay nikla. vaadee-ay-safaata men donon faujen ladnay kay liyay saf’aara hueen. ¹¹aasa nay rabb apnay khuda say iltimaas kee, “ai rabb, sirf too hee bebason ko taaqatavaron kay hamlon say mahfooz rakh sakta hai. ai rabb hamaaray khuda, hamaaree madad kar! kyoonki ham tujh par bharosa rakhtay hain. tera hee naam lay kar ham is badee fauj ka muqaabla karnay kay liyay niklay hain. ai rabb, too hee hamaara khuda hai. aisa na honay day ki insaan teree marzee kee khilaafvarzee karnay men kaamyaab ho jaaay.”

¹²tab rabb nay aasa aur yahoodaah kay dekhtay dekhtay dushman ko shikast dee. ethopiya kay faujee faraar huay, ¹³aur aasa nay apnay faujiyon kay saath jiraar tak un ka taaqqub kiya. dushman kay itnay afraad halaak huay ki us kee fauj baad men bahaal na ho sakee. rabb khud aur us kee fauj nay dushman ko tabaah kar diya tha. yahoodaah kay mardon nay bahut sa maal loot liya. ¹⁴vah jiraar kay ird-gird kay shaheron par bhee qabza karnay men kaamyaab huay, kyoonki maqaamee logon men rabb kee dahshat phail gaee thee. nateejay men in shaheron say bhee bahut sa maal chheen liya gaya. ¹⁵is muhimm kay dauraan unhon nay gallaabaanon kee khaimaagaahon par bhee hamla kiya aur un say kasrat kee bhed-bakriyaan aur oont loot kar apnay saath yarooshalam lay aaay.