2 Tavaareekh 16

shaam kay saath aasa ka muaahadaa

¹aasa kee hukoomat kay 36ven saal men israaeel kay baadshaah baasha nay yahoodaah par hamla karkay raama shaher kee qil’aabandee kee. maqsad yah tha ki na koee yahoodaah kay mulk men daakhil ho sakay, na koee vahaan say nikal sakay.

²javaab men aasa nay shaam kay baadshaah bin-hadad kay paas vafad bheja jis ka daar-ul-hakoomat damishq tha. us nay rabb kay ghar aur shaahee mahel kay khazaanon kee sona-chaandee vafad kay sapurd karkay damishq kay baadshaah ko paighaam bheja, ³“mera aap kay saath ahd hai jis tarah meray baap ka aap kay baap kay saath ahd tha. guzaarish hai ki aap sonay-chaandee ka yah tuhfa qabool karkay israaeel kay baadshaah baasha kay saath apna ahd mansookh kar den taaki vah meray mulk say nikal jaaay.”

⁴bin-hadad muttafiq hua. us nay apnay faujee afsaron ko israaeel kay shaheron par hamla karnay kay liyay bhej diya to unhon nay aiyyoon, daan, abeel-maaim aur naftaalee kay un tamaam shaheron par qabza kar liya jin men shaahee godaam thay. ⁵jab baasha ko is kee khabar milee to us nay raama kee qil’aabandee karnay say baaz a kar apnee yah muhimm chhod dee.

⁶phir aasa baadshaah nay yahoodaah kay tamaam mardon kee bhartee karkay unhen raama bhej diya taaki vah un tamaam pattharon aur shaheteeron ko utha kar lay jaaen jin say baasha baadshaah raama kee qil’aabandee karna chaahata tha. is saamaan say aasa nay jiba aur misfaah shaheron kee qil’aabandee kee.

aasa kay aakhiree saal aur maut

⁷us vaqt hanaanee ghaibbeen yahoodaah kay baadshaah aasa ko milnay aaya. us nay kaha, “afsos ki aap nay rabb apnay khuda par etimaad na kiya balki araam kay baadshaah par, kyoonki is ka bura nateeja nikla hai. rabb shaam kay baadshaah kee fauj ko aap kay havaalay karnay kay liyay tayyaar tha, lekin ab yah mauqa jaata raha hai. ⁸kya aap bhool gaay hain ki ethopiya aur libiya kee kitnee badee fauj aap say ladnay aaee thee? un kay saath kasrat kay rath aur ghudsavaar bhee thay. lekin us vaqt aap nay rabb par etimaad kiya, aur javaab men us nay unhen aap kay havaalay kar diya. ⁹rabb to apnee nazar pooree roo-ay-zameen par daudaata raheta hai taaki un kee taqviyat karay jo pooree vafaadaaree say us say liptay rahetay hain. aap kee ahemaqaana harkat kee vajah say aap ko ab say mutvaatir jangen tang kartee rahengee.” ¹⁰yah sun kar aasa ghussay say laal-peela ho gaya. aapay say baahar ho kar us nay hukm diya ki nabee ko giriftaar karkay us kay paaon kaath men thonko. us vaqt say aasa apnee qaum kay kaee logon par zulm karnay laga.

¹¹baaqee jo kuchh shuroo say lay kar aakhir tak aasa kee hukoomat kay dauraan hua vah ‘shaahaan-ay-yahoodaah-o-israaeel kee taareekh’ kee kitaab men bayaan kiya gaya hai. ¹²hukoomat kay 39ven saal men us kay paaon ko beemaaree lag gaee. go us kee buree haalat thee to bhee us nay rabb ko talaash na kiya balki sirf daaktaron kay peechhay pad gaya. ¹³hukoomat kay 41ven saal men aasa mar kar apnay baapdaada say ja mila. ¹⁴us nay yarooshalam kay us hissay men jo ‘daaood ka shaher’ kahelaata hai apnay liyay chataan men qabr taraashee thee. ab usay is men dafan kiya gaya. janaazay kay vaqt logon nay laash ko ek palang par litaaya diya jo balsaan kay tel aur mukhtalif qism kay khushboodaar marhamon say dhaampa gaya tha. phir us kay ehatiraam men lakdee ka zabardast dher jalaaya gaya.