2 Tavaareekh 17

yahoodaah ka baadshaah yahoosafat

¹aasa kay baad us ka beta yahoosafat takhtnasheen hua. us nay yahoodaah kee taaqat badhaaee taaki vah israaeel ka muqaabla kar sakay. ²yahoodaah kay tamaam qil’aaband shaheron men us nay dastay bithaaay. yahoodaah kay pooray qabaailee ilaaqay men us nay chaukiyaan tayyaar kar rakheen aur isee tarah ifraaeem kay un shaheron men bhee jo us kay baap aasa nay israaeel say chheen liyay thay. ³rabb yahoosafat kay saath tha, kyoonki vah daaood kay namoonay par chalta tha aur baal devtaaon kay peechhay na laga. ⁴israaeel kay baadshaahon kay bar’aks vah apnay baap kay khuda ka taalib raha aur us kay ahkaam par amal karta raha. ⁵isee liyay rabb nay yahoodaah par yahoosafat kee hukoomat ko taaqatvar bana diya. log tamaam yahoodaah say a kar usay tuhfay detay rahay, aur usay badee daulat aur izzat milee. ⁶rabb kee raahon par chaltay chaltay usay bada hausla hua aur nateejay men us nay oonchee jagahon kay mandiron aur yaseerat devee kay khambon ko yahoodaah say door kar diya.

⁷apnee hukoomat kay teesray saal kay dauraan yahoosafat nay apnay mulaazimon ko yahoodaah kay tamaam shaheron men bheja taaki vah logon ko rabb kee shareeat kee taaleem den. in afsaron men bin-khail, abadiyaah, zakariyaah, nataneeel aur meekaayaah shaamil thay. ⁸un kay saath 9 laavee banaam samaayaah, nataniyaah, zabadiyaah, asaahel, sameeraamot, yahoonatan, adooniyaah, toobiyaah, aur toob-adooniyaah thay. imaamon kee taraf say ileesma aur yahooraam saath gaay. ⁹rabb kee shareeat kee kitaab apnay saath lay kar in aadmiyon nay yahoodaah men shaher-ba-shaher ja kar logon ko taaleem dee.

¹⁰us vaqt yahoodaah kay padosee mamaalik par rabb ka khauf chha gaya, aur unhon nay yahoosafat say jang karnay kee jur’at na kee. ¹¹kharaaj kay taur par usay filistiyon say hadiay aur chaandee miltee thee, jabki arab usay 7,700 mendhay aur 7,700 bakray diya kartay thay. ¹²yoon yahoosafat kee taaqat badhtee gaee. yahoodaah kee kaee jagahon par us nay qilaay aur shaahee godaam kay shaher taameer kiay. ¹³saath saath us nay yahoodaah kay shaheron men zarooriyaat-ay-zindagee kay baday zakheeray jama kiay aur yarooshalam men tajaribaakaar faujee rakhay.

¹⁴yahoosafat kee fauj ko kumbon kay mutaabiq tarteeb diya gaya tha. yahoodaah kay qabeelay ka kamaandar adna tha. us kay tahet 3,00,000 tajaribaakaar faujee thay. ¹⁵us kay ilaava yoohanaan tha jis kay tahet 2,80,000 afraad the ¹⁶aur amasiyaah bin zikree jis kay tahet 2,00,000 afraad thay. amasiyaah nay apnay aap ko razaakaaraana taur par rabb kee khidmat kay liyay vaqf kar diya tha. ¹⁷binyameen kay qabeelay ka kamaandar ilyada tha jo zabardast faujee tha. us kay tahet kamaan aur dhaalon say les 2,00,000 faujee thay. ¹⁸us kay ilaava yahoozabad tha jis kay 1,80,000 musallah aadmee thay.

¹⁹sab fauj men baadshaah kee khidmat sar’anjaam detay thay. un men vah faujee naheen shumaar kiay jaatay thay jinhen baadshaah nay pooray yahoodaah kay qil’aaband shaheron men rakha hua tha.