2 Tavaareekh 2

rabb kay ghar kee taameer kee tayyaariyaan

¹phir sulemaan nay rabb kay liyay ghar aur apnay liyay shaahee mahel banaanay ka hukm diya. ²is kay liyay us nay 1,50,000 aadmiyon kee bhartee kee. 80,000 ko us nay pahaadee kaanon men lagaaya taaki vah patthar nikaalen jabki 70,000 afraad kee zimmaadaaree yah patthar yarooshalam laana thee. in sab par sulemaan nay 3,600 nigraan muqarrar kiay. ³us nay soor kay baadshaah heeraam ko ittila dee, “jis tarah aap meray baap daaood ko deodaar kee lakdee bhejtay rahay jab vah apnay liyay mahel bana rahay thay usee tarah mujhay bhee deodaar kee lakdee bhejen. ⁴main ek ghar taameer karkay usay rabb apnay khuda kay naam kay liyay makhsoos karna chaahata hoon. kyoonki hamen aisee jagah kee zaroorat hai jis men us kay huzoor khushboodaar bakhoor jalaaya jaaay, rabb kay liyay makhsoos rotiyaan baaqaaidagee say mez par rakhee jaaen aur khaas mauqon par bhasm honay vaalee qurbaaniyaan pesh kee jaaen yaanee har subah-o-shaam, sabat kay din, naay chaand kee eedon aur rabb hamaaray khuda kee deegar muqarrara eedon par. yah israaeel ka daaimee farz hai.

⁵jis ghar ko main banaanay ko hoon vah nihaayat azeem hoga, kyoonki hamaara khuda deegar tamaam maaboodon say kaheen azeem hai. ⁶lekin kaun us kay liyay aisa ghar bana sakta hai jo us kay laaiq ho? bulandtareen aasmaan bhee us kee rihaaish kay liyay chhota hai. to phir meree kya haisiyat hai ki us kay liyay ghar banaaoon? main sirf aisee jagah bana sakta hoon jis men us kay liyay qurbaaniyaan chadhaaee ja saken.

⁷chunaanchay meray paas kisee aisay samajhdaar kaareegar ko bhej den jo mahaarat say sonay-chaandee, peetal aur lohay ka kaam jaanta ho. vah neelay, arghvaanee aur qirmizee rang ka kapda banaanay aur kandaakaaree ka ustaad bhee ho. aisa shakhs yarooshalam aur yahoodaah men meray un kaareegaron ka inchaarj banay jinhen meray baap daaood nay kaam par lagaaya hai. ⁸is kay ilaava mujhay lubnaan say deodaar, jooneepar aur deegar qeemtee darakhton kee lakdee bhej den. kyoonki main jaanta hoon ki aap kay log umda qism kay lakadahaaray hain. meray aadmee aap kay logon kay saath mil kar kaam karengay. ⁹hamen bahut see lakdee kee zaroorat hogee, kyoonki jo ghar main banaana chaahata hoon vah bada aur shaandaar hoga. ¹⁰aap kay lakkadahaaron kay kaam kay muaavazay men main 32,75,000 kilograam gandum, 27,00,000 kilograam jau, 4,40,000 litar mai aur 4,40,000 litar zaitoon ka tel doonga.”

¹¹soor kay baadshaah heeraam nay khat likh kar sulemaan ko javaab diya, “rabb apnee qaum ko piyaar karta hai, is liyay us nay aap ko us ka baadshaah banaaya hai. ¹²rabb israaeel kay khuda kee hamd ho jis nay aasmaan-o-zameen ko khalaq kiya hai ki us nay daaood baadshaah ko itna daanishmand beta ata kiya hai. us kee tamjeed ho ki yah aqalmand aur samajhdaar beta rabb kay liyay ghar aur apnay liyay mahel taameer karega. ¹³main aap kay paas ek maahir aur samajhdaar kaareegar ko bhej deta hoon jis ka naam heeraam-abee hai. ¹⁴us kee israaeelee maan, daan kay qabeelay kee hai jabki us ka baap soor ka hai. heeraam sonay-chaandee, peetal, lohay, patthar aur lakdee kee cheezen banaanay men mahaarat rakhta hai. vah neelay, arghvaanee aur qirmizee rang ka kapda aur kataan ka baareek kapda bana sakta hai. vah har qism kee kandaakaaree men bhee maahir hai. jo bhee mansooba usay pesh kiya jaaay usay vah paaya-ay-takmeel tak pahuncha sakta hai. yah aadmee aap kay aur aap kay muazzaz baap daaood kay kaareegaron kay saath mil kar kaam karega. ¹⁵chunaanchay jis gandum, jau, zaitoon kay tel aur mai ka zikr meray aaqa nay kiya vah apnay khaadimon ko bhej den. ¹⁶muaavazay men ham aap kay liyay darkaar darakhton ko lubnaan men katavaaengay aur un kay beday baandh kar samundar kay zareeay yaafa shaher tak pahuncha dengay. vahaan say aap unhen yarooshalam lay ja sakengay.”

¹⁷sulemaan nay israaeel men aabaad tamaam ghairmulkiyon kee mardumashumaaree karvaaee. (us kay baap daaood nay bhee un kee mardumashumaaree karvaaee thee.) maaloom hua ki israaeel men 1,53,600 ghairmulkee rahetay hain. ¹⁸in men say us nay 80,000 ko pahaadee kaanon men lagaaya taaki vah patthar nikaalen jabki 70,000 afraad kee zimmaadaaree yah patthar yarooshalam laana thee. in sab par sulemaan nay 3,600 nigraan muqarrar kiay.