2 Tavaareekh 21

¹jab yahoosafat mar kar apnay baapdaada say ja mila to usay yarooshalam kay us hissay men jo ‘daaood ka shaher’ kahelaata hai khaandaanee qabr men dafan kiya gaya. phir us ka beta yahooraam takhtnasheen hua.

yahoodaah ka baadshaah yahooraam

²yahoosafat kay baaqee betay azariyaah, yaheeel, zakariyaah, azariyaahoo, meekaael aur safatiyaah thay. ³yahoosafat nay unhen bahut sona-chaandee aur deegar qeemtee cheezen day kar yahoodaah kay qil’aaband shaheron par muqarrar kiya tha. lekin yahooraam ko us nay pahelautha honay kay baais apna jaansheen banaaya tha. ⁴baadshaah bannay kay baad jab yahoodaah kee hukoomat mazbootee say us kay haath men thee to yahooraam nay apnay tamaam bhaaiyon ko yahoodaah kay kuchh raahanumaaon samet qatl kar diya.

⁵yahooraam 32 saal kee umr men baadshaah bana, aur vah yarooshalam men rah kar 8 saal tak hukoomat karta raha. ⁶us kee shaadee israaeel kay baadshaah akhiyab kee betee say huee thee, aur vah israaeel kay baadshaahon aur khaaskar akhiyab kay khaandaan kay buray namoonay par chalta raha. us ka chaal-chalan rabb ko naapsand tha. ⁷to bhee vah daaood kay gharaanay ko tabaah naheen karna chaahata tha, kyoonki us nay daaood say ahd baandh kar vaada kiya tha ki tera aur teree aulaad ka charaagh hamesha tak jalta rahega.

⁸yahooraam kee hukoomat kay dauraan adomiyon nay baghaavat kee aur yahoodaah kee hukoomat ko radd karkay apna baadshaah muqarrar kiya. ⁹tab yahooraam apnay afsaron aur tamaam rathon ko lay kar un kay paas pahuncha. jab jang chhid gaee to adomiyon nay usay aur us kay rathon par muqarrar afsaron ko gher liya, lekin raat ko baadshaah ghernay vaalon kee safon ko todnay men kaamyaab ho gaya. ¹⁰to bhee mulk-ay-adom aaj tak dubaara yahoodaah kee hukoomat kay tahet naheen aaya. usee vaqt libna shaher bhee sarkash ho kar khudmukhtaar ho gaya. yah sab kuchh is liyay hua ki yahooraam nay rabb apnay baapdaada kay khuda ko tark kar diya tha, ¹¹yahaan tak ki us nay yahoodaah kay pahaadee ilaaqay men kaee oonchee jagahon par mandir banvaaay aur yarooshalam kay baashindon ko rabb say bevafa ho jaanay par uksaaya. pooray yahoodaah ko vah butparastee kee ghalat raah par lay aaya.

¹²tab yahooraam ko ilyaas nabee say khat mila jis men likha tha, “rabb aap kay baap daaood ka khuda farmaata hai, ‘too apnay baap yahoosafat aur apnay daada aasa baadshaah kay achchhay namoonay par naheen chalaa ¹³balki israaeel kay baadshaahon kee ghalat raahon par. bilkul akhiyab kay khaandaan kee tarah too yarooshalam aur pooray yahoodaah kay baashindon ko butparastee kee raah par laaya hai. aur yah teray liyay kaafee naheen tha, balki too nay apnay sagay bhaaiyon ko bhee jo tujh say behatar thay qatl kar diya. ¹⁴is liyay rabb teree qaum, teray beton aur teree beeviyon ko teree pooree milkiyat samet badee museebat men daalnay ko hai. ¹⁵too khud beemaar ho jaaega. laailaaj marz kee zad men a kar tujhay badee der tak takleef hogee. aakhirkaar teree antadiyaan jism say nikalengee’.”

¹⁶un dinon men rabb nay filistiyon aur ethopiya kay pados men rahenay vaalay arab qabeelon ko yahooraam par hamla karnay kee tahereek dee. ¹⁷yahoodaah men ghus kar vah yarooshalam tak pahunch gaay aur baadshaah kay mahel ko lootnay men kaamyaab huay. tamaam maal-o-asbaab kay ilaava unhon nay baadshaah kay beton aur beeviyon ko bhee chheen liya. sirf sab say chhota beta yahooaakhaz yaanee akhaziyaah bach nikla.

¹⁸is kay baad rabb ka ghazab baadshaah par naazil hua. usay laailaaj beemaaree lag gaee jis say us kee antadiyaan mut’assir hueen. ¹⁹baadshaah kee haalat bahut kharaab hotee gaee. do saal kay baad antadiyaan jism say nikal gaeen. yahooraam shadeed dard kee haalat men kooch kar gaya. janaazay par us kee qaum nay us kay ehatiraam men lakdee ka bada dher na jalaaya, go unhon nay yah us kay baapdaada kay liyay kiya tha.

²⁰yahooraam 32 saal kee umr men baadshaah bana aur yarooshalam men rah kar 8 saal tak hukoomat karta raha tha. jab faut hua to kisee ko bhee afsos na hua. usay yarooshalam shaher kay us hissay men dafan to kiya gaya jo ‘daaood ka shaher’ kahelaata hai, lekin shaahee qabron men naheen.