2 Tavaareekh 22

yahoodaah ka baadshaah akhaziyaah

¹yarooshalam kay baashindon nay yahooraam kay sab say chhotay betay akhaziyaah ko takht par bitha diya. baaqee tamaam beton ko un luteron nay qatl kiya tha jo arbon kay saath shaahee lashkargaah men ghus aaay thay. yahee vajah thee ki yahoodaah kay baadshaah yahooraam ka beta akhaziyaah baadshaah bana. ²vah 22 saal kee umr men takhtnasheen hua aur yarooshalam men rah kar ek saal baadshaah raha. us kee maan ataliyaah israaeel kay baadshaah umree kee potee thee. ³akhaziyaah bhee akhiyab kay khaandaan kay ghalat namoonay par chal pada, kyoonki us kee maan usay bedeen raahon par chalnay par ubhaartee rahee. ⁴baap kee vafaat par vah akhiyab kay gharaanay kay mashvray par chalnay laga. nateejay men us ka chaal-chalan rabb ko naapsand tha. aakhirkaar yahee log us kee halaakat ka sabab ban gaay.

⁵in hee kay mashvray par vah israaeel kay baadshaah yooraam bin akhiyab kay saath mil kar shaam kay baadshaah hazaael say ladnay kay liyay nikla. jab raamaat-jiliaad kay qareeb jang chhid gaee to yooraam shaam kay faujiyon kay haathon zakhmee huaa ⁶aur maidaan-ay-jang ko chhod kar yazrael vaapas aaya taaki zakhm bhar jaaen. jab vah vahaan thahera hua tha to yahoodaah ka baadshaah akhaziyaah bin yahooraam us ka haal poochhnay kay liyay yazrael aaya. ⁷lekin allaah kee marzee thee ki yah mulaaqaat akhaziyaah kee halaakat ka baais banay. vahaan pahunch kar vah yooraam kay saath yaahoo bin nimsee say milnay kay liyay nikla, vahee yaahoo jisay rabb nay masah karkay akhiyab kay khaandaan ko nest-o-naabood karnay kay liyay makhsoos kiya tha. ⁸akhiyab kay khaandaan kee adaalat kartay kartay yaahoo kee mulaaqaat yahoodaah kay kuchh afsaron aur akhaziyaah kay baaz rishtedaaron say huee jo akhaziyaah kee khidmat men us kay saath aaay thay. inhen qatl karke ⁹yaahoo akhaziyaah ko dhoondnay laga. pata chala ki vah saamriya shaher men chhup gaya hai. usay yaahoo kay paas laaya gaya jis nay usay qatl kar diya. to bhee usay izzat kay saath dafan kiya gaya, kyoonki logon nay kaha, “aakhir vah yahoosafat ka pota hai jo pooray dil say rabb ka taalib raha.” us vaqt akhaziyaah kay khaandaan men koee na paaya gaya jo baadshaah ka kaam sambhaal sakta.

ataliyaah kee zaalimaana hukoomat

¹⁰jab akhaziyaah kee maan ataliyaah ko maaloom hua ki mera beta mar gaya hai to vah yahoodaah kay pooray shaahee khaandaan ko qatl karnay lagee. ¹¹lekin akhaziyaah kee sagee bahen yahoosaba nay akhaziyaah kay chhotay betay yooaas ko chupkay say un shahezaadon men say nikaal liya jinhen qatl karna tha aur usay us kee daaya kay saath ek stor men chhupa diya jis men bistar vaghaira mahfooz rakhay jaatay thay. vahaan vah ataliyaah kee girift say mahfooz raha. yahoosaba yahoyada imaam kee beevee thee. ¹²baad men yooaas ko rabb kay ghar men muntaqil kiya gaya jahaan vah un kay saath un chhah saalon kay dauraan chhupa raha jab ataliyaah malika thee.