2 Tavaareekh 23

ataliyaah ka anjaam aur yooaas kee hukoomat

¹ataliyaah kee hukoomat kay saatven saal men yahoyada nay jur’at karkay sau sau faujiyon par muqarrar paanch afsaron say ahd baandha. un kay naam azariyaah bin yarohaam, ismaaeel bin yoohanaan, azariyaah bin obed, maasiyaah bin adaayaah aur ileesaafat bin zikree thay. ²in aadmiyon nay chupkay say yahoodaah kay tamaam shaheron men say guzar kar laaviyon aur israaeelee khaandaanon kay sarparaston ko jama kiya aur phir un kay saath mil kar yarooshalam aaay. ³allaah kay ghar men pooree jamaaat nay javaan baadshaah yooaas kay saath ahd baandha.

yahoyada un say mukhaatib hua, “hamaaray baadshaah ka beta hee ham par hukoomat karay, kyoonki rabb nay muqarrar kiya hai ki daaood kee aulaad yah zimmaadaaree sambhaalay. ⁴chunaanchay aglay sabat kay din aap imaamon aur laaviyon men say jitnay dyootee par aaengay vah teen hisson men taqseem ho jaaen. ek hissa rabb kay ghar kay darvaazon par pahera day, ⁵doosra shaahee mahel par aur teesra bunyaad naamee darvaazay par. baaqee sab aadmee rabb kay ghar kay sahenon men jama ho jaaen. ⁶khidmat karnay vaalay imaamon aur laaviyon kay siva koee aur rabb kay ghar men daakhil na ho. sirf yahee andar ja saktay hain, kyoonki rabb nay unhen is khidmat kay liyay makhsoos kiya hai. laazim hai ki pooree qaum rabb kee hidaayaat par amal karay. ⁷baaqee laavee baadshaah kay ird-gird daaira bana kar apnay hathiyaaron ko pakday rakhen aur jahaan bhee vah jaaay usay gheray rakhen. jo bhee rabb kay ghar men ghusnay kee koshish karay usay maar daalna.”

⁸laavee aur yahoodaah kay in tamaam mardon nay aisa hee kiya. aglay sabat kay din sab apnay bandon samet us kay paas aaay, vah bhee jin kee dyootee thee aur vah bhee jin kee ab chhuttee thee. kyoonki yahoyada nay khidmat karnay vaalon men say kisee ko bhee jaanay kee ijaazat naheen dee thee. ⁹imaam nay sau sau faujiyon par muqarrar afsaron ko daaood baadshaah kay vah nezay aur chhotee aur badee dhaalen deen jo ab tak rabb kay ghar men mahfooz rakhee huee theen. ¹⁰phir us nay faujiyon ko baadshaah kay ird-gird khada kiya. har ek apnay hathiyaar pakday tayyaar tha. qurbaangaah aur rabb kay ghar kay darmiyaan un ka daaira rabb kay ghar kee junoobee deevaar say lay kar us kee shimaalee deevaar tak phaila hua tha. ¹¹phir vah yooaas ko baahar laaay aur us kay sar par taaj rakh kar usay qavaaneen kee kitaab day dee. yoon yooaas ko baadshaah bana diya gaya. unhon nay usay masah kiya aur buland aavaaz say naara lagaanay lagay, “baadshaah zindaabaad!”

¹²logon ka shor ataliyaah tak pahuncha, kyoonki sab daud kar jama ho rahay aur baadshaah kee khushee men naaray laga rahay thay. vah rabb kay ghar kay sahen men un kay paas aaee ¹³to kya dekhtee hai ki naya baadshaah darvaazay kay qareeb us satoon kay paas khada hai jahaan baadshaah rivaaj kay mutaabiq khada hota hai, aur vah afsaron aur turam bajaanay vaalon say ghira hua hai. tamaam ummat bhee saath khadee turam baja baja kar khushee mana rahee hai. saath saath gulookaar apnay saaz baja kar hamd kay geet gaanay men raahanumaaee kar rahay hain. ataliyaah ranjish kay maaray apnay kapday phaad kar cheekh uthee, “ghaddaaree, ghaddaaree!”

¹⁴yahoyada imaam nay sau sau faujiyon par muqarrar un afsaron ko bulaaya jin kay sapurd fauj kee gaee thee aur unhen hukm diya, “usay baahar lay jaaen, kyoonki munaasib naheen ki usay rabb kay ghar kay paas maara jaaay. aur jo bhee us kay peechhay aaay usay talvaar say maar dena.” ¹⁵vah ataliyaah ko pakad kar vahaan say baahar lay gaay aur usay ghodon kay darvaazay par maar diya jo shaahee mahel kay paas tha.

¹⁶phir yahoyada nay qaum aur baadshaah kay saath mil kar rabb say ahd baandh kar vaada kiya ki ham rabb kee qaum rahengay. ¹⁷is kay baad sab baal kay mandir par toot paday aur usay dha diya. us kee qurbaanagaahon aur buton ko tukday tukday karkay unhon nay baal kay pujaaree mattaan ko qurbaanagaahon kay saamnay hee maar daala.

¹⁸yahoyada nay imaamon aur laaviyon ko dubaara rabb kay ghar ko sambhaalnay kee zimmaadaaree dee. daaood nay unhen khidmat kay liyay gurohon men taqseem kiya tha. us kee hidaayaat kay mutaabiq un hee ko khushee manaatay aur geet gaatay huay bhasm honay vaalee qurbaaniyaan pesh karnee theen, jis tarah moosa kee shareeat men likha hai. ¹⁹rabb kay ghar kay darvaazon par yahoyada nay darbaan khaday kiay taaki aisay logon ko andar aanay say roka jaaay jo kisee bhee vajah say naapaak hon.

²⁰phir vah sau sau faujiyon par muqarrar afsaron, asar-o-rasookh vaalon, qaum kay hukmaraanon aur baaqee pooree ummat kay hamraah juloos nikaal kar baadshaah ko baalaaee darvaazay say ho kar shaahee mahel men lay gaya. vahaan unhon nay baadshaah ko takht par bitha diya, ²¹aur tamaam ummat khushee manaatee rahee. yoon yarooshalam shaher ko sukoon mila, kyoonki ataliyaah ko talvaar say maar diya gaya tha.