2 Tavaareekh 24

yooaas rabb kay ghar kee marammat karvaata hai

¹yooaas 7 saal kee umr men baadshaah bana, aur yarooshalam men us kee hukoomat ka dauraaniya 40 saal tha. us kee maan zibiyaah bair-saba kee rahenay vaalee thee. ²yahoyada kay jeetay jee yooaas vah kuchh karta raha jo rabb ko pasand tha. ³yahoyada nay us kee shaadee do khavaateen say karaaee jin kay betay-betiyaan paida huay.

⁴kuchh der kay baad yooaas nay rabb kay ghar kee marammat karaanay ka faisla kiya. ⁵imaamon aur laaviyon ko apnay paas bula kar us nay unhen hukm diya, “yahoodaah kay shaheron men say guzar kar tamaam logon say paisay jama karen taaki aap saal-ba-saal apnay khuda kay ghar kee marammat karvaaen. ab ja kar jaldee karen.” lekin laaviyon nay badee der lagaaee.

⁶tab baadshaah nay imaam-ay-aazam yahoyada ko bula kar poochha, “aap nay laaviyon say kyoon naheen mutaalba kiya ki vah yahoodaah kay shaheron aur yarooshalam say rabb kay ghar kee marammat kay paisay jama karen? yah to koee naee baat naheen hai, kyoonki rabb ka khaadim moosa bhee mulaaqaat ka khaima theek rakhnay kay liyay israaeelee jamaaat say taiks leta raha. ⁷aap ko khud maaloom hai ki us bedeen aurat ataliyaah nay apnay pairokaaron kay saath rabb kay ghar men naqab laga kar rabb kay liyay makhsoos hadiay chheen liyay aur baal kay apnay buton kee khidmat kay liyay istemaal kiay thay.”

⁸baadshaah kay hukm par ek sandooq banvaaya gaya jo baahar, rabb kay ghar kay sahen kay darvaazay par rakha gaya. ⁹pooray yahoodaah aur yarooshalam men elaan kiya gaya ki rabb kay liyay vah taiks ada kiya jaaay jis ka khuda kay khaadim moosa nay registaan men israaeeliyon say mutaalba kiya tha. ¹⁰yah sun kar tamaam raahanuma balki pooree qaum khush huee. apnay hadiay rabb kay ghar kay paas la kar vah unhen sandooq men daaltay rahay. jab kabhee vah bhar jaataa ¹¹to laavee usay utha kar baadshaah kay afsaron kay paas lay jaatay. agar us men vaaqaee bahut paisay hotay to baadshaah ka meeramunshee aur imaam-ay-aazam ka ek afsar a kar usay khaalee kar detay. phir laavee usay us kee jagah vaapas rakh detay thay. yah silsila rozaana jaaree raha, aur aakhirkaar bahut badee raqam ikatthee ho gaee.

¹²baadshaah aur yahoyada yah paisay un thekedaaron ko diya kartay thay jo rabb kay ghar kee marammat karvaatay thay. yah paisay patthar taraashnay vaalon, badhaiyon aur un kaareegaron kee ujrat kay liyay sarf huay jo lohay aur peetal ka kaam kartay thay. ¹³rabb kay ghar kee marammat kay nigraanon nay mehanat say kaam kiya, aur un kay zer-ay-nigraanee taraqqee hotee gaee. aakhir men rabb kay ghar kee haalat pahelay kee see ho gaee thee balki unhon nay usay mazeed mazboot bana diya. ¹⁴kaam kay ikhtitaam par thekedaar baaqee paisay yooaas baadshaah aur yahoyada kay paas laaay. in say unhon nay rabb kay ghar kee khidmat kay liyay darkaar piyaalay, sonay aur chaandee kay bartan aur deegar kaee cheezen jo qurbaaniyaan chadhaanay kay liyay istemaal hotee theen banvaaeen. yahoyada kay jeetay jee rabb kay ghar men baaqaaidagee say bhasm honay vaalee qurbaaniyaan pesh kee jaatee raheen.

¹⁵yahoyada nihaayat boodha ho gaya. 130 saal kee umr men vah faut hua. ¹⁶usay yarooshalam kay us hissay men shaahee qabristaan men dafnaaya gaya jo ‘daaood ka shaher’ kahelaata hai, kyoonki us nay israaeel men allaah aur us kay ghar kee achchhee khidmat kee thee.

yooaas baadshaah rabb ko tark karta hai

¹⁷yahoyada kee maut kay baad yahoodaah kay buzurg yooaas kay paas a kar munh kay bal jhuk gaay. us vaqt say vah un kay mashvaron par amal karnay laga. ¹⁸is ka ek nateeja yah nikla ki vah un kay saath mil kar rabb apnay baap kay khuda kay ghar ko chhod kar yaseerat devee kay khambon aur buton kee pooja karnay laga. is gunaah kee vajah say allaah ka ghazab yahoodaah aur yarooshalam par naazil hua. ¹⁹us nay apnay nabiyon ko logon kay paas bheja taaki vah unhen samjha kar rabb kay paas vaapas laaen. lekin koee bhee un kee baat sunnay kay liyay tayyaar na hua. ²⁰phir allaah ka rooh yahoyada imaam kay betay zakariyaah par naazil hua, aur us nay qaum kay saamnay khaday ho kar kaha, “allaah farmaata hai, ‘tum rabb kay ahkaam kee khilaafvarzee kyoon kartay ho? tumhen kaamyaabee haasil naheen hogee. choonki tum nay rabb ko tark kar diya hai is liyay us nay tumhen tark kar diya hai’!”

²¹javaab men logon nay zakariyaah kay khilaaf saazish karkay usay baadshaah kay hukm par rabb kay ghar kay sahen men sangasaar kar diya. ²²yoon yooaas baadshaah nay us meharbaanee ka khayaal na kiya jo yahoyada nay us par kee thee balki usay nazar’andaaz karkay us kay betay ko qatl kiya. martay vaqt zakariyaah bola, “rabb dhyaan day kar mera badla lay!”

²³aglay saal kay aaghaaz men shaam kee fauj yooaas say ladnay aaee. yahoodaah men ghus kar unhon nay yarooshalam par fatah paaee aur qaum kay tamaam buzurgon ko maar daala. saara loota hua maal damishq ko bheja gaya jahaan baadshaah tha. ²⁴agarchi shaam kee fauj yahoodaah kee fauj kee nisbat bahut chhotee thee to bhee rabb nay usay fatah bakhshee. choonki yahoodaah nay rabb apnay baapdaada kay khuda ko tark kar diya tha is liyay yooaas ko shaam kay haathon saza milee. ²⁵jang kay dauraan yahoodaah ka baadshaah shadeed zakhmee hua. jab dushman nay mulk ko chhod diya to yooaas kay afsaron nay us kay khilaaf saazish kee. yahoyada imaam kay betay kay qatl ka intiqaam lay kar unhon nay usay maar daala jab vah beemaar haalat men bistar par pada tha. baadshaah ko yarooshalam kay us hissay men dafan kiya gaya jo ‘daaood ka shaher’ kahelaata hai. lekin shaahee qabristaan men naheen dafnaaya gaya. ²⁶saazish karnay vaalon kay naam zabad aur yahoozabad thay. pahelay kee maan sim’aat ammonee thee jabki doosray kee maan simreet moaabee thee.

²⁷yooaas kay beton, us kay khilaaf nabiyon kay farmaanon aur allaah kay ghar kee marammat kay baaray men mazeed maaloomaat ‘shaahaan kee kitaab’ men darj hain. yooaas kay baad us ka beta amasiyaah takhtnasheen hua.