2 Tavaareekh 25
yahoodaah ka baadshaah amasiyaah
1amasiyaah 25 saal kee umr men baadshaah bana aur yarooshalam men us kee hukoomat ka dauraaniya 29 saal tha. us kee maan yahooaddaan yarooshalam kee rahenay vaalee thee. 2jo kuchh amasiyaah nay kiya vah rabb ko pasand tha, lekin vah pooray dil say rabb kee pairvee naheen karta tha. 3joon hee us kay paaon mazbootee say jam gaay us nay un afsaron ko saza-ay-maut dee jinhon nay baap ko qatl kar diya tha. 4lekin un kay beton ko us nay zinda rahenay diya aur yoon moosvee shareeat kay taabay raha jis men rabb farmaata hai, “vaalidain ko un kay bachchon kay jaraaim kay sabab say saza-ay-maut na dee jaaay, na bachchon ko un kay vaalidain kay jaraaim kay sabab say. agar kisee ko saza-ay-maut denee ho to us gunaah kay sabab say jo us nay khud kiya hai.”
adom say jang
5amasiyaah nay yahoodaah aur binyameen kay qabeelon kay tamaam mardon ko bula kar unhen khaandaanon kay mutaabiq tarteeb diya. us nay hazaar hazaar aur sau sau faujiyon par afsar muqarrar kiay. jitnay bhee mard 20 ya is say zaaid saal kay thay un sab kee bhartee huee. is tarah 3,00,000 faujee jama huay. sab badee dhaalon aur nezon say les thay. 6is kay ilaava amasiyaah nay israaeel kay 1,00,000 tajaribaakaar faujiyon ko ujrat par bhartee kiya taaki vah jang men madad karen. unhen us nay chaandee kay taqreeban 3,400 kilograam diay.
7lekin ek mard-ay-khuda nay amasiyaah kay paas a kar usay samjhaaya, “baadshaah salaamat, laazim hai ki yah israaeelee faujee aap kay saath mil kar ladnay kay liyay na niklen. kyoonki rabb un kay saath naheen hai, vah ifraaeem kay kisee bhee rahenay vaalay kay saath naheen hai. 8agar aap un kay saath mil kar niklen taaki mazbootee say dushman say ladeen to allaah aap ko dushman kay saamnay gira dega. kyoonki allaah ko aap kee madad karnay aur aap ko giraanay kee qudrat haasil hai.” 9amasiyaah nay etiraaz kiya, “lekin main israaeeliyon ko chaandee kay 3,400 kilograam ada kar chuka hoon. in paison ka kya banega?” mard-ay-khuda nay javaab diya, “rabb aap ko is say kaheen ziyaada ata kar sakta hai.” 10chunaanchay amasiyaah nay ifraaeem say aaay huay tamaam faujiyon ko faarigh karkay vaapas bhej diya, aur vah yahoodaah say bahut naaraaz huay. har ek baday taish men apnay apnay ghar chala gaya.
11to bhee amasiyaah jur’at karkay jang kay liyay nikla. apnee fauj ko namak kee vaadee men lay ja kar us nay adomiyon par fatah paaee. un kay 10,000 mard maidaan-ay-jang men maaray gaay. 12dushman kay mazeed 10,000 aadmiyon ko giriftaar kar liya gaya. yahoodaah kay faujiyon nay qaidiyon ko ek oonchee chataan kee chotee par lay ja kar neechay gira diya. is tarah sab paash paash ho kar halaak huay.
13itnay men faarigh kiay gaay israaeelee faujiyon nay saamriya aur bait-hauroon kay beech men vaaqay yahoodaah kay shaheron par hamla kiya tha. ladtay ladtay unhon nay 3,000 mardon ko maut kay ghaat utaar diya aur bahut sa maal loot liya tha.
amasiyaah kee butparastee
14adomiyon ko shikast denay kay baad amasiyaah saeer kay baashindon kay buton ko loot kar apnay ghar vaapas laaya. vahaan us nay unhen khada kiya aur un kay saamnay aundhay munh jhuk kar unhen qurbaaniyaan pesh keen. 15yah dekh kar rabb us say bahut naaraaz hua. us nay ek nabee ko us kay paas bheja jis nay kaha, “too in devtaaon kee taraf kyoon rujoo kar raha hai? yah to apnee qaum ko tujh say najaat na dila sakay.” 16amasiyaah nay nabee kee baat kaat kar kaha, “ham nay kab say tujhay baadshaah ka musheer bana diya hai? khaamosh, varna tujhay maar diya jaaega.” nabee nay khaamosh ho kar itna hee kaha, “mujhay maaloom hai ki allaah nay aap ko aap kee in harkaton kee vajah say aur is liyay ki aap nay mera mashvra qabool naheen kiya tabaah karnay ka faisla kar liya hai.”
amasiyaah israaeel kay baadshaah yooaas say ladta hai
17ek din yahoodaah kay baadshaah amasiyaah nay apnay musheeron say mashvra karnay kay baad yooaas bin yahooaakhaz bin yaahoo ko paighaam bheja, “aaen, ham ek doosray ka muqaabla karen!” 18lekin israaeel kay baadshaah yooaas nay javaab diya, “lubnaan men ek kaantedaar jhaadee nay deodaar kay ek darakht say baat kee, ‘meray betay kay saath apnee betee ka rishta baandho.’ lekin usee vaqt lubnaan kay janglee jaanvaron nay us kay oopar say guzar kar usay paaon talay kuchal daala. 19adom par fatah paanay kay sabab say aap ka dil maghroor ho kar mazeed shuharat haasil karna chaahata hai. lekin mera mashvra hai ki aap apnay ghar men rahen. aap aisee museebat ko kyoon daavat detay hain jo aap aur yahoodaah kee tabaahee ka baais ban jaaay?” 20lekin amasiyaah maannay kay liyay tayyaar naheen tha. allaah usay aur us kee qaum ko israaeeliyon kay havaalay karna chaahata tha, kyoonki unhon nay adomiyon kay devtaaon kee taraf rujoo kiya tha.
21tab israaeel ka baadshaah yooaas apnee fauj lay kar yahoodaah par chadh aaya. bait-shams kay paas us ka yahoodaah kay baadshaah amasiyaah kay saath muqaabla hua. 22israaeelee fauj nay yahoodaah kee fauj ko shikast dee, aur har ek apnay apnay ghar bhaag gaya. 23israaeel kay baadshaah yooaas nay yahoodaah kay baadshaah amasiyaah bin yooaas bin akhaziyaah ko vaheen bait-shams men giriftaar kar liya. phir vah usay yarooshalam laaya aur shaher kee faseel ifraaeem naamee darvaazay say lay kar konay kay darvaazay tak gira dee. is hissay kee lambaaee taqreeban 600 fut thee. 24jitna bhee sona, chaandee aur qeemtee saamaan rabb kay ghar aur shaahee mahel kay khazaanon men tha usay us nay pooray ka poora chheen liya. us vaqt obed-adom rabb kay ghar kay khazaanay sambhaalta tha. yooaas loota hua maal aur baaz yaraghamaalon ko lay kar saamriya vaapas chala gaya.
amasiyaah kee maut
25israaeel kay baadshaah yooaas bin yahooaakhaz kee maut kay baad yahoodaah ka baadshaah amasiyaah bin yooaas mazeed 15 saal jeeta raha. 26baaqee jo kuchh amasiyaah kee hukoomat kay dauraan hua vah shuroo say lay kar aakhir tak ‘shaahaan-ay-israaeel-o-yahoodaah’ kee kitaab men darj hai. 27jab say vah rabb kee pairvee karnay say baaz aaya us vaqt say log yarooshalam men us kay khilaaf saazish karnay lagay. aakhirkaar us nay faraar ho kar lakees men panaah lee, lekin saazish karnay vaalon nay apnay logon ko us kay peechhay bheja, aur vah vahaan usay qatl karnay men kaamyaab ho gaay. 28us kee laash ghoday par utha kar yahoodaah kay shaher yarooshalam laaee gaee jahaan usay khaandaanee qabr men dafnaaya gaya.