2 Tavaareekh 26

yahoodaah ka baadshaah uzziyaah

¹yahoodaah kay tamaam logon nay amasiyaah kee jagah us kay betay uzziyaah ko takht par bitha diya. us kee umr 16 saal thee ²jab us ka baap mar kar apnay baapdaada say ja mila. baadshaah bannay kay baad uzziyaah nay ailaat shaher par qabza karkay usay dubaara yahoodaah ka hissa bana liya. us nay shaher men bahut taameeree kaam karvaaya.

³uzziyaah 16 saal kee umr men baadshaah bana aur yarooshalam men rah kar 52 saal hukoomat karta raha. us kee maan yakooliyaah yarooshalam kee rahenay vaalee thee. ⁴apnay baap amasiyaah kee tarah us ka chaal-chalan rabb ko pasand tha. ⁵imaam-ay-aazam zakariyaah kay jeetay jee uzziyaah rabb ka taalib raha, kyoonki zakariyaah usay allaah ka khauf maannay kee taaleem deta raha. jab tak baadshaah rabb ka taalib raha us vaqt tak allaah usay kaamyaabee bakhshta raha.

⁶uzziyaah nay filistiyon say jang karkay jaat, yabna aur ashdood kee faseelon ko dha diya. deegar kaee shaheron ko us nay naay siray say taameer kiya jo ashdood kay qareeb aur filistiyon kay baaqee ilaaqay men thay. ⁷lekin allaah nay na sirf filistiyon say ladtay vaqt uzziyaah kee madad kee balki us vaqt bhee jab joor-baal men rahenay vaalay arbon aur maooniyon say jang chhid gaee. ⁸ammoniyon ko uzziyaah ko kharaaj ada karna pada, aur vah itna taaqatvar bana ki us kee shuharat misr tak phail gaee.

⁹yarooshalam men uzziyaah nay konay kay darvaazay, vaadee kay darvaazay aur faseel kay mod par mazboot burj banvaaay. ¹⁰us nay biyaabaan men bhee burj taameer kiay aur saath saath patthar kay beshumaar hauz taraashay, kyoonki maghribee yahoodaah kay nishebee pahaadee ilaaqay aur maidaanee ilaaqay men us kay baday baday revad chartay thay. baadshaah ko kaashtkaaree ka kaam khaas pasand tha. bahut log pahaadee ilaaqon aur zarkhez vaadiyon men us kay kheton aur angoor kay baaghon kee nigraanee kartay thay.

¹¹uzziyaah kee taaqatvar fauj thee. baadshaah kay aala afsar hananiyaah kee raahanumaaee men meeramunshee yaeeel nay afsar maasiyaah kay saath fauj kee bhartee karkay usay tarteeb diya tha. ¹²in daston par kumbon kay 2,600 sarparast muqarrar thay. ¹³fauj 3,07,500 jang ladnay kay qaabil mardon par mushtamil thee. jang men baadshaah un par poora bharosa kar sakta tha. ¹⁴uzziyaah nay apnay tamaam faujiyon ko dhaalon, nezon, khodon, ziraabaktaron, kamaanon aur falaakhan kay saamaan say musallah kiya. ¹⁵aur yarooshalam kay burjon aur faseel kay konon par us nay aisee masheenen lagaaen jo teer chala saktee aur baday baday patthar phaink saktee theen.

uzziyaah maghroor ho jaata hai

gharaz, allaah kee madad say uzziyaah kee shuharat door door tak phail gaee, aur us kee taaqat badhtee gaee.

¹⁶lekin is taaqat nay usay maghroor kar diya, aur nateejay men vah ghalat raah par a gaya. rabb apnay khuda ka bevafa ho kar vah ek din rabb kay ghar men ghus gaya taaki bakhoor kee qurbaangaah par bakhoor jalaaay. ¹⁷lekin imaam-ay-aazam azariyaah rabb kay mazeed 80 bahaadur imaamon ko apnay saath lay kar us kay peechhay peechhay gaya. ¹⁸unhon nay baadshaah uzziyaah ka saamna karkay kaha, “munaasib naheen ki aap rabb ko bakhoor kee qurbaanee pesh karen. yah haaroon kee aulaad yaanee imaamon kee zimmaadaaree hai jinhen is kay liyay makhsoos kiya gaya hai. maqdis say nikal jaaen, kyoonki aap allaah say bevafa ho gaay hain, aur aap kee yah harkat rabb khuda kay saamnay izzat ka baais naheen banegee.” ¹⁹uzziyaah bakhooradaan ko pakday bakhoor ko pesh karnay ko tha ki imaamon kee baaten sun kar aag-bagoola ho gaya. lekin usee lamhay us kay maathay par kodh phoot nikla. ²⁰yah dekh kar imaam-ay-aazam azariyaah aur deegar imaamon nay usay jaldee say rabb kay ghar say nikaal diya. uzziyaah nay khud bhee vahaan say nikalnay kee jaldee kee, kyoonki rabb hee nay usay saza dee thee.

²¹uzziyaah jeetay jee is beemaaree say shifa na pa saka. usay alaahida ghar men rahena pada, aur usay rabb kay ghar men daakhil honay kee ijaazat naheen thee. us kay betay yootaam ko mahel par muqarrar kiya gaya, aur vahee ummat par hukoomat karnay laga.

²²baaqee jo kuchh uzziyaah kee hukoomat kay dauraan shuroo say lay kar aakhir tak hua vah aamoos kay betay yasaayaah nabee nay qalamband kiya hai. ²³jab uzziyaah mar kar apnay baapdaada say ja mila to usay kodh kee vajah say doosray baadshaahon kay saath naheen dafnaaya gaya balki qareeb kay ek khet men jo shaahee khaandaan ka tha. phir us ka beta yootaam takhtnasheen hua.