2 Tavaareekh 27

yahoodaah ka baadshaah yootaam

¹yootaam 25 saal kee umr men baadshaah bana aur yarooshalam men rah kar 16 saal tak hukoomat karta raha. us kee maan yaroosa bint sadoq thee. ²yootaam nay vah kuchh kiya jo rabb ko pasand tha. vah apnay baap uzziyaah kay namoonay par chalta raha, agarchi us nay kabhee bhee baap kee tarah rabb kay ghar men ghus jaanay kee koshish na kee. lekin aam log apnee ghalat raahon say na hatay.

³yootaam nay rabb kay ghar ka baalaaee darvaaza taameer kiya. ofal pahaadee jis par rabb ka ghar tha us kee deevaar ko us nay bahut jagahon par mazboot bana diya. ⁴yahoodaah kay pahaadee ilaaqay men us nay shaher taameer kiay aur janglee ilaaqon men qilaay aur burj banaaay. ⁵jab ammonee baadshaah kay saath jang chhid gaee to us nay ammoniyon ko shikast dee. teen saal tak unhen usay saalaana kharaaj kay taur par taqreeban 3,400 kilograam chaandee, 16,00,000 kilograam gandum aur 13,50,000 kilograam jau ada karna pada. ⁶yoon yootaam kee taaqat badhtee gaee. aur vajah yah thee ki vah saabitqadmee say rabb apnay khuda kay huzoor chalta raha.

⁷baaqee jo kuchh yootaam kee hukoomat kay dauraan hua vah ‘shaahaan-ay-israaeel-o-yahoodaah’ kee kitaab men qalamband hai. us men us kee tamaam jangon aur baaqee kaamon ka zikr hai. ⁸vah 25 saal kee umr men baadshaah bana aur yarooshalam men rah kar 16 saal hukoomat karta raha. ⁹jab vah mar kar apnay baapdaada say ja mila to usay yarooshalam kay us hissay men jo ‘daaood ka shaher’ kahelaata hai dafnaaya gaya. phir us ka beta aakhaz takhtnasheen hua.