2 Tavaareekh 28

yahoodaah ka baadshaah aakhaz

¹aakhaz 20 saal kee umr men baadshaah bana aur yarooshalam men rah kar 16 saal hukoomat karta raha. vah apnay baap daaood kay namoonay par na chala balki vah kuchh karta raha jo rabb ko naapsand tha. ²kyoonki us nay israaeel kay baadshaahon ka chaal-chalan apnaaya. baal kay but dhalva kar ³us nay na sirf vaadee-ay-bin-hinnoom men buton ko qurbaaniyaan pesh keen balki apnay beton ko bhee qurbaanee kay taur par jala diya. yoon vah un qaumon kay ghinaunay rasm-o-rivaaj ada karnay laga jinhen rabb nay israaeeliyon kay aagay mulk say nikaal diya tha. ⁴aakhaz bakhoor jala kar apnee qurbaaniyaan oonchay maqaamon, pahaadiyon kee chotiyon aur har ghanay darakht kay saay men chadhaata tha.

⁵isee liyay rabb us kay khuda nay usay shaam kay baadshaah kay havaalay kar diya. shaam kee fauj nay usay shikast dee aur yahoodaah kay bahut say logon ko qaidee bana kar damishq lay gaee. aakhaz ko israaeel kay baadshaah fiqah bin ramaliyaah kay havaalay bhee kar diya gaya jis nay usay shadeed nuqsaan pahunchaaya. ⁶ek hee din men yahoodaah kay 1,20,000 tajaribaakaar faujee shaheed huay. yah sab kuchh is liyay hua ki qaum nay rabb apnay baapdaada kay khuda ko tark kar diya tha. ⁷us vaqt ifraaeem kay qabeelay kay pahelavaan zikree nay aakhaz kay betay maasiyaah, mahel kay inchaarj azreeqaam aur baadshaah kay baad sab say aala afsar ilqaana ko maar daala. ⁸israaeeliyon nay yahoodaah kee 2,00,000 aurten aur bachchay chheen liyay aur kasrat ka maal loot kar saamriya lay gaay.

israaeel qaidiyon ko riha kar deta hai

⁹saamriya men rabb ka ek nabee banaam odeed raheta tha. jab israaeelee faujee maidaan-ay-jang say vaapas aaay to odeed un say milnay kay liyay nikla. us nay un say kaha, “dekhen, rabb aap kay baapdaada ka khuda yahoodaah say naaraaz tha, is liyay us nay unhen aap kay havaalay kar diya. lekin aap log taish men a kar un par yoon toot paday ki un ka qatl-ay-aam aasmaan tak pahunch gaya hai. ¹⁰lekin yah kaafee naheen tha. ab aap yahoodaah aur yarooshalam kay bachay huon ko apnay ghulaam banaana chaahatay hain. kya aap samajhtay hain ki ham un say achchhay hain? naheen, aap say bhee rabb apnay khuda kay khilaaf gunaah sarzad huay hain. ¹¹chunaanchay meree baat sunen! in qaidiyon ko vaapas karen jo aap nay apnay bhaaiyon say chheen liyay hain. kyoonki rabb ka sakht ghazab aap par naazil honay vaala hai.”

¹²ifraaeem kay qabeelay kay kuchh sarparaston nay bhee faujiyon ka saamna kiya. un kay naam azariyaah bin yoohanaan, barakiyaah bin masillamot, yahizaqiyaah bin salloom aur amaasa bin khadlee thay. ¹³unhon nay kaha, “in qaidiyon ko yahaan mat lay aaen, varna ham rabb kay saamnay qusoorvaar thaherengay. kya aap chaahatay hain ki ham apnay gunaahon men izaafa karen? hamaara qusoor pahelay hee bahut bada hai. haan, rabb israaeel par sakht ghussay hai.”

¹⁴tab faujiyon nay apnay qaidiyon ko aazaad karkay unhen lootay huay maal kay saath buzurgon aur pooree jamaaat kay havaalay kar diya. ¹⁵mazkoora chaar aadmiyon nay saamnay a kar qaidiyon ko apnay paas mahfooz rakha. lootay huay maal men say kapday nikaal kar unhon nay unhen un men taqseem kiya jo barahena thay. is kay baad unhon nay tamaam qaidiyon ko kapday aur jootay day diay, unhen khaana khilaaya, paanee pilaaya aur un kay zakhmon kee marham-pattee kee. jitnay thakaavat kee vajah say chal na saktay thay unhen unhon nay gadhon par bithaaya, phir chaltay chaltay sab ko khajoor kay shaher yareehoo tak pahunchaaya jahaan un kay apnay log thay. phir vah saamriya laut aaay.

aakhaz asoor kay baadshaah say madad leta hai

¹⁶us vaqt aakhaz baadshaah nay asoor kay baadshaah say iltimaas kee, “hamaaree madad karnay aaen.” ¹⁷kyoonki adomee yahoodaah men ghus kar kuchh logon ko giriftaar karkay apnay saath lay gaay thay. ¹⁸saath saath filistee maghribee yahoodaah kay nishebee pahaadee ilaaqay aur junoobee ilaaqay men ghus aaay thay aur zail kay shaheron par qabza karkay un men rahenay lagay thay : bait-shams, ayyaalon, jadeerot, neez soka, timnat aur jimzoo gird-o-navaah kee aabaadiyon samet. ¹⁹is tarah rabb nay yahoodaah ko aakhaz kee vajah say zer kar diya, kyoonki baadshaah nay yahoodaah men belagaam beraaharavee phailnay dee aur rabb say apnee bevafaaee ka saaf izhaar kiya tha.

²⁰asoor kay baadshaah tiglat-pilesar apnee fauj lay kar mulk men aaya, lekin aakhaz kee madad karnay kay bajaay us nay usay tang kiya. ²¹aakhaz nay rabb kay ghar, shaahee mahel aur apnay aala afsaron kay khazaanon ko loot kar saara maal asoor kay baadshaah ko bhej diya, lekin befaaida. is say usay saheeh madad na milee.

²²go vah us vaqt badee museebat men tha to bhee rabb say aur door ho gaya. ²³vah shaam kay devtaaon ko qurbaaniyaan pesh karnay laga, kyoonki us ka khayaal tha ki in hee nay mujhay shikast dee hai. us nay socha, “shaam kay devta apnay baadshaahon kee madad kartay hain! ab say main unhen qurbaaniyaan pesh karoonga taaki vah meree bhee madad karen.” lekin yah devta baadshaah aakhaz aur pooree qaum kay liyay tabaahee ka baais ban gaay. ²⁴aakhaz nay hukm diya ki allaah kay ghar ka saara saamaan nikaal kar tukday tukday kar diya jaaay. phir us nay rabb kay ghar kay darvaazon par taala laga diya. us kee jagah us nay yarooshalam kay konay konay men qurbaangaahen khadee kar deen. ²⁵saath saath us nay deegar maaboodon ko qurbaaniyaan pesh karnay kay liyay yahoodaah kay har shaher kee oonchee jagahon par mandir taameer kiay. aisee harkaton say vah rabb apnay baapdaada kay khuda ko taish dilaata raha.

²⁶baaqee jo kuchh us kee hukoomat kay dauraan hua aur jo kuchh us nay kiya vah shuroo say lay kar aakhir tak ‘shaahaan-ay-yahoodaah-o-israaeel’ kee kitaab men darj hai. ²⁷jab aakhaz mar kar apnay baapdaada say ja mila to usay yarooshalam men dafan kiya gaya, lekin shaahee qabristaan men naheen. phir us ka beta hizaqiyaah takhtnasheen hua.