2 Tavaareekh 29

hizaqiyaah baadshaah rabb kay ghar ko dubaara khol deta hai

¹jab hizaqiyaah baadshaah bana to us kee umr 25 saal thee. yarooshalam men rah kar vah 29 saal hukoomat karta raha. us kee maan abiyaah bint zakariyaah thee.

²apnay baap daaood kee tarah us nay aisa kaam kiya jo rabb ko pasand tha. ³apnee hukoomat kay pahelay saal kay pahelay maheenay men us nay rabb kay ghar kay darvaazon ko khol kar un kee marammat karvaaee. ⁴laaviyon aur imaamon ko bula kar us nay unhen rabb kay ghar kay mashriqee sahen men jama kiyaa ⁵aur kaha,

“ai laaviyo, meree baat sunen! apnay aap ko khidmat kay liyay makhsoos-o-muqaddas karen, aur rabb apnay baapdaada kay khuda kay ghar ko bhee makhsoos-o-muqaddas karen. tamaam naapaak cheezen maqdis say nikaalen! ⁶hamaaray baapdaada bevafa ho kar vah kuchh kartay gaay jo rabb hamaaray khuda ko naapsand tha. unhon nay usay chhod diya, apnay munh ko rabb kee sukoonatgaah say pher kar doosree taraf chal paday. ⁷rabb kay ghar kay saamnay vaalay baraamday kay darvaazon par unhon nay taala laga kar charaaghon ko bujha diya. na israaeel kay khuda kay liyay bakhoor jalaaya jaata, na bhasm honay vaalee qurbaaniyaan maqdis men pesh kee jaatee theen. ⁸isee vajah say rabb ka ghazab yahoodaah aur yarooshalam par naazil hua hai. hamaaree haalat ko dekh kar log ghabra gaay, un kay rongtay khaday ho gaay hain. ham doosron kay liyay mazaaq ka nishaana ban gaay hain. aap khud is kay gavaah hain. ⁹hamaaree bevafaaee kee vajah say hamaaray baap talvaar kee zad men a kar maaray gaay aur hamaaray betay-betiyaan aur beeviyaan ham say chheen lee gaee hain. ¹⁰lekin ab main rabb israaeel kay khuda kay saath ahd baandhna chaahata hoon taaki us ka sakht qaher ham say tal jaaay. ¹¹meray beto, ab sustee na dikhaaen, kyoonki rabb nay aap ko chun kar apnay khaadim banaaya hai. aap ko us kay huzoor khaday ho kar us kee khidmat karnay aur bakhoor jalaanay kee zimmaadaaree dee gaee hai.”

¹²phir zail kay laavee khidmat kay liyay tayyaar huay :

qihaat kay khaandaan ka mahet bin amaasee aur yoel bin azariyaah,

miraaree kay khaandaan ka qees bin abdee aur azariyaah bin yahellal-el,

jairson kay khaandaan ka yooaakh bin zimma aur adan bin yooaakh,

¹³ileesafan kay khaandaan ka simree aur yaeeel,

aasaf kay khaandaan ka zakariyaah aur mattaniyaah,

¹⁴haimaan kay khaandaan ka yaheeel aur simaee,

yadootoon kay khaandaan ka samaayaah aur uzzeeel.

¹⁵baaqee laaviyon ko bula kar unhon nay apnay aap ko rabb kee khidmat kay liyay makhsoos-o-muqaddas kiya. phir vah baadshaah kay hukm kay mutaabiq rabb kay ghar ko paak-saaf karnay lagay. kaam kartay kartay unhon nay is ka khayaal kiya ki sab kuchh rabb kee hidaayaat kay mutaabiq ho raha ho. ¹⁶imaam rabb kay ghar men daakhil huay aur us men say har naapaak cheez nikaal kar usay sahen men laaay. vahaan say laaviyon nay sab kuchh utha kar shaher say baahar vaadee-ay-qidron men phaink diya. ¹⁷rabb kay ghar kee quddoosiyat bahaal karnay ka kaam pahelay maheenay kay pahelay din shuroo hua, aur ek haftay kay baad vah saamnay vaalay baraamday tak pahunch gaay thay. ek aur hafta pooray ghar ko makhsoos-o-muqaddas karnay men sarf hua.

pahelay maheenay kay 16ven din kaam mukammal hua. ¹⁸hizaqiyaah baadshaah kay paas ja kar unhon nay kaha, “ham nay rabb kay pooray ghar ko paak-saaf kar diya hai. is men jaanvaron ko jalaanay kee qurbaangaah us kay saamaan samet aur vah mez jis par rabb kay liyay makhsoos rotiyaan rakhee jaatee hain us kay saamaan samet shaamil hai. ¹⁹aur jitnee cheezen aakhaz nay bevafa ban kar apnee hukoomat kay dauraan radd kar dee theen un sab ko ham nay theek karkay dubaara makhsoos-o-muqaddas kar diya hai. ab vah rabb kee qurbaangaah kay saamnay padee hain.”

rabb kay ghar kee dubaara makhsoosiyat

²⁰aglay din hizaqiyaah baadshaah subah-saveray shaher kay tamaam buzurgon ko bula kar un kay saath rabb kay ghar kay paas gaya. ²¹saat javaan bail, saat mendhay aur bhed kay saat bachchay bhasm honay vaalee qurbaanee kay liyay sahen men laaay gaay, neez saat bakray jinhen gunaah kee qurbaanee kay taur par shaahee khaandaan, maqdis aur yahoodaah kay liyay pesh karna tha. hizaqiyaah nay haaroon kee aulaad yaanee imaamon ko hukm diya ki in jaanvaron ko rabb kee qurbaangaah par chadhaaen. ²²pahelay bailon ko zabah kiya gaya. imaamon nay un ka khoon jama karkay usay qurbaangaah par chhidka. is kay baad mendhon ko zabah kiya gaya. is baar bhee imaamon nay un ka khoon qurbaangaah par chhidka. bhed kay bachchon kay khoon kay saath bhee yahee kuchh kiya gaya. ²³aakhir men gunaah kee qurbaanee kay liyay makhsoos bakron ko baadshaah aur jamaaat kay saamnay laaya gaya, aur unhon nay apnay haathon ko bakron kay saron par rakh diya. ²⁴phir imaamon nay unhen zabah karkay un ka khoon gunaah kee qurbaanee kay taur par qurbaangaah par chhidka taaki israaeel ka kaffaara diya jaaay. kyoonki baadshaah nay hukm diya tha ki bhasm honay vaalee aur gunaah kee qurbaanee tamaam israaeel kay liyay pesh kee jaaay.

²⁵hizaqiyaah nay laaviyon ko jhaanjh, sitaar aur sarod thama kar unhen rabb kay ghar men khada kiya. sab kuchh un hidaayaat kay mutaabiq hua jo rabb nay daaood baadshaah, us kay ghaibbeen jaad aur naatan nabee kee maarifat dee theen. ²⁶laavee un saazon kay saath khaday ho gaay jo daaood nay banvaaay thay, aur imaam apnay turmon ko thaamay un kay saath khaday huay. ²⁷phir hizaqiyaah nay hukm diya ki bhasm honay vaalee qurbaanee qurbaangaah par pesh kee jaaay. jab imaam yah kaam karnay lagay to laavee rabb kee taareef men geet gaanay lagay. saath saath turam aur daaood baadshaah kay banvaaay huay saaz bajnay lagay. ²⁸tamaam jamaaat aundhay munh jhuk gaee jabki laavee geet gaatay aur imaam turam bajaatay rahay. yah silsila is qurbaanee kee takmeel tak jaaree raha. ²⁹is kay baad hizaqiyaah aur tamaam haazireen dubaara munh kay bal jhuk gaay. ³⁰baadshaah aur buzurgon nay laaviyon ko kaha, “daaood aur aasaf ghaibbeen kay zaboor ga kar rabb kee sitaaish karen.” chunaanchay laaviyon nay badee khushee say hamd-o-sana kay geet gaaay . vah bhee aundhay munh jhuk gaay.

³¹phir hizaqiyaah logon say mukhaatib hua, “aaj aap nay apnay aap ko rabb kay liyay vaqf kar diya hai. ab vah kuchh rabb kay ghar kay paas lay aaen jo aap zabah aur salaamatee kee qurbaanee kay taur par pesh karna chaahatay hain.” tab log zabah aur salaamatee kee apnee qurbaaniyaan lay aaay. neez, jis ka bhee dil chaahata tha vah bhasm honay vaalee qurbaaniyaan laaya. ³²is tarah bhasm honay vaalee qurbaanee kay liyay 70 bail, 100 mendhay aur bhed kay 200 bachchay jama karkay rabb ko pesh kiay gaay. ³³un kay ilaava 600 bail aur 3,000 bhed-bakriyaan rabb kay ghar kay liyay makhsoos kee gaeen. ³⁴lekin itnay jaanvaron kee khaalon ko utaarnay kay liyay imaam kam thay, is liyay laaviyon ko un kee madad karnee padee. is kaam kay ikhtitaam tak balki jab tak mazeed imaam khidmat kay liyay tayyaar aur paak naheen ho gaay thay laavee madad kartay rahay. imaamon kee nisbat ziyaada laavee paak-saaf ho gaay thay, kyoonki unhon nay ziyaada lagan say apnay aap ko rabb kay liyay makhsoos-o-muqaddas kiya tha. ³⁵bhasm honay vaalee beshumaar qurbaaniyon kay ilaava imaamon nay salaamatee kee qurbaaniyon kee charbee bhee jalaaee. saath saath unhon nay mai kee nazren pesh keen.

yoon rabb kay ghar men khidmat ka naay siray say aaghaaz hua. ³⁶hizaqiyaah aur pooree qaum nay khushee manaaee ki allaah nay yah sab kuchh itnee jaldee say hamen muhayya kiya hai.