2 Tavaareekh 30

fasah kee eed kay liyay daavat

¹hizaqiyaah nay israaeel aur yahoodaah kee har jagah apnay qaasidon ko bhej kar logon ko rabb kay ghar men aanay kee daavat dee, kyoonki vah un kay saath rabb israaeel kay khuda kee taazeem men fasah kee eed manaana chaahata tha. us nay ifraaeem aur manassee kay qabeelon ko bhee daavatnaamay bhejay. ²baadshaah nay apnay afsaron aur yarooshalam kee pooree jamaaat kay saath mil kar faisla kiya ki ham yah eed doosray maheenay men manaaengay. ³aam taur par yah pahelay maheenay men manaaee jaatee thee, lekin us vaqt tak khidmat kay liyay tayyaar imaam kaafee naheen thay. kyoonki ab tak sab apnay aap ko paak-saaf na kar sakay. doosree baat yah thee ki log itnee jaldee say yarooshalam men jama na ho sakay. ⁴in baaton kay pesh-ay-nazar baadshaah aur tamaam haazireen is par muttafiq huay ki fasah kee eed multavee kee jaaay. ⁵unhon nay faisla kiya ki ham tamaam israaeeliyon ko junoob men bair-saba say lay kar shimaal men daan tak daavat dengay. sab yarooshalam aaen taaki ham mil kar rabb israaeel kay khuda kee taazeem men fasah kee eed manaaen. asal men yah eed badee der say hidaayaat kay mutaabiq naheen manaaee gaee thee.

⁶baadshaah kay hukm par qaasid israaeel aur yahoodaah men say guzray. har jagah unhon nay logon ko baadshaah aur us kay afsaron kay khat pahuncha diay. khat men likha tha,

“ai israaeeliyo, rabb ibraaheem, ishaaq aur israaeel kay khuda kay paas vaapas aaen! phir vah bhee aap kay paas jo asooree baadshaahon kay haath say bach niklay hain vaapas aaega. ⁷apnay baapdaada aur bhaaiyon kee tarah na banen jo rabb apnay baapdaada kay khuda say bevafa ho gaay thay. yahee vajah hai ki us nay unhen aisee haalat men chhod diya ki jis nay bhee unhen dekha us kay rongtay khaday ho gaay. aap khud is kay gavaah hain. ⁸un kee tarah aday na rahen balki rabb kay taabay ho jaaen. us kay maqdis men aaen, jo us nay hamesha kay liyay makhsoos-o-muqaddas kar diya hai. rabb apnay khuda kee khidmat karen taaki aap us kay sakht ghazab ka nishaana na rahen. ⁹agar aap rabb kay paas laut aaen to jinhon nay aap kay bhaaiyon aur un kay baal-bachchon ko qaid kar liya hai vah un par rahem karkay unhen is mulk men vaapas aanay dengay. kyoonki rabb aap ka khuda meharbaan aur raheem hai. agar aap us kay paas vaapas aaen to vah apna munh aap say naheen pherega.”

¹⁰qaasid ifraaeem aur manassee kay pooray qabaailee ilaaqay men say guzray aur har shaher ko yah paighaam pahunchaaya. phir chaltay chaltay vah zabooloon tak pahunch gaay. lekin aksar log un kee baat sun kar hans paday aur un ka mazaaq udaanay lagay. ¹¹sirf aashar, manassee aur zabooloon kay chand ek aadmee farotnee ka izhaar karkay maan gaay aur yarooshalam aaay. ¹²yahoodaah men allaah nay logon ko tahereek dee ki unhon nay yakdilee say us hukm par amal kiya jo baadshaah aur buzurgon nay rabb kay farmaan kay mutaabiq diya tha.

hizaqiyaah aur qaum fasah kee eed manaatay hain

¹³doosray maheenay men bahut ziyaada log bekhameeree rotee kee eed manaanay kay liyay yarooshalam pahunchay. ¹⁴pahelay unhon nay shaher say buton kee tamaam qurbaanagaahon ko door kar diya. bakhoor jalaanay kee chhotee qurbaanagaahon ko bhee unhon nay utha kar vaadee-ay-qidron men phaink diya. ¹⁵doosray maheenay kay 14ven din fasah kay lelon ko zabah kiya gaya. imaamon aur laaviyon nay sharminda ho kar apnay aap ko khidmat kay liyay paak-saaf kar rakha tha, aur ab unhon nay bhasm honay vaalee qurbaaniyon ko rabb kay ghar men pesh kiya. ¹⁶vah khidmat kay liyay yoon khaday ho gaay jis tarah mard-ay-khuda moosa kee shareeat men farmaaya gaya hai. laavee qurbaaniyon ka khoon imaamon kay paas laaay jinhon nay usay qurbaangaah par chhidka.

¹⁷lekin haazireen men say bahut say logon nay apnay aap ko saheeh taur par paak-saaf naheen kiya tha. un kay liyay laaviyon nay fasah kay lelon ko zabah kiya taaki un kee qurbaaniyon ko bhee rabb kay liyay makhsoos kiya ja sakay. ¹⁸khaaskar ifraaeem, manassee, zabooloon aur ishkaar kay aksar logon nay apnay aap ko saheeh taur par paak-saaf naheen kiya tha. chunaanchay vah fasah kay khaanay men us haalat men shareek na huay jis ka taqaaza shareeat kartee hai. lekin hizaqiyaah nay un kee shafaaat karkay dua kee, “rabb jo meharbaan hai har ek ko muaaf kare ¹⁹jo pooray dil say rabb apnay baapdaada kay khuda ka taalib rahenay ka iraada rakhta hai, khwaah usay maqdis kay liyay darkaar paakeezgee haasil na bhee ho.” ²⁰rabb nay hizaqiyaah kee dua sun kar logon ko bahaal kar diya.

²¹yarooshalam men jamaashuda israaeeliyon nay badee khushee say saat din tak bekhameeree rotee kee eed manaaee. har din laavee aur imaam apnay saaz baja kar buland aavaaz say rabb kee sitaaish kartay rahay. ²²laaviyon nay rabb kee khidmat kartay vaqt badee samajhdaaree dikhaaee, aur hizaqiyaah nay is men un kee hausalaaafzaaee kee.

pooray haftay kay dauraan israaeelee rabb ko salaamatee kee qurbaaniyaan pesh karkay qurbaanee ka apna hissa khaatay aur rabb apnay baapdaada kay khuda kee tamjeed kartay rahay.

²³is haftay kay baad pooree jamaaat nay faisla kiya ki eed ko mazeed saat din manaaya jaaay. chunaanchay unhon nay khushee say ek aur haftay kay dauraan eed manaaee. ²⁴tab yahoodaah kay baadshaah hizaqiyaah nay jamaaat kay liyay 1,000 bail aur 7,000 bhed-bakriyaan pesh keen jabki buzurgon nay jamaaat kay liyay 1,000 bail aur 10,000 bhed-bakriyaan chadhaaeen. itnay men mazeed bahut say imaamon nay apnay aap ko rabb kee khidmat kay liyay makhsoos-o-muqaddas kar liya tha.

²⁵jitnay bhee aaay thay khushee mana rahay thay, khwaah vah yahoodaah kay baashinday thay, khwaah imaam, laavee, israaeelee ya israaeel aur yahoodaah men rahenay vaalay pardesee mehamaan. ²⁶yarooshalam men badee shaadmaanee thee, kyoonki aisee eed daaood baadshaah kay betay sulemaan kay zamaanay say lay kar us vaqt tak yarooshalam men manaaee naheen gaee thee.

²⁷eed kay ikhtitaam par imaamon aur laaviyon nay khaday ho kar qaum ko barkat dee. aur allaah nay un kee sunee, un kee dua aasmaan par us kee muqaddas sukoonatgaah tak pahunchee.