2 Tavaareekh 31

pooray yahoodaah men butparastee ka khaatmaa

¹eed kay baad jamaaat kay tamaam israaeeliyon nay yahoodaah kay shaheron men ja kar patthar kay buton ko tukday tukday kar diya, yaseerat devee kay khambon ko kaat daala, oonchee jagahon kay mandiron ko dha diya aur ghalat qurbaanagaahon ko khatm kar diya. jab tak unhon nay yah kaam yahoodaah, binyameen, ifraaeem aur manassee kay pooray ilaaqon men takmeel tak naheen pahunchaaya tha unhon nay aaraam na kiya. is kay baad vah sab apnay apnay shaheron aur gharon ko chalay gaay.

rabb kay ghar men intizaam kee islaah

²hizaqiyaah nay imaamon aur laaviyon ko dubaara khidmat kay vaisay hee gurohon men taqseem kiya jaisay pahelay thay. un kee zimmaadaariyaan bhasm honay vaalee aur salaamatee kee qurbaaniyaan chadhaana, rabb kay ghar men mukhtalif qism kee khidmaat anjaam dena aur hamd-o-sana kay geet gaana theen.

³jo jaanvar baadshaah apnee milkiyat say rabb kay ghar ko deta raha vah bhasm honay vaalee un qurbaaniyon kay liyay muqarrar thay jin ko rabb kee shareeat kay mutaabiq har subah-shaam, sabat kay din, naay chaand kee eed aur deegar eedon par rabb kay ghar men pesh kee jaatee theen.

⁴hizaqiyaah nay yarooshalam kay baashindon ko hukm diya ki apnee milkiyat men say imaamon aur laaviyon ko kuchh den taaki vah apna vaqt rabb kee shareeat kee takmeel kay liyay vaqf kar saken. ⁵baadshaah ka yah elaan suntay hee israaeelee faraakhdilee say ghalla, angoor kay ras, zaitoon kay tel, shahed aur kheton kee baaqee paidaavaar ka pahela phal rabb kay ghar men laaay. bahut kuchh ikattha hua, kyoonki logon nay apnee paidaavaar ka poora dasvaan hissa vahaan pahunchaaya. ⁶yahoodaah kay baaqee shaheron kay baashinday bhee saath rahenay vaalay israaeeliyon samet apnee paidaavaar ka dasvaan hissa rabb kay ghar men laaay. jo bhee bail, bhed-bakriyaan aur baaqee cheezen unhon nay rabb apnay khuda kay liyay vaqf kee theen vah rabb kay ghar men pahuncheen jahaan logon nay unhen baday dher laga kar ikattha kiya. ⁷cheezen jama karnay ka yah silsila teesray maheenay men shuroo hua aur saatven maheenay men ikhtitaam ko pahuncha. ⁸jab hizaqiyaah aur us kay afsaron nay a kar dekha ki kitnee cheezen ikatthee ho gaee hain to unhon nay rabb aur us kee qaum israaeel ko mubaarak kaha.

⁹jab hizaqiyaah nay imaamon aur laaviyon say in dheron kay baaray men poochhaa ¹⁰to sadoq kay khaandaan ka imaam-ay-aazam azariyaah nay javaab diya, “jab say log apnay hadiay yahaan lay aatay hain us vaqt say ham jee bhar kar kha saktay hain balki kaafee kuchh bach bhee jaata hai. kyoonki rabb nay apnee qaum ko itnee barkat dee hai ki yah sab kuchh baaqee rah gaya hai.”

¹¹tab hizaqiyaah nay hukm diya ki rabb kay ghar men godaam banaaay jaaen. jab aisa kiya gayaa ¹²to razaakaaraana hadiay, paidaavaar ka dasvaan hissa aur rabb kay liyay makhsoos kiay gaay atiyaat un men rakhay gaay. koonaniyaah laavee in cheezon ka inchaarj bana jabki us ka bhaaee simaee us ka madadgaar muqarrar hua. ¹³imaam-ay-aazam azariyaah rabb kay ghar kay pooray intizaam ka inchaarj tha, is liyay hizaqiyaah baadshaah nay us kay saath mil kar das nigraan muqarrar kiay jo koonaniyaah aur simaee kay tahet khidmat anjaam den. un kay naam yaheeel, azaziyaah, nahet, asaahel, yareemot, yoozbad, ileeel, ismaakiyaah, mahet aur binaayaah thay.

¹⁴jo laavee mashriqee darvaazay ka darbaan tha us ka naam qoray bin yimna tha. ab usay rabb ko razaakaaraana taur par diay gaay hadiay aur us kay liyay makhsoos kiay gaay ateeay taqseem karnay ka nigraan banaaya gaya. ¹⁵adan, minyameen, yashooa, samaayaah, amariyaah aur sakaniyaah us kay madadgaar thay. un kee zimmaadaaree laaviyon kay shaheron men rahenay vaalay imaamon ko un ka hissa dena thee. badee vafaadaaree say vah khayaal rakhtay thay ki khidmat kay mukhtalif gurohon kay tamaam imaamon ko vah hissa mil jaaay jo un ka haq banta tha, khwaah vah baday thay ya chhotay. ¹⁶jo apnay guroh kay saath rabb kay ghar men khidmat karta tha usay us ka hissa baraah-ay-raast milta tha. is silsilay men laavee kay qabeelay kay jitnay mardon aur ladkon kee umr teen saal ya is say zaaid thee un kee faherist banaaee gaee. ¹⁷in faheriston men imaamon ko un kay kumbon kay mutaabiq darj kiya gaya. isee tarah 20 saal ya is say zaaid kay laaviyon ko un zimmaadaariyon aur khidmat kay mutaabiq jo vah apnay gurohon men sambhaaltay thay faheriston men darj kiya gaya. ¹⁸khaandaanon kee aurten aur betay-betiyaan chhotay bachchon samet bhee in faheriston men darj theen. choonki un kay mard vafaadaaree say rabb kay ghar men khidmat kartay thay, is liyay yah deegar afraad bhee makhsoos-o-muqaddas samjhay jaatay thay. ¹⁹jo imaam shaheron say baahar un charaagaahon men rahetay thay jo unhen haaroon kee aulaad kee haisiyat say milee theen unhen bhee hissa milta tha. har shaher kay liyay aadmee chunay gaay jo imaamon kay khaandaanon kay mardon aur faherist men darj tamaam laaviyon ko vah hissa diya karen jo un ka haq tha.

²⁰hizaqiyaah baadshaah nay hukm diya ki pooray yahoodaah men aisa hee kiya jaaay. us ka kaam rabb kay nazdeek achchha, munsifaana aur vafaadaaraana tha. ²¹jo kuchh us nay allaah kay ghar men intizaam dubaara chalaanay aur shareeat ko qaaim karnay kay silsilay men kiya us kay liyay vah pooray dil say apnay khuda ka taalib raha. nateejay men usay kaamyaabee haasil huee.