2 Tavaareekh 33

yahoodaah ka baadshaah manassee

¹manassee 12 saal kee umr men baadshaah bana, aur yarooshalam men us kee hukoomat ka dauraaniya 55 saal tha. ²manassee ka chaal-chalan rabb ko naapsand tha. us nay un qaumon kay qaabil-ay-ghin rasm-o-rivaaj apna liyay jinhen rabb nay israaeeliyon kay aagay say nikaal diya tha. ³oonchee jagahon kay jin mandiron ko us kay baap hizaqiyaah nay dha diya tha unhen us nay naay siray say taameer kiya. us nay baal devtaaon kee qurbaangaahen banvaaeen aur yaseerat devee kay khambay khaday kiay. in kay ilaava vah sooraj, chaand balki aasmaan kay pooray lashkar ko sijda karkay un kee khidmat karta tha. ⁴us nay rabb kay ghar men bhee apnee qurbaangaahen khadee keen, haalaanki rabb nay is maqaam kay baaray men farmaaya tha, “yarooshalam men mera naam abad tak qaaim rahega.” ⁵lekin manassee nay parva na kee balki rabb kay ghar kay donon sahenon men aasmaan kay pooray lashkar kay liyay qurbaangaahen banvaaeen. ⁶yahaan tak ki us nay vaadee-ay-bin-hinnoom men apnay beton ko bhee qurbaan karkay jala diya. jaadoogree, ghaibdaanee aur afsoongaree karnay kay ilaava vah murdon kee roohon say raabita karnay vaalon aur rammaalon say bhee mashvra karta tha.

gharaz us nay bahut kuchh kiya jo rabb ko naapsand tha aur usay taish dilaaya. ⁷devee ka but banva kar us nay usay allaah kay ghar men khada kiya, haalaanki rabb nay daaood aur us kay betay sulemaan say kaha tha, “is ghar aur is shaher yarooshalam men jo main nay tamaam israaeelee qabeelon men say chun liya hai main apna naam abad tak qaaim rakhoonga. ⁸agar israaeelee ehatiyaat say meray un tamaam ahkaam aur hidaayaat kee pairvee karen jo moosa nay shareeat men unhen diay to main kabhee naheen honay doonga ki israaeeliyon ko us mulk say jilaavatan kar diya jaaay jo main nay un kay baapdaada ko ata kiya tha.” ⁹lekin manassee nay yahoodaah aur yarooshalam kay baashindon ko aisay ghalat kaam karnay par uksaaya jo un qaumon say bhee sarzad naheen huay thay jinhen rabb nay mulk men daakhil hotay vaqt un kay aagay say tabaah kar diya tha.

¹⁰go rabb nay manassee aur apnee qaum ko samjhaaya, lekin unhon nay parva na kee. ¹¹tab rabb nay asooree baadshaah kay kamaandaron ko yahoodaah par hamla karnay diya. unhon nay manassee ko pakad kar us kee naak men nakel daalee aur usay peetal kee zanjeeron men jakad kar baabal lay gaay. ¹²jab vah yoon museebat men phans gaya to manassee rabb apnay khuda ka ghazab thanda karnay kee koshish karnay laga aur apnay aap ko apnay baapdaada kay khuda kay huzoor past kar diya.

¹³aur rabb nay us kee iltimaas par dhyaan day kar us kee sunee. usay yarooshalam vaapas la kar us nay us kee hukoomat bahaal kar dee. tab manassee nay jaan liya ki rabb hee khuda hai.

¹⁴is kay baad us nay ‘daaood kay shaher’ kee bairoonee faseel naay siray say banvaaee. yah faseel jaihoon chashmay kay maghrib say shuroo huee aur vaadee-ay-qidron men say guzar kar machhlee kay darvaazay tak pahunch gaee. is deevaar nay rabb kay ghar kee pooree pahaadee banaam ofal ka ihaata kar liya aur bahut buland thee. is kay ilaava baadshaah nay yahoodaah kay tamaam qil’aaband shaheron par faujee afsar muqarrar kiay. ¹⁵us nay ajnabee maaboodon ko but samet rabb kay ghar say nikaal diya. jo qurbaangaahen us nay rabb kay ghar kee pahaadee aur baaqee yarooshalam men khadee kee theen unhen bhee us nay dha kar shaher say baahar phaink diya. ¹⁶phir us nay rabb kee qurbaangaah ko naay siray say taameer karkay us par salaamatee aur shukrguzaaree kee qurbaaniyaan chadhaaeen. saath saath us nay yahoodaah kay baashindon say kaha ki rabb israaeel kay khuda kee khidmat karen. ¹⁷go log is kay baad bhee oonchee jagahon par apnee qurbaaniyaan pesh kartay thay, lekin ab say vah inhen sirf rabb apnay khuda ko pesh kartay thay.

¹⁸baaqee jo kuchh manassee kee hukoomat kay dauraan hua vah ‘shaahaan-ay-israaeel kee taareekh’ kee kitaab men darj hai. vahaan us kee apnay khuda say dua bhee bayaan kee gaee hai aur vah baaten bhee jo ghaibbeenon nay rabb israaeel kay khuda kay naam men usay bataaee theen. ¹⁹ghaibbeenon kee kitaab men bhee manassee kee dua bayaan kee gaee hai aur yah ki allaah nay kis tarah us kee sunee. vahaan us kay tamaam gunaahon aur bevafaaee ka zikr hai, neez un oonchee jagahon kee faherist darj hai jahaan us nay allaah kay taabay ho jaanay say pahelay mandir bana kar yaseerat devee kay khambay aur but khaday kiay thay. ²⁰jab manassee mar kar apnay baapdaada say ja mila to usay us kay mahel men dafan kiya gaya. phir us ka beta amoon takhtnasheen hua.

yahoodaah ka baadshaah amoon

²¹amoon 22 saal kee umr men baadshaah bana aur do saal tak yarooshalam men hukoomat karta raha. ²²apnay baap manassee kee tarah vah aisa ghalat kaam karta raha jo rabb ko naapsand tha. jo but us kay baap nay banvaaay thay un hee kee pooja vah karta aur un hee ko qurbaaniyaan pesh karta tha. ²³lekin us men aur manassee men yah farq tha ki betay nay apnay aap ko rabb kay saamnay past na kiya balki us ka qusoor mazeed sangeen hota gaya. ²⁴ek din amoon kay kuchh afsaron nay us kay khilaaf saazish karkay usay mahel men qatl kar diya. ²⁵lekin ummat nay tamaam saazish karnay vaalon ko maar daala aur amoon kee jagah us kay betay yoosiyaah ko baadshaah bana diya.