2 Tavaareekh 34

yoosiyaah baadshaah butparastee kee mukhaalafat karta hai

¹yoosiyaah 8 saal kee umr men baadshaah bana, aur yarooshalam men rah kar us kee hukoomat ka dauraaniya 31 saal tha. ²yoosiyaah vah kuchh karta raha jo rabb ko pasand tha. vah apnay baap daaood kay achchhay namoonay par chalta raha aur us say na daaeen, na baaeen taraf hata.

³apnee hukoomat kay aathven saal men vah apnay baap daaood kay khuda kee marzee talaash karnay laga, go us vaqt vah javaan hee tha. apnee hukoomat kay 12ven saal men vah oonchee jagahon kay mandiron, yaseerat devee kay khambon aur tamaam taraashay aur dhaalay huay buton ko pooray mulk say door karnay laga. yoon tamaam yarooshalam aur yahoodaah in cheezon say paak-saaf ho gaya. ⁴baadshaah kay zer-ay-nigraanee baal devtaaon kee qurbaanagaahon ko dha diya gaya. bakhoor kee jo qurbaangaahen un kay oopar theen unhen us nay tukday tukday kar diya. yaseerat devee kay khambon aur taraashay aur dhaalay huay buton ko zameen par patakh kar us nay unhen pees kar un kee qabron par bikher diya jinhon nay jeetay jee un ko qurbaaniyaan pesh kee theen. ⁵butparast pujaariyon kee haddiyon ko un kee apnee qurbaanagaahon par jalaaya gaya. is tarah say yoosiyaah nay yarooshalam aur yahoodaah ko paak-saaf kar diya. ^6-7 yah us nay na sirf yahoodaah balki manassee, ifraaeem, shamaaoon aur naftaalee tak kay shaheron men ird-gird kay khandaraat samet bhee kiya. us nay qurbaanagaahon ko gira kar yaseerat devee kay khambon aur buton ko tukday tukday karkay chikna-choor kar diya. tamaam israaeel kee bakhoor kee qurbaanagaahon ko us nay dha diya. is kay baad vah yarooshalam vaapas chala gaya.

rabb kay ghar kee marammat

⁸apnee hukoomat kay 18ven saal men yoosiyaah nay saafan bin asaliyaah, yarooshalam par muqarrar afsar maasiyaah aur baadshaah kay musheer-ay-khaas yooaakh bin yooaakhaz ko rabb apnay khuda kay ghar kay paas bheja taaki us kee marammat karvaaen. us vaqt mulk aur rabb kay ghar ko paak-saaf karnay kee muhimm jaaree thee. ⁹imaam-ay-aazam khilaqiyaah kay paas ja kar unhon nay usay vah paisay diay jo laavee kay darbaanon nay rabb kay ghar men jama kiay thay. yah hadiay manassee aur ifraaeem kay baashindon, israaeel kay tamaam bachay huay logon aur yahoodaah, binyameen aur yarooshalam kay rahenay vaalon kee taraf say pesh kiay gaay thay.

¹⁰ab yah paisay un thekedaaron kay havaalay kar diay gaay jo rabb kay ghar kee marammat karva rahay thay. in paison say thekedaaron nay un kaareegaron kee ujrat ada kee jo rabb kay ghar kee marammat karkay usay mazboot kar rahay thay. ¹¹kaareegaron aur taameer karnay vaalon nay in paison say taraashay huay patthar aur shaheteeron kee lakdee bhee khareedee. imaaraton men shaheteeron ko badalnay kee zaroorat thee, kyoonki yahoodaah kay baadshaahon nay un par dhyaan naheen diya tha, lihaaza vah gal gaay thay. ¹²in aadmiyon nay vafaadaaree say khidmat sar’anjaam dee. chaar laavee in kee nigraanee kartay thay jin men yahet aur abadiyaah miraaree kay khaandaan kay thay jabki zakariyaah aur masullaam qihaat kay khaandaan kay thay. jitnay laavee saaz bajaanay men maahir the ¹³vah mazdooron aur tamaam deegar kaareegaron par muqarrar thay. kuchh aur laavee munshee, nigraan aur darbaan thay.

rabb kay ghar men shareeat kee kitaab mil jaatee hai

¹⁴jab vah paisay baahar laaay gaay jo rabb kay ghar men jama huay thay to khilaqiyaah ko shareeat kee vah kitaab milee jo rabb nay moosa kee maarifat dee thee. ¹⁵usay meeramunshee saafan ko day kar us nay kaha, “mujhay rabb kay ghar men shareeat kee kitaab milee hai.” ¹⁶tab saafan kitaab ko lay kar baadshaah kay paas gaya aur usay ittila dee, “jo bhee zimmaadaaree aap kay mulaazimon ko dee gaee unhen vah achchhee tarah poora kar rahay hain. ¹⁷unhon nay rabb kay ghar men jamaashuda paisay marammat par muqarrar thekedaaron aur baaqee kaam karnay vaalon ko day diay hain.” ¹⁸phir saafan nay baadshaah ko bataaya, “khilaqiyaah nay mujhay ek kitaab dee hai.” kitaab ko khol kar vah baadshaah kee maujoodgee men us kee tilaavat karnay laga.

¹⁹kitaab kee baaten sun kar baadshaah nay ranjeeda ho kar apnay kapday phaad liyay. ²⁰us nay khilaqiyaah, akheeqaam bin saafan, abdon bin meekaah, meeramunshee saafan aur apnay khaas khaadim asaayaah ko bula kar unhen hukm diya, ²¹“ja kar meree aur israaeel aur yahoodaah kay bachay huay afraad kee khaatir rabb say is kitaab men darj baaton kay baaray men darayaaft karen. rabb ka jo ghazab ham par naazil honay vaala hai vah nihaayat sakht hai, kyoonki hamaaray baapdaada na rabb kay farmaan kay taabay rahay, na un hidaayaat kay mutaabiq zindagee guzaaree hai jo kitaab men darj kee gaee hain.”

²²chunaanchay khilaqiyaah baadshaah kay bhejay huay chand aadmiyon kay saath khulda nabiya ko milnay gaya. khulda ka shauhar salloom bin toqahet bin khasra rabb kay ghar kay kapday sambhaalta tha. vah yarooshalam kay naay ilaaqay men rahetay thay. ^23-24 khulda nay unhen javaab diya,

“rabb israaeel ka khuda farmaata hai ki jis aadmee nay tumhen bheja hai usay bata dena, ‘rabb farmaata hai ki main is shaher aur is kay baashindon par aafat naazil karoonga. vah tamaam laanten pooree ho jaaengee jo baadshaah kay huzoor padhee gaee kitaab men bayaan kee gaee hain. ²⁵kyoonki meree qaum nay mujhay tark karkay deegar maaboodon ko qurbaaniyaan pesh kee hain aur apnay haathon say but bana kar mujhay taish dilaaya hai. mera ghazab is maqaam par naazil ho jaaega aur kabhee khatm naheen hoga.’ ²⁶lekin yahoodaah kay baadshaah kay paas jaaen jis nay aap ko rabb say darayaaft karnay kay liyay bheja hai aur usay bata den ki rabb israaeel ka khuda farmaata hai, ‘meree baaten sun kar ²⁷tera dil narm ho gaya hai. jab tujhay pata chala ki main nay is maqaam aur is kay baashindon kay khilaaf baat kee hai to too nay apnay aap ko allaah kay saamnay past kar diya. too nay badee inkisaaree say ranjeeda ho kar apnay kapday phaad liyay aur meray huzoor phoot phoot kar roya. rabb farmaata hai ki yah dekh kar main nay teree sunee hai. ²⁸jab too meray kahenay par mar kar apnay baapdaada say ja milega to salaamatee say dafan hoga. jo aafat main shaher aur us kay baashindon par naazil karoonga vah too khud naheen dekhega’.”

afsar baadshaah kay paas vaapas gaay aur usay khulda ka javaab suna diya.

yoosiyaah rabb say ahd baandhta hai

²⁹tab baadshaah yahoodaah aur yarooshalam kay tamaam buzurgon ko bula kar ³⁰rabb kay ghar men gaya. sab log chhotay say lay kar baday tak us kay saath gaay yaanee yahoodaah kay aadmee, yarooshalam kay baashinday, imaam aur laavee. vahaan pahunch kar jamaaat kay saamnay ahd kee us pooree kitaab kee tilaavat kee gaee jo rabb kay ghar men milee thee.

³¹phir baadshaah nay apnay satoon kay paas khaday ho kar rabb kay huzoor ahd baandha aur vaada kiya, “ham rabb kee pairvee karengay, ham pooray dil-o-jaan say us kay ahkaam aur hidaayaat pooree karkay is kitaab men darj ahd kee baaten qaaim rakhengay.” ³²yoosiyaah nay mutaalba kiya ki yarooshalam aur yahoodaah kay tamaam baashinday ahd men shareek ho jaaen. us vaqt say yarooshalam kay baashinday apnay baapdaada kay khuda kay ahd kay saath liptay rahay.

³³yoosiyaah nay israaeel kay pooray mulk say tamaam ghinaunay buton ko door kar diya. israaeel kay tamaam baashindon ko us nay taakeed kee, “rabb apnay khuda kee khidmat karen.” chunaanchay yoosiyaah kay jeetay jee vah rabb apnay baapdaada kee raah say door na huay.