2 Tavaareekh 35

yoosiyaah fasah kee eed manaata hai

¹phir yoosiyaah nay rabb kee taazeem men fasah kee eed manaaee. pahelay maheenay kay 14ven din fasah ka lela zabah kiya gaya. ²baadshaah nay imaamon ko kaam par laga kar un kee hausalaaafzaaee kee ki vah rabb kay ghar men apnee khidmat achchhee tarah anjaam den. ³laaviyon ko tamaam israaeeliyon ko shareeat kee taaleem denay kee zimmaadaaree dee gaee thee, aur saath saath unhen rabb kee khidmat kay liyay makhsoos kiya gaya tha. un say yoosiyaah nay kaha,

“muqaddas sandooq ko us imaarat men rakhen jo israaeel kay baadshaah daaood kay betay sulemaan nay taameer kiya. usay apnay kandhon par utha kar idhar udhar lay jaanay kee zaroorat naheen hai balki ab say apna vaqt rabb apnay khuda aur us kee qaum israaeel kee khidmat men sarf karen. ⁴un khaandaanee gurohon kay mutaabiq khidmat kay liyay tayyaar rahen jin kee tarteeb daaood baadshaah aur us kay betay sulemaan nay likh kar muqarrar kee thee. ⁵phir maqdis men us jagah khaday ho jaaen jo aap kay khaandaanee guroh kay liyay muqarrar hai aur un khaandaanon kee madad karen jo qurbaaniyaan chadhaanay kay liyay aatay hain aur jin kee khidmat karnay kee zimmaadaaree aap ko dee gaee hai. ⁶apnay aap ko khidmat kay liyay makhsoos karen aur fasah kay lelay zabah karkay apnay hamvatanon kay liyay is tarah tayyaar karen jis tarah rabb nay moosa kee maarifat hukm diya tha.”

⁷eed kee khushee men yoosiyaah nay eed manaanay vaalon ko apnee milkiyat men say 30,000 bhed-bakriyon kay bachchay diay. yah jaanvar fasah kee qurbaanee kay taur par chadhaaay gaay jabki baadshaah kee taraf say 3,000 bail deegar qurbaaniyon kay liyay istemaal huay. ⁸is kay ilaava baadshaah kay afsaron nay bhee apnee khushee say qaum, imaamon aur laaviyon ko jaanvar diay. allaah kay ghar kay sab say aala afsaron khilaqiyaah, zakariyaah aur yaheeel nay deegar imaamon ko fasah kee qurbaanee kay liyay 2,600 bhed-bakriyon kay bachchay diay, neez 300 bail. ⁹isee tarah laaviyon kay raahanumaaon nay deegar laaviyon ko fasah kee qurbaanee kay liyay 5,000 bhed-bakriyon kay bachchay diay, neez 500 bail. un men say teen bhaaee banaam koonaniyaah, samaayaah aur nataneeel thay jabki doosron kay naam hasabiyaah, yaeeel aur yoozbad thay. ¹⁰jab har ek khidmat kay liyay tayyaar tha to imaam apnee apnee jagah par aur laavee apnay apnay gurohon kay mutaabiq khaday ho gaay jis tarah baadshaah nay hidaayat dee thee. ¹¹laaviyon nay fasah kay lelon ko zabah karkay un kee khaalen utaareen jabki imaamon nay laaviyon say jaanvaron ka khoon lay kar qurbaangaah par chhidka. ¹²jo kuchh bhasm honay vaalee qurbaaniyon kay liyay muqarrar tha usay qaum kay mukhtalif khaandaanon kay liyay ek taraf rakh diya gaya taaki vah usay baad men rabb ko qurbaanee kay taur par pesh kar saken, jis tarah moosa kee shareeat men likha hai. bailon kay saath bhee aisa hee kiya gaya. ¹³fasah kay lelon ko hidaayaat kay mutaabiq aag par bhoona gaya jabki baaqee gosht ko mukhtalif qism kee degon men ubaala gaya. joon hee gosht pak gaya to laaviyon nay usay jaldee say haazireen men taqseem kiya. ¹⁴is kay baad unhon nay apnay aur imaamon kay liyay fasah kay lelay tayyaar kiay, kyoonki haaroon kee aulaad yaanee imaam bhasm honay vaalee qurbaaniyon aur charbee ko chadhaanay men raat tak masroof rahay.

¹⁵eed kay pooray dauraan aasaf kay khaandaan kay gulookaar apnee apnee jagah par khaday rahay, jis tarah daaood, aasaf, haimaan aur baadshaah kay ghaibbeen yadootoon nay hidaayat dee thee. darbaan bhee rabb kay ghar kay darvaazon par musalsal khaday rahay. unhen apnee jagahon ko chhodnay kee zaroorat bhee naheen thee, kyoonki baaqee laaviyon nay un kay liyay bhee fasah kay lelay tayyaar kar rakhay. ¹⁶yoon us din yoosiyaah kay hukm par qurbaaniyon kay pooray intizaam ko tarteeb diya gaya taaki aainda fasah kee eed manaaee jaaay aur bhasm honay vaalee qurbaaniyaan rabb kee qurbaangaah par pesh kee jaaen.

¹⁷yarooshalam men jama huay israaeeliyon nay fasah kee eed aur bekhameeree rotee kee eed ek haftay kay dauraan manaaee. ¹⁸fasah kee eed israaeel men samooel nabee kay zamaanay say lay kar us vaqt tak is tarah naheen manaaee gaee thee. israaeel kay kisee bhee baadshaah nay usay yoon naheen manaaya tha jis tarah yoosiyaah nay usay us vaqt imaamon, laaviyon, yarooshalam aur tamaam yahoodaah aur israaeel say aaay huay logon kay saath mil kar manaaee. ¹⁹yoosiyaah baadshaah kee hukoomat kay 18ven saal men pahelee dafa rabb kee taazeem men aisee eed manaaee gaee.

yoosiyaah kee maut

²⁰rabb kay ghar kee bahaalee kee takmeel kay baad ek din misr ka baadshaah nikoh darya-ay-furaat par kay shaher karkimees kay liyay ravaana hua taaki vahaan dushman say laday. lekin raastay men yoosiyaah us ka muqaabla karnay kay liyay nikla. ²¹nikoh nay apnay qaasidon ko yoosiyaah kay paas bhej kar usay ittila dee, “ai yahoodaah kay baadshaah, mera aap say kya vaasta? is vaqt main aap par hamla karnay kay liyay naheen nikla balki us shaahee khaandaan par jis kay saath mera jhagda hai. allaah nay farmaaya hai ki main jaldee karoon. vah to meray saath hai. chunaanchay us ka muqaabla karnay say baaz aaen, varna vah aap ko halaak kar dega.”

²²lekin yoosiyaah baaz na aaya balki ladnay kay liyay tayyaar hua. us nay nikoh kee baat na maanee go allaah nay usay us kee maarifat aagaah kiya tha. chunaanchay vah bhes badal kar firaaun say ladnay kay liyay majiddo kay maidaan men pahuncha. ²³jab ladaaee chhid gaee to yoosiyaah teeron say zakhmee hua, aur us nay apnay mulaazimon ko hukm diya, “mujhay yahaan say lay jaao, kyoonki main sakht zakhmee ho gaya hoon.” ²⁴logon nay usay us kay apnay rath par say utha kar us kay ek aur rath men rakha jo usay yarooshalam lay gaya. lekin us nay vafaat paaee, aur usay apnay baapdaada kay khaandaanee qabristaan men dafan kiya gaya. pooray yahoodaah aur yarooshalam nay us ka maatam kiya.

²⁵yaramiyaah nay yoosiyaah kee yaad men maatmee geet likhay, aur aaj tak geet gaanay vaalay mard-o-khavaateen yoosiyaah kee yaad men maatmee geet gaatay hain, yah pakka dastoor ban gaya hai. yah geet ‘noha kee kitaab’ men darj hain.

^26-27 baaqee jo kuchh shuroo say lay kar aakhir tak yoosiyaah kee hukoomat kay dauraan hua vah ‘shaahaan-ay-yahoodaah-o-israaeel’ kee kitaab men bayaan kiya gaya hai. vahaan us kay nek kaamon ka zikr hai aur yah ki us nay kis tarah shareeat kay ahkaam par amal kiya.