2 Tavaareekh 36
yahoodaah ka baadshaah yahooaakhaz
1ummat nay yoosiyaah kay betay yahooaakhaz ko baap kay takht par bitha diya. 2yahooaakhaz 23 saal kee umr men baadshaah bana, aur yarooshalam men us kee hukoomat ka dauraaniya teen maah tha. 3phir misr kay baadshaah nay usay takht say utaar diya, aur mulk-ay-yahoodaah ko taqreeban 3,400 kilograam chaandee aur 34 kilograam sona kharaaj kay taur par ada karna pada. 4misr kay baadshaah nay yahooaakhaz kay sagay bhaaee iliyaaqeem ko yahoodaah aur yarooshalam ka naya baadshaah bana kar us ka naam yahooyaqeem men badal diya. yahooaakhaz ko vah qaid karkay apnay saath misr lay gaya.
yahoodaah ka baadshaah yahooyaqeem
5yahooyaqeem 25 saal kee umr men baadshaah bana, aur yarooshalam men rah kar vah 11 saal tak hukoomat karta raha. us ka chaal-chalan rabb us kay khuda ko naapsand tha. 6ek din baabal kay nabookadnazzar nay yahoodaah par hamla kiya aur yahooyaqeem ko peetal kee zanjeeron men jakad kar baabal lay gaya. 7nabookadnazzar rabb kay ghar kee kaee qeemtee cheezen bhee chheen kar apnay saath baabal lay gaya aur vahaan apnay mandir men rakh deen.
8baaqee jo kuchh yahooyaqeem kee hukoomat kay dauraan hua vah ‘shaahaan-ay-yahoodaah-o-israaeel’ kee kitaab men darj hai. vahaan yah bayaan kiya gaya hai ki us nay kaisee ghinaunee harkaten keen aur ki kya kuchh us kay saath hua. us kay baad us ka beta yahooyaakeen takhtnasheen hua.
yahooyaakeen kee hukoomat
9yahooyaakeen 18 saal kee umr men baadshaah bana, aur yarooshalam men us kee hukoomat ka dauraaniya teen maah aur das din tha. us ka chaal-chalan rabb ko naapsand tha. 10bahaar kay mausam men nabookadnazzar baadshaah nay hukm diya ki usay giriftaar karkay baabal lay jaaya jaaay. saath saath faujiyon nay rabb kay ghar kee qeemtee cheezen bhee chheen kar baabal pahunchaaeen. yahooyaakeen kee jagah nabookadnazzar nay yahooyaakeen kay chacha sidaqiyaah ko yahoodaah aur yarooshalam ka baadshaah bana diya.
sidaqiyaah baadshaah aur yarooshalam kee tabaahee
11sidaqiyaah 21 saal kee umr men takhtnasheen hua, aur yarooshalam men us kee hukoomat ka dauraaniya 11 saal tha. 12us ka chaal-chalan rabb us kay khuda ko naapsand tha. jab yaramiyaah nabee nay usay rabb kee taraf say aagaah kiya to us nay apnay aap ko nabee kay saamnay past na kiya. 13sidaqiyaah ko allaah kee qasam kha kar nabookadnazzar baadshaah ka vafaadaar rahenay ka vaada karna pada. to bhee vah kuchh der kay baad sarkash ho gaya. vah ad gaya, aur us ka dil itna sakht ho gaya ki vah rabb israaeel kay khuda kee taraf dubaara rujoo karnay kay liyay tayyaar naheen tha.
14lekin yahoodaah kay raahanumaaon, imaamon aur qaum kee bevafaaee bhee badhtee gaee. padosee qaumon kay ghinaunay rasm-o-rivaaj apna kar unhon nay rabb kay ghar ko naapaak kar diya, go us nay yarooshalam men yah imaarat apnay liyay makhsoos kee thee.
15baar baar rabb un kay baapdaada ka khuda apnay paighambaron ko un kay paas bhej kar unhen samjhaata raha, kyoonki usay apnee qaum aur sukoonatgaah par taras aata tha. 16lekin logon nay allaah kay paighambaron ka mazaaq udaaya, un kay paighaam haqeer jaanay aur nabiyon ko laan-taan kee. aakhirkaar rabb ka ghazab un par naazil hua, aur bachnay ka koee raasta na raha. 17us nay baabal kay baadshaah nabookadnazzar ko un kay khilaaf bheja to dushman yahoodaah kay javaanon ko talvaar say qatl karnay kay liyay maqdis men ghusnay say bhee na jhijkay. kisee par bhee rahem na kiya gaya, khwaah javaan mard ya javaan khaatoon, khwaah buzurg ya umrraseeda ho. rabb nay sab ko nabookadnazzar kay havaalay kar diya. 18nabookadnazzar nay allaah kay ghar kee tamaam cheezen chheen leen, khwaah vah badee theen ya chhotee. vah rabb kay ghar, baadshaah aur us kay aala afsaron kay tamaam khazaanay bhee baabal lay gaya. 19faujiyon nay rabb kay ghar aur tamaam mahelon ko jala kar yarooshalam kee faseel ko gira diya. jitnee bhee qeemtee cheezen rah gaee theen vah tabaah hueen. 20aur jo talvaar say bach gaay thay unhen baabal ka baadshaah qaid karkay apnay saath baabal lay gaya. vahaan unhen us kee aur us kee aulaad kee khidmat karnee padee. un kee yah haalat us vaqt tak jaaree rahee jab tak faarsee qaum kee saltanat shuroo na huee.
21yoon vah kuchh poora hua jis kee peshgoee rabb nay yaramiyaah nabee kee maarifat kee thee, kyoonki zameen ko aakhirkaar sabat ka vah aaraam mil gaya jo baadshaahon nay usay naheen diya tha. jis tarah nabee nay kaha tha, ab zameen 70 saal tak tabaah aur veeraan rahee.
jilaavatanee say vaapsee
22faars kay baadshaah khoras kee hukoomat kay pahelay saal men rabb nay vah kuchh poora honay diya jis kee peshgoee us nay yaramiyaah kee maarifat kee thee. us nay khoras ko zail ka elaan karnay kee tahereek dee. yah elaan zabaanee aur tahereeree taur par pooree baadshaahee men kiya gaya.
23“faars ka baadshaah khoras farmaata hai, rabb aasmaan kay khuda nay duniya kay tamaam mamaalik meray havaalay kar diay hain. us nay mujhay yahoodaah kay shaher yarooshalam men us kay liyay ghar banaanay kee zimmaadaaree dee hai. aap men say jitnay us kee qaum kay hain yarooshalam kay liyay ravaana ho jaaen. rabb aap ka khuda aap kay saath ho.”