2 Tavaareekh 5
1rabb kay ghar kee takmeel par sulemaan nay vah sona-chaandee aur baaqee tamaam qeemtee cheezen rabb kay ghar kay khazaanon men rakhva deen jo us kay baap daaood nay allaah kay liyay makhsoos kee theen.
ahd ka sandooq rabb kay ghar men laaya jaata hai
2phir sulemaan nay israaeel kay tamaam buzurgon aur qabeelon aur kumbon kay tamaam sarparaston ko apnay paas yarooshalam men bulaaya, kyoonki rabb kay ahd ka sandooq ab tak yarooshalam kay us hissay men tha jo ‘daaood ka shaher’ ya siyyoon kahelaata hai. sulemaan chaahata tha ki qaum kay numaainday haazir hon jab sandooq ko vahaan say rabb kay ghar men pahunchaaya jaaay. 3chunaanchay israaeel kay tamaam mard saal kay saatven maheene [a] sitambar ta aktoobar men baadshaah kay paas yarooshalam men jama huay. isee maheenay men jhompadiyon kee eed manaaee jaatee thee.
4jab sab jama huay to laavee rabb kay sandooq ko utha kar 5rabb kay ghar men laaay. imaamon kay saath mil kar unhon nay mulaaqaat kay khaimay ko bhee us kay tamaam muqaddas saamaan samet rabb kay ghar men pahunchaaya. 6vahaan sandooq kay saamnay sulemaan baadshaah aur baaqee tamaam jamaashuda israaeeliyon nay itnee bhed-bakriyaan aur gaay-bail qurbaan kiay ki un kee taadaad ginee naheen ja saktee thee.
7imaamon nay rabb kay ahd ka sandooq pichhlay yaanee muqaddastareen kamray men la kar karoobee farishton kay paron kay neechay rakh diya. 8farishton kay par pooray sandooq par us kee uthaanay kee lakdiyon samet phailay rahay. 9to bhee uthaanay kee yah lakdiyaan itnee lambee theen ki un kay siray saamnay vaalay yaanee muqaddas kamray say nazar aatay thay. lekin vah baahar say dekhay naheen ja saktay thay. aaj tak vah vaheen maujood hain. 10sandooq men sirf patthar kee vah do takhtiyaan theen jin ko moosa nay horib yaanee koh-ay-seena kay daaman men us men rakh diya tha, us vaqt jab rabb nay misr say niklay huay israaeeliyon kay saath ahd baandha tha. 11phir imaam muqaddas kamray say nikal kar sahen men aaay.
jitnay imaam aaay thay un sab nay apnay aap ko paak-saaf kiya hua tha, khwaah us vaqt un kay guroh kee rabb kay ghar men dyootee thee ya naheen. 12laaviyon kay tamaam gulookaar bhee haazir thay. un kay raahanuma aasaf, haimaan aur yadootoon apnay beton aur rishtedaaron samet sab baareek kataan kay libaas pahenay huay qurbaangaah kay mashriq men khaday thay. vah jhaanjh, sitaar aur sarod baja rahay thay, jabki un kay saath 120 imaam turam phoonk rahay thay. 13gaanay vaalay aur turam bajaanay vaalay mil kar rabb kee sitaaish kar rahay thay. turmon, jhaanjhon aur baaqee saazon kay saath unhon nay buland aavaaz say rabb kee tamjeed men geet gaaya, “vah bhala hai, aur us kee shafqat abdee hai.”
tab rabb ka ghar ek baadal say bhar gaya. 14imaam rabb kay ghar men apnee khidmat anjaam na day sakay, kyoonki allaah ka ghar us kay jalaal kay baadal say maamoor ho gaya tha.