2 Tavaareekh 7

rabb kay ghar kee makhsoosiyat par jashn

¹sulemaan kee is dua kay ikhtitaam par aag nay aasmaan par say naazil ho kar bhasm honay vaalee aur zabah kee qurbaaniyon ko bhasm kar diya. saath saath rabb ka ghar us kay jalaal say yoon maamoor huaa ²ki imaam us men daakhil na ho sakay. ³jab israaeeliyon nay dekha ki aasmaan par say aag naazil huee hai aur ghar rabb kay jalaal say maamoor ho gaya hai to vah munh kay bal jhuk kar rabb kee hamd-o-sana karkay geet gaanay lagay, “vah bhala hai, aur us kee shafqat abdee hai.”

^4-5 phir baadshaah aur tamaam qaum nay rabb kay huzoor qurbaaniyaan pesh karkay allaah kay ghar ko makhsoos kiya. is silsilay men sulemaan nay 22,000 gaay-bailon aur 1,20,000 bhed-bakriyon ko qurbaan kiya. ⁶imaam aur laavee apnee apnee zimmaadaariyon kay mutaabiq khaday thay. laavee un saazon ko baja rahay thay jo daaood nay rabb kee sitaaish karnay kay liyay banvaaay thay. saath saath vah hamd ka vah geet ga rahay thay jo unhon nay daaood say seekha tha, “us kee shafqat abdee hai.” laaviyon kay muqaabil imaam turam baja rahay thay jabki baaqee tamaam log khaday thay. ⁷sulemaan nay sahen ka darmiyaanee hissa qurbaaniyaan chadhaanay kay liyay makhsoos kiya. vajah yah thee ki peetal kee qurbaangaah itnee qurbaaniyaan pesh karnay kay liyay chhotee thee, kyoonki bhasm honay vaalee qurbaaniyon aur ghalla kee nazron kee taadaad bahut ziyaada thee. is kay ilaava salaamatee kee beshumaar qurbaaniyon kee charbee ko bhee jalaana tha.

^8-9 eed 14 dinon tak manaaee gaee. pahelay haftay men sulemaan aur tamaam israaeel nay qurbaangaah kee makhsoosiyat manaaee aur doosray haftay men jhompadiyon kee eed. is eed men bahut ziyaada log shareek huay. vah doordaraaz ilaaqon say yarooshalam aaay thay, shimaal men labo-hamaat say lay kar junoob men us vaadee tak jo misr kee sarhadd thee. aakhiree din pooree jamaaat nay ikhtitaamee jashn manaaya. ¹⁰yah saatven maah kay 23ven din vuqoopzeer hua. is kay baad sulemaan nay israaeeliyon ko rukhsat kiya. sab shaadmaan aur dil say khush thay ki rabb nay daaood, sulemaan aur apnee qaum israaeel par itnee meharbaanee kee hai.

rabb sulemaan say hamkalaam hota hai

¹¹chunaanchay sulemaan nay rabb kay ghar aur shaahee mahel ko takmeel tak pahunchaaya. jo kuchh bhee us nay thaan liya tha vah poora hua. ¹²ek raat rabb us par zaahir hua aur kaha,

“main nay teree dua ko sun kar tai kar liya hai ki yah ghar vahee jagah ho jahaan tum mujhay qurbaaniyaan pesh kar sako. ¹³jab kabhee main baarish ka silsila rokoon, ya faslen kharaab karnay kay liyay tiddiyaan bhejoon ya apnee qaum men vaba phailnay doon ¹⁴to agar meree qaum jo meray naam say kahelaatee hai apnay aap ko past karay aur dua karkay meray chiharay kee taalib ho aur apnee shareer raahon say baaz aaay to phir main aasmaan par say us kee sun kar us kay gunaahon ko muaaf kar doonga aur mulk ko bahaal karoonga. ¹⁵ab say jab bhee yahaan dua maangee jaaay to meree aankhen khulee rahengee aur meray kaan us par dhyaan dengay. ¹⁶kyoonki main nay is ghar ko chun kar makhsoos-o-muqaddas kar rakha hai taaki mera naam hamesha tak yahaan qaaim rahay. meree aankhen aur dil hamesha is men haazir rahengay. ¹⁷jahaan tak tera taalluq hai, apnay baap daaood kee tarah meray huzoor chalta rah. kyoonki agar too meray tamaam ahkaam aur hidaayaat kee pairvee karta rahe ¹⁸to main teree israaeel par hukoomat qaaim rakhoonga. phir mera vah vaada qaaim rahega jo main nay teray baap daaood say ahd baandh kar kiya tha ki israaeel par teree aulaad kee hukoomat hamesha tak qaaim rahegee.

¹⁹lekin khabardaar! agar too mujh say door ho kar meray diay gaay ahkaam aur hidaayaat ko tark karay balki deegar maaboodon kee taraf rujoo karkay un kee khidmat aur parastish kare ²⁰to main israaeel ko jad say ukhaad kar us mulk say nikaal doonga jo main nay un ko day diya tha. na sirf yah balki main is ghar ko bhee radd kar doonga jo main nay apnay naam kay liyay makhsoos-o-muqaddas kar liya hai. us vaqt main israaeel ko tamaam aqvaam men mazaaq aur laan-taan ka nishaana bana doonga. ²¹is shaandaar ghar kee buree haalat dekh kar yahaan say guzarnay vaalay tamaam logon kay rongtay khaday ho jaaengay, aur vah poochhengay, ‘rabb nay is mulk aur is ghar say aisa sulook kyoon kiya?’ ²²tab log javaab dengay, ‘is liyay ki go rabb un kay baapdaada ka khuda unhen misr say nikaal kar yahaan laaya to bhee yah log usay tark karkay deegar maaboodon say chimat gaay hain. choonki vah un kee parastish aur khidmat karnay say baaz na aaay is liyay us nay unhen is saaree museebat men daal diya hai’.”