2 Tavaareekh 8

sulemaan kee mukhtalif muhimmaat

¹rabb kay ghar aur shaahee mahel ko taameer karnay men 20 saal sarf huay thay. ²is kay baad sulemaan nay vah aabaadiyaan naay siray say taameer keen jo heeraam nay usay day dee theen. in men us nay israaeeliyon ko basa diya.

³ek faujee muhimm kay dauraan us nay hamaat-zobaah par hamla karkay us par qabza kar liya. ⁴is kay ilaava us nay hamaat kay ilaaqay men godaam kay shaher banaaay. registaan kay shaher tadmoor men us nay bahut sa taameeree kaam karaayaa ^5-6 aur isee tarah baalaaee aur nishebee bait-hauroon aur baalaat men bhee. in shaheron kay liyay us nay faseel aur kunday vaalay darvaazay banvaaay. sulemaan nay apnay godaamon kay liyay aur apnay rathon aur ghodon ko rakhnay kay liyay bhee shaher banvaaay.

jo kuchh bhee vah yarooshalam, lubnaan ya apnee saltanat kee kisee aur jagah banvaana chaahata tha vah us nay banvaaya. ^7-8 jin aadmiyon kee sulemaan nay begaar par bhartee kee vah israaeelee naheen thay balki hittee, amoree, farizzee, hivvee aur yaboosee yaanee kan’aan kay pahelay baashindon kee vah aulaad thay jo baaqee rah gaay thay. mulk par qabza kartay vaqt israaeelee in qaumon ko pooray taur par mita na sakay, aur aaj tak in kee aulaad ko israaeel kay liyay begaar men kaam karna padta hai. ⁹lekin sulemaan nay israaeeliyon ko aisay kaam karnay par majboor na kiya balki vah us kay faujee aur rathon kay faujiyon kay afsar ban gaay, aur unhen rathon aur ghodon par muqarrar kiya gaya. ¹⁰sulemaan kay taameeree kaam par bhee 250 israaeelee muqarrar thay jo zilaon par muqarrar afsaron kay taabay thay. yah log taameeree kaam karnay vaalon kee nigraanee kartay thay.

¹¹firaaun kee betee yarooshalam kay puraanay hissay banaam ‘daaood ka shaher’ say us mahel men muntaqil huee jo sulemaan nay us kay liyay taameer kiya tha, kyoonki sulemaan nay kaha, “laazim hai ki meree aheliya israaeel kay baadshaah daaood kay mahel men na rahay. choonki rabb ka sandooq yahaan say guzra hai, is liyay yah jagah muqaddas hai.”

rabb kay ghar men khidmat kee tarteeb

¹²us vaqt say sulemaan rabb ko rabb kay ghar kay baday haal kay saamnay kee qurbaangaah par bhasm honay vaalee qurbaaniyaan pesh karta tha. ¹³jo kuchh bhee moosa nay rozaana kee qurbaaniyon kay mutaalliq farmaaya tha us kay mutaabiq baadshaah qurbaaniyaan chadhaata tha. in men vah qurbaaniyaan bhee shaamil theen jo sabat kay din, naay chaand kee eed par aur saal kee teen badee eedon par yaanee fasah kee eed, hafton kee eed aur jhompadiyon kee eed par pesh kee jaatee theen. ¹⁴sulemaan nay imaamon kay mukhtalif gurohon ko vah zimmaadaariyaan saumpeen jo us kay baap daaood nay muqarrar kee theen. laaviyon kee zimmaadaariyaan bhee muqarrar kee gaeen. un kee ek zimmaadaaree rabb kee hamd-o-sana karnay men parastaaron kee raahanumaaee karnee thee. neez, unhen rozaana kee zarooriyaat kay mutaabiq imaamon kee madad karnee thee. rabb kay ghar kay darvaazon kee paheraadaaree bhee laaviyon kee ek khidmat thee. har darvaazay par ek alag guroh kee dyootee lagaaee gaee. yah bhee mard-ay-khuda daaood kee hidaayaat kay mutaabiq hua. ¹⁵jo bhee hukm daaood nay imaamon, laaviyon aur khazaanon kay mutaalliq diya tha vah unhon nay poora kiya.

¹⁶yoon sulemaan kay tamaam mansoobay rabb kay ghar kee bunyaad rakhnay say lay kar us kee takmeel tak pooray huay.

¹⁷baad men sulemaan asyoon-jaabar aur ailaat gaya. yah shaher adom kay saahil par vaaqay thay. ¹⁸vahaan heeraam baadshaah nay apnay jahaaz aur tajaribaakaar mallaah bhejay taaki vah sulemaan kay aadmiyon kay saath mil kar jahaazon ko chalaaen. unhon nay ofeer tak safar kiya aur vahaan say sulemaan kay liyay taqreeban 15,000 kilograam sona lay kar aaay.