2 Salaateen 1

akhaziyaah kay liyay ilyaas ka paighaam

¹akhiyab kee maut kay baad moaab ka mulk baaghee ho kar israaeel kay taabay na raha.

²saamriya kay shaahee mahel kay baalaakhaanay kee ek deevaar men jangla laga tha. ek din akhaziyaah baadshaah janglay kay saath lag gaya to vah toot gaya aur baadshaah zameen par gir kar bahut zakhmee hua. us nay qaasidon ko filistee shaher aqroon bhej kar kaha, “ja kar aqroon kay devta baal-zaboob say pata karen ki meree sehat bahaal ho jaaegee ki naheen.” ³tab rabb kay farishtay nay ilyaas tishbee ko hukm diya, “uth, saamriya kay baadshaah kay qaasidon say milnay ja. un say poochh, ‘aap darayaaft karnay kay liyay aqroon kay devta baal-zaboob kay paas kyoon ja rahay hain? kya israaeel men koee khuda naheen hai? ⁴chunaanchay rabb farmaata hai ki ai akhaziyaah, jis bistar par too pada hai us say too kabhee naheen uthnay ka. too yaqeenan mar jaaega’.”

ilyaas ja kar qaasidon say mila. ⁵us ka paighaam sun kar qaasid baadshaah kay paas vaapas gaay. us nay poochha, “aap itnee jaldee vaapas kyoon aaay?” ⁶unhon nay javaab diya, “ek aadmee ham say milnay aaya jis nay hamen aap kay paas vaapas bhej kar aap ko yah khabar pahunchaanay ko kaha, ‘rabb farmaata hai ki too apnay baaray men darayaaft karnay kay liyay apnay bandon ko aqroon kay devta baal-zaboob kay paas kyoon bhej raha hai? kya israaeel men koee khuda naheen hai? choonki too nay yah kiya hai is liyay jis bistar par too pada hai us say too kabhee naheen uthnay ka. too yaqeenan mar jaaega’.”

⁷akhaziyaah nay poochha, “yah kis qism ka aadmee tha jis nay aap say mil kar aap ko yah baat bataaee?” ⁸unhon nay javaab diya, “us kay lambay baal thay, aur kamar men chamday kee petee bandhee huee thee.” baadshaah bol utha, “yah to ilyaas tishbee tha!”

aasmaan say aag

⁹fauran us nay ek afsar ko 50 faujiyon samet ilyaas kay paas bhej diya. jab faujee ilyaas kay paas pahunchay to vah ek pahaadee kee chotee par baitha tha. afsar bola, “ai mard-ay-khuda, baadshaah kahetay hain ki neechay utar aaen!” ¹⁰ilyaas nay javaab diya, “agar main mard-ay-khuda hoon to aasmaan say aag naazil ho kar aap aur aap kay 50 faujiyon ko bhasm kar day.” fauran aasmaan say aag naazil huee aur afsar ko us kay logon samet bhasm kar diya. ¹¹baadshaah nay ek aur afsar ko ilyaas kay paas bhej diya. us kay saath bhee 50 faujee thay. us kay paas pahunch kar afsar bola, “ai mard-ay-khuda, baadshaah kahetay hain ki fauran utar aaen.” ¹²ilyaas nay dubaara pukaara, “agar main mard-ay-khuda hoon to aasmaan say aag naazil ho kar aap aur aap kay 50 faujiyon ko bhasm kar day.” fauran aasmaan say allaah kee aag naazil huee aur afsar ko us kay 50 faujiyon samet bhasm kar diya.

¹³phir baadshaah nay teesree baar ek afsar ko 50 faujiyon kay saath ilyaas kay paas bhej diya. lekin yah afsar ilyaas kay paas oopar chadh aaya aur us kay saamnay ghutnay tek kar iltimaas karnay laga, “ai mard-ay-khuda, meree aur apnay in 50 khaadimon kee jaanon kee qadar karen. ¹⁴dekhen, aag nay aasmaan say naazil ho kar pahelay do afsaron ko un kay aadmiyon samet bhasm kar diya hai. lekin baraah-ay-karam hamaaray saath aisa na karen. meree jaan kee qadar karen.”

¹⁵tab rabb kay farishtay nay ilyaas say kaha, “is say mat darna balki is kay saath utar ja!” chunaanchay ilyaas utha aur afsar kay saath utar kar baadshaah kay paas gaya. ¹⁶us nay baadshaah say kaha, “rabb farmaata hai, ‘too nay apnay qaasidon ko aqroon kay devta baal-zaboob say darayaaft karnay kay liyay kyoon bheja? kya israaeel men koee khuda naheen hai? choonki too nay yah kiya hai is liyay jis bistar par too pada hai us say too kabhee naheen uthnay ka. too yaqeenan mar jaaega’.”

akhaziyaah kee maut

¹⁷vaisa hee hua jaisa rabb nay ilyaas kee maarifat farmaaya tha, akhaziyaah mar gaya. choonki us ka beta naheen tha is liyay us ka bhaaee yahooraam yahoodaah kay baadshaah yooraam bin yahoosafat kee hukoomat kay doosray saal men takhtnasheen hua. ¹⁸baaqee jo kuchh akhaziyaah kee hukoomat kay dauraan hua aur jo kuchh us nay kiya vah ‘shaahaan-ay-israaeel kee taareekh’ kee kitaab men bayaan kiya gaya hai.