2 Salaateen 10

yaahoo akhiyab kee aulaad ko halaak karta hai

¹saamriya men akhiyab kay 70 betay thay. ab yaahoo nay khat likh kar saamriya bhej diay. yazrael kay afsaron, shaher kay buzurgon aur akhiyab kay beton kay sarparaston ko yah khat mil gaay, aur un men zail kee khabar likhee thee,

²“aap kay maalik kay betay aap kay paas hain. aap qil’aaband shaher men rahetay hain, aur aap kay paas hathiyaar, rath aur ghoday bhee hain. is liyay main aap ko chailenj deta hoon ki yah khat padhtay hee ³apnay maalik kay sab say achchhay aur laaiq betay ko chun kar usay us kay baap kay takht par bitha den. phir apnay maalik kay khaandaan kay liyay laden!”

⁴lekin saamriya kay buzurg behad sahem gaay aur aapas men kahenay lagay, “agar do baadshaah us ka muqaabla na kar sakay to ham kya kar saktay hain?” ⁵is liyay mahel kay inchaarj, saamriya par muqarrar afsar, shaher kay buzurgon aur akhiyab kay beton kay sarparaston nay yaahoo ko paighaam bheja, “ham aap kay khaadim hain aur jo kuchh aap kahengay ham karnay kay liyay tayyaar hain. ham kisee ko baadshaah muqarrar naheen karengay. jo kuchh aap munaasib samajhtay hain vah karen.”

⁶yah padh kar yaahoo nay ek aur khat likh kar saamriya bheja. us men likha tha, “agar aap vaaqaee meray saath hain aur meray taabay rahena chaahatay hain to apnay maalik kay beton kay saron ko kaat kar kal is vaqt tak yazrael men meray paas lay aaen.” kyoonki akhiyab kay 70 betay saamriya kay badon kay paas rah kar parvarish pa rahay thay. ⁷jab khat un kay paas pahunch gaya to in aadmiyon nay 70 kay 70 shahezaadon ko zabah kar diya aur un kay saron ko tokron men rakh kar yazrael men yaahoo kay paas bhej diya.

⁸ek qaasid nay yaahoo kay paas a kar ittila dee, “vah baadshaah kay beton kay sar lay kar aaay hain.” tab yaahoo nay hukm diya, “shaher kay darvaazay par un kay do dher laga do aur unhen subah tak vaheen rahenay do.” ⁹aglay din yaahoo subah kay vaqt nikla aur darvaazay kay paas khaday ho kar logon say mukhaatib hua, “yooraam kee maut kay naatay say aap beilzaam hain. main hee nay apnay maalik kay khilaaf mansoobay baandh kar usay maar daala. lekin kis nay in tamaam beton ka sar qalam kar diya? ¹⁰chunaanchay aaj jaan len ki jo kuchh bhee rabb nay akhiyab aur us kay khaandaan kay baaray men farmaaya hai vah poora ho jaaega. jis ka elaan rabb nay apnay khaadim ilyaas kee maarifat kiya hai vah us nay kar liya hai.” ¹¹is kay baad yaahoo nay yazrael men rahenay vaalay akhiyab kay baaqee tamaam rishtedaaron, baday afsaron, qareebee doston aur pujaariyon ko halaak kar diya. ek bhee na bacha.

¹²phir vah saamriya kay liyay ravaana hua. raastay men jab bait-iqad-roeem kay qareeb pahunch gayaa ¹³to us kee mulaaqaat yahoodaah kay baadshaah akhaziyaah kay chand ek rishtedaaron say huee. yaahoo nay poochha, “aap kaun hain?” unhon nay javaab diya, “ham akhaziyaah kay rishtedaar hain aur saamriya ka safar kar rahay hain. vahaan ham baadshaah aur malika kay beton say milna chaahatay hain.” ¹⁴tab yaahoo nay hukm diya, “unhen zinda pakdo!” unhon nay unhen zinda pakad kar bait-iqad kay hauz kay paas maar daala. 42 aadmiyon men say ek bhee na bacha.

¹⁵us jagah ko chhod kar yaahoo aagay nikla. chaltay chaltay us kee mulaaqaat yoondab bin raikaab say huee jo us say milnay a raha tha. yaahoo nay salaam karkay kaha, “kya aap ka dil meray baaray men mukhlis hai jaisa ki mera dil aap kay baaray men hai?” yoondab nay javaab diya, “jee haan.” yaahoo bola, “agar aisa hai, to meray saath haath milaaen.” yoondab nay us kay saath haath milaaya to yaahoo nay usay apnay rath par savaar honay diya. ¹⁶phir yaahoo nay kaha, “aaen meray saath aur meree rabb kay liyay jidd-o-jahd dekhen.” chunaanchay yoondab yaahoo kay saath saamriya chala gaya.

¹⁷saamriya pahunch kar yaahoo nay akhiyab kay khaandaan kay jitnay afraad ab tak bach gaay thay halaak kar diay. jis tarah rabb nay ilyaas ko farmaaya tha usee tarah akhiyab ka poora gharaana mit gaya.

yaahoo baal kay tamaam pujaariyon ko qatl karta hai

¹⁸is kay baad yaahoo nay tamaam logon ko jama karkay elaan kiya, “akhiyab nay baal devta kee parastish thodee kee hai. main kaheen ziyaada us kee pooja karoonga! ¹⁹ab ja kar baal kay tamaam nabiyon, khidamataguzaaron aur pujaariyon ko bula laaen. khayaal karen ki ek bhee door na rahay, kyoonki main baal ko badee qurbaanee pesh karoonga. jo bhee aanay say inkaar karay usay saza-ay-maut dee jaaegee.”

is tarah yaahoo nay baal kay khidamataguzaaron kay liyay jaal bichha diya taaki vah us men phans kar halaak ho jaaen. ^20-21 us nay pooray israaeel men qaasid bhej kar elaan kiya, “baal devta kay liyay muqaddas eed manaaen!” chunaanchay baal kay tamaam pujaaree aaay, aur ek bhee ijtima say door na raha. itnay jama huay ki baal ka mandir ek siray say doosray siray tak bhar gaya.

²²yaahoo nay eed kay kapdon kay inchaarj ko hukm diya, “baal kay tamaam pujaariyon ko eed kay libaas day dena.” chunaanchay sab ko libaas diay gaay. ²³phir yaahoo aur yoondab bin raikaab baal kay mandir men daakhil huay, aur yaahoo nay baal kay khidamataguzaaron say kaha, “dhyaan den ki yahaan aap kay saath rabb ka koee khaadim maujood na ho. sirf baal kay pujaaree honay chaahien.”

²⁴donon aadmee saamnay gaay taaki zabah kee aur bhasm honay vaalee qurbaaniyaan pesh karen. itnay men yaahoo kay 80 aadmee baahar mandir kay ird-gird khaday ho gaay. yaahoo nay unhen hukm day kar kaha tha, “khabardaar! jo pooja karnay vaalon men say kisee ko bachnay day usay saza-ay-maut dee jaaegee.”

²⁵joon hee yaahoo bhasm honay vaalee qurbaanee ko chadhaanay say faarigh hua to us nay apnay muhaafizon aur afsaron ko hukm diya, “andar ja kar sab ko maar dena. ek bhee bachnay na paaay.” vah daakhil huay aur apnee talvaaron ko khainch kar sab ko maar daala. laashon ko unhon nay baahar phaink diya. phir vah mandir kay sab say andar vaalay kamray men gae ²⁶jahaan but tha. usay unhon nay nikaal kar jala diyaa ²⁷aur baal ka satoon bhee tukday tukday kar diya. baal ka poora mandir dha diya gaya, aur vah jagah bait-ul-khala ban gaee. aaj tak vah is kay liyay istemaal hota hai.

yaahoo kee hukoomat

²⁸is tarah yaahoo nay israaeel men baal devta kee pooja khatm kar dee. ²⁹to bhee vah yarubiaam bin nabaat kay un gunaahon say baaz na aaya jo karnay par yarubiaam nay israaeel ko uksaaya tha. bait-el aur daan men qaaim sonay kay bachhdon kee pooja khatm na huee.

³⁰ek din rabb nay yaahoo say kaha, “jo kuchh mujhay pasand hai usay too nay achchhee tarah sar’anjaam diya hai, kyoonki too nay akhiyab kay gharaanay kay saath sab kuchh kiya hai jo meree marzee thee. is vajah say teree aulaad chauthee pusht tak israaeel par hukoomat kartee rahegee.” ³¹lekin yaahoo nay pooray dil say rabb israaeel kay khuda kee shareeat kay mutaabiq zindagee na guzaaree. vah un gunaahon say baaz aanay kay liyay tayyaar naheen tha jo karnay par yarubiaam nay israaeel ko uksaaya tha.

³²yaahoo kee hukoomat kay dauraan rabb israaeel ka ilaaqa chhota karnay laga. shaam kay baadshaah hazaael nay israaeel kay us pooray ilaaqay par qabza kar liyaa ³³jo darya-ay-yardan kay mashriq men tha. jad, roobin aur manassee ka ilaaqa jiliaad basan say lay kar darya-ay-arnon par vaaqay aroeer tak shaam kay baadshaah kay haath men a gaya.

³⁴baaqee jo kuchh yaahoo kee hukoomat kay dauraan hua, jo us nay kiya aur jo kaamyaabiyaan usay haasil hueen vah ‘shaahaan-ay-israaeel kee taareekh’ kee kitaab men bayaan kiya gaya hai. ^35-36 vah 28 saal saamriya men baadshaah raha. vahaan vah dafan bhee hua. jab vah mar kar apnay baapdaada say ja mila to us ka beta yahooaakhaz takhtnasheen hua.