2 Salaateen 11
yahoodaah men ataliyaah kee zaalimaana hukoomat
1jab akhaziyaah kee maan ataliyaah ko maaloom hua ki mera beta mar gaya hai to vah akhaziyaah kee tamaam aulaad ko qatl karnay lagee. 2lekin akhaziyaah kee sagee bahen yahoosaba nay akhaziyaah kay chhotay betay yooaas ko chupkay say un shahezaadon men say nikaal liya jinhen qatl karna tha aur usay us kee daaya kay saath ek stor men chhupa diya jis men bistar vaghaira mahfooz rakhay jaatay thay. is tarah vah bach gaya. 3baad men yooaas ko rabb kay ghar men muntaqil kiya gaya jahaan vah us kay saath un chhah saalon kay dauraan chhupa raha jab ataliyaah malika thee.
ataliyaah ka anjaam aur yooaas baadshaah ban jaata hai
4ataliyaah kee hukoomat kay saatven saal men yahoyada imaam nay sau sau sipaahiyon par muqarrar afsaron, kaaree naamee daston aur shaahee muhaafizon ko rabb kay ghar men bula liya. vahaan us nay qasam khila kar un say ahd baandha. phir us nay baadshaah kay betay yooaas ko pesh karke 5unhen hidaayat kee, “aglay sabat kay din aap men say jitnay dyootee par aaengay vah teen hisson men taqseem ho jaaen. ek hissa shaahee mahel par pahera day, 6doosra soor naamee darvaazay par aur teesra shaahee muhaafizon kay peechhay kay darvaazay par. yoon aap rabb kay ghar kee hifaazat karengay. 7doosray do guroh jo sabat kay din dyootee naheen kartay unhen rabb kay ghar men a kar yooaas baadshaah kee paheraadaaree karnee hai. 8vah us kay ird-gird daaira bana kar apnay hathiyaaron ko pakday rakhen aur jahaan bhee vah jaaay usay gheray rakhen. jo bhee is daairay men ghusnay kee koshish karay usay maar daalna.”
9so sau sipaahiyon par muqarrar afsaron nay aisa hee kiya. aglay sabat kay din vah sab apnay faujiyon samet yahoyada imaam kay paas aaay. vah bhee aaay jo dyootee par thay aur vah bhee jin kee ab chhuttee thee. 10imaam nay afsaron ko daaood baadshaah kay vah nezay aur dhaalen deen jo ab tak rabb kay ghar men mahfooz rakhee huee theen. 11phir muhaafiz hathiyaaron ko haath men pakday baadshaah kay gird khaday ho gaay. qurbaangaah aur rabb kay ghar kay darmiyaan un ka daaira rabb kay ghar kee junoobee deevaar say lay kar us kee shimaalee deevaar tak phaila hua tha. 12phir yahoyada baadshaah kay betay yooaas ko baahar laaya aur us kay sar par taaj rakh kar usay qavaaneen kee kitaab day dee. yoon yooaas ko baadshaah bana diya gaya. unhon nay usay masah karkay taaliyaan bajaaeen aur buland aavaaz say naara lagaanay lagay, “baadshaah zindaabaad!”
13jab muhaafizon aur baaqee logon ka shor ataliyaah tak pahuncha to vah rabb kay ghar kay sahen men un kay paas aaee. 14vahaan pahunch kar vah kya dekhtee hai ki naya baadshaah us satoon kay paas khada hai jahaan baadshaah rivaaj kay mutaabiq khada hota hai, aur vah afsaron aur turam bajaanay vaalon say ghira hua hai. tamaam ummat bhee saath khadee turam baja baja kar khushee mana rahee hai. ataliyaah ranjish kay maaray apnay kapday phaad kar cheekh uthee, “ghaddaaree, ghaddaaree!”
15yahoyada imaam nay sau sau faujiyon par muqarrar un afsaron ko bulaaya jin kay sapurd fauj kee gaee thee aur unhen hukm diya, “usay baahar lay jaaen, kyoonki munaasib naheen ki usay rabb kay ghar kay paas maara jaaay. aur jo bhee us kay peechhay aaay usay talvaar say maar dena.”
16vah ataliyaah ko pakad kar us raastay par lay gaay jis par chaltay huay ghoday mahel kay paas pahunchtay hain. vahaan usay maar diya gaya. 17phir yahoyada nay baadshaah aur qaum kay saath mil kar rabb say ahd baandh kar vaada kiya ki ham rabb kee qaum rahengay. is kay ilaava baadshaah nay yahoyada kee maarifat qaum say bhee ahd baandha. 18is kay baad ummat kay tamaam log baal kay mandir par toot paday aur usay dha diya. us kee qurbaanagaahon aur buton ko tukday tukday karkay unhon nay baal kay pujaaree mattaan ko qurbaanagaahon kay saamnay hee maar daala. rabb kay ghar par paheredaar khaday karnay kay baad 19yahoyada sau sau faujiyon par muqarrar afsaron, kaaree naamee daston, mahel kay muhaafizon aur baaqee pooree ummat kay hamraah juloos nikaal kar baadshaah ko rabb kay ghar say mahel men lay gaya. vah muhaafizon kay darvaazay say ho kar daakhil huay. baadshaah shaahee takht par baith gaya, 20aur tamaam ummat khushee manaatee rahee. yoon yarooshalam shaher ko sukoon mila, kyoonki ataliyaah ko mahel kay paas talvaar say maar diya gaya tha.
yahoodaah ka baadshaah yooaas
21yooaas saat saal ka tha jab takhtnasheen hua.